“Tangiriia Tarimi Nako i Nanon te Onimaki”

E a kaania ngkai uoua tenga te ririki n nako ngke a koreaki taeka aikai aika kairaki koreaia rinanon te taamnei. (1Bet. 2:17) Ma ti riai ni maiuakin ngkai nakon are mai mwaina! Ti na kanga n tangira riki te bwai teuana n aron te botaki n itaritari ni katobibia te aonnaba ae e a rangi ni mwaiti kaaina? Ti na kanga ni kakoauaa bwa e aki kona n toki ara tangira n te aonnaba ae akea iai te tangira? (Mat. 24:12) Noria ngkana ko kona ni kaekai titiraki aikai, ngkana ko mataku n te birim ae Our Whole Association of Brothers.

(1) N ningai ae ti a riki raoi iai bwa kaain te botaki n itaritari ni Kristian? (2) Baikara mwakuri aika tenua ake ti reitaki iai ma ara botaki n itaritari ni katobibia te aonnaba? (3) A kanga tarira n te onimaki ni kaota nanoia n uarongorongo (a) n te rereua i Alaska, (b) ni matabaiawa aika bubura i Eurobe, ao (c) ni buakonikaini Peru? (4) Bukin tera bwa ti aki riai n iangoia bwa tataekinan te rongorongo bon te mwakuri teuana ae aki rangi n okoro? (5) Taekini katoto aika kaota aroia Ana Tia Kakoaua Iehova ni kabebetea nanoia ao ni boutokaiia tariia (a) imwin te mwaeiei, (b) imwin te angibuaka, ao (c) n tain te buaka i marenaia kaain te aba? (6) Baikara mwakuri n ibuobuoki ake ti kona ni karaoi, ae ti kaotiota iai te aroaro ae kanikinaeaia kaain te botaki n itaritari ni Kristian ni kabane? (Ioa. 13:35) (7) Baikara kakabwaia ngkana ti kaai ni buoka katean ara Tabo n Taromauri? (8) A kanga n teimatoa n aia onimaki tarira n te onimaki ake i Eurobe Mainiku ao Rutia ngke e katabuakaki iai te uarongorongo? (9) Tera aron aia kakorakora ae bati angiia Taani Kakoaua ake a kabanea ibukini kaeani bwabwaro, ao bukin tera? (10) E kanga te birim aei ni kakorakoraa am motinnano (a) ni kani katiteuanaaki n taromauria Iehova ma tarira n taai ni bobotaki ni Kristian, (b) ni buokiia tabemwaang n taai ake a kainnanoa iai buokaia, ao (c) n uarongorongo ma te kakaonimaki n taabo ao n taai nako? (11) Ko na kanga ao n ningai ae ko kona iai ni kabongana te birim aei n te mwakuri ni minita?

Tangiran Iehova iroura, boni ngaia raoi oin rikira bwa kaain te botaki n itaritari ni Kristian. Mangaia are ti kan reiakina taekana ao n reireinia iai tabemwaang. Ti tangiriia te koraki ake e tangiriia Iehova. Ti aki kantaningaia bwa e na kaitauira Iehova, ngkana ti buokiia te koraki akanne n taai ake a kainnanoa iai te ibuobuoki. N oneani mwin anne, ti kaitaua te Atua bwa ti iangoa ara botaki n itaritari ni Kristian bwa ana bwaintangira ae kakawaki. Ti bia teimatoa ni kaotiota tangiraia tarira nako i nanon te onimaki, ngkai e a kaan roko n tokina kabaneani bongin te aonnaba aei ae akea iai te tangira.