Tera Aron Rababan Am Tangira?
“Ko na tangira raom n ai aron tangiram i bon i roum.”—MATAIO 22:39.
1. Ngkana ti tangira Iehova, ao bukin tera bwa ti riai naba n tangiriia raora n aomata?
NGKE e titirakinaki Iesu bwa tera te tua ae te kabanea ni kakannato, ao e kaeka ni kangai: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.” Ao ngkanne, e taekina te kauoua n tua ae e kuri n titeboo ma are te moan: “Ko na tangira raom n ai aron tangiram i bon i roum.” (Mataio 22:37, 39) Eng, tangiraia aomata bon kanikinaean te Kristian. Ma te koaua ni koaua, bwa ngkana ti tangira Iehova, ao e riai ngkanne bwa ti na tangiriia naba raora n aomata. Bukin tera? Ibukina bwa ti kaota tangiran te Atua iroura n arora n ongeaba n ana Taeka, ao ana Taeka e tua bwa ti na tangira raora n aomata. Mangaia are ngkana ti aki kona n tangiriia tarira ao mwaanera n te onimaki, ao e aki koaua tangiran te Atua iroura.—I-Rom 13:8; 1 Ioane 2:5; 4:20, 21.
2. Te aeka n tangira ra ae ti riai n tangiriia raora n aomata iai?
2 Ngke e taku Iesu bwa ti riai n tangiriia raora n aomata, ao e bon nanona iai ae raka riki nakon ae te iraorao n tii ngaia. Ao e taekina te tangira ae kaokoro ma are e taneiai n nonoraki irouia utu, ke imarenan te mwaane ma te aine. E taekina te aeka n tangira are e kaotiotia Iehova nakoia ana toro ake a katabuaki nakoina, ao aron tangirana irouia naba. (Ioane 17:26; 1 Ioane 4:11, 19) Te tia koroboki temanna ae te I-Iutaia—are e noraki iroun Iesu bwa e rabakau n taetae—e nano naba n ana taeka Iesu ngke e taekina ae tangiran te Atua e riai ni karaoaki ma “te nano ni kabanea, ao n te wanawana ni kabanea . . . ao n te korakora ni kabanea.” (Mareko 12:28-34) E bon eti ana taeka teuaei. Te tangira ibukin te Atua ao raona n aomata are e karikirakea inanona te Kristian, e reitaki ma nanora ao wanawanara. E namakinaki n te nano, ao e kairaki n te iango.
3. (a) E a kanga Iesu n reireina “te tia reirei te Tua temanna” bwa e riai ni karababa riki ana iango n aron ataakin ae antai raona? (b) Tera nanon ana kabotau Iesu ibukia Kristian ni boong aikai?
3 N aron are e ribootinaki iroun Ruka, ngke e taku Iesu bwa ti riai n tangiriia raora n aomata, e titiraki ni kangai “te tia reirei te Tua temanna”: “Antai raou?” E kaekaa teuarei Iesu n te taetae ni kaikonaki. E batiboaki te aomata, e iraeaki ana bwai, ao e kitanaki irarikin te kawai ao e kuri ni mate. E rirarikina te ibonga temanna, ao e a manga rikekei naba te I-Rewi. A uaia naakai n aki tabeakina teuare ikoaki. Imwina riki e a manga roko te I-Tamaria, ao e nora teuare ikoaki, ao e rangi n akoia. Antai mai buakoia aomata aika teniman aikai ae e raona raoi teuare ikoaki? E teretere te kaeka iai. (Ruka 10:25-37) Tao e mimi te aomata are e rabakau n te Tua are e ongora arei ngke e taku Iesu bwa te I-Tamaria bon te rao ae e raoiroi riki aroarona nakon aroaron te ibonga ao te I-Rewi. E teretere bwa Iesu e buoka te aomata arei bwa e na tangira raona n aomata n te aro ae rababa riki. Kristian naba a itangitangiri n te aro anne. Iangoia aomata ni kabane ake a tangiraki irouia.
Te Tangira Inanon te Utu
4. E ngaa are e riai ni kaota moa iai te tangira te Kristian?
4 Kristian a tangiriia kaain aia utu—buu-aine a tangiriia buuia, buu-mwaane a tangiriia naba buuia, ao kaaro a tangiriia natia. (Te Minita 9:9; I-Ebeto 5:33; Tito 2:4) Te koaua bwa bon iai te itangitangiri imarenaia kaain angiia utu. Ma e ngae n anne, te ribooti ibukin uruan te mare irouia aomata, oreaia aomata irouia raoia ni mare, ao ataei aika a aki tabeakinaki ke e karaoaki ae buakaka nakoia, a kaotia bwa e a tabe ni karawawataki te utu ni boong aikai, ao te tangira are e nanamakinaki irouia kaain te utu nako e a kona n aki tau ibukin kawakinan te utu bwa e na aki maenako. (2 Timoteo 3:1-3) Ibukin kanakoraoan te maiu n aia utu, Kristian a riai ni kaota te aeka n tangira ae kaotiotaki iroun Iehova ao Iesu.—I-Ebeto 5:21-27.
5. Antai are a onimakinna kaaro ibukin buokaia ni kaikawaiia natia, ao tera uaan karaoan anne irouia aomata aika mwaiti?
5 Kaaro aika Kristian a iangoia natia bwa kaanga te mwioko mairoun Iehova, ao a onimakinna bwa e na buokia ni kaikawaiia. (Taian Areru 127:3-5; Taeka N Rabakau 22:6) N te aro aei, a karikirakea te tangira ni Kristian irouia, are e na buokiia ni kawakinia natia man bwaai ni kariri aika buakaka, ake a mwamwane iai ataei aika mwaiti. Ibukin anne, a mwaiti kaaro aika Kristian ake a namakina te kimwareirei are ai aron kimwareirein te tina are e mena n te Netherlands. Ngke e a tia ni mataku ni babetitoakin natina te mwaane—are temanna mai buakoia aomata aika 575 mwaitiia ake a babetitoaki n te Netherlands n te ririki are nako—ao e a korea ae kangai: “N te tai aei, e a riki uaan au mwakuri are i karaoia inanon ririki aika 20 aika a tibwa nako. Au tai ma korakorau ni kabane—n ikotaki ma te maraki n nano, au kekeiaki, ao te nanokawaki—a bane ni mwanuokinaki ngkai.” Ai kukureira ngaia ngkai natina e a rineia ibon irouna bwa e na beku ibukin Iehova. Ibuakon te mwaiti ae boou ibukia taan ua rongorongo ake a ribooti n te ririki are nako n te Netherlands, ae 31,089, iai naba aomata aika mwaiti ake a reireiaki aron tangiran Iehova irouia aia karo.
6. E na kanga te tangira ni Kristian ni buoka kakorakoran riki te iraorao n te mare?
6 Bauro e arana te tangira bwa “te bwai ni kabaebae are e riki ni moan te raoiroi te aomata iai,” ao e kona ni kateimatoa te iraorao n te mare e ngae ngkana tain te kangaanga. (I-Korote 3:14, 18, 19; 1 Betero 3:1-7) Ngke e moana ana reirei n te Baibara ma Ana Tia Kakoaua Iehova te mwaane temanna i Rurutu, ae te abamwakoro ae uarereke ae 450 te maire raroana mai Tahiti, ao e rangi ni kairiribai iai buuna. Imwin tabeua te tai, e anaiia natina neiei ao e kitana buuna, ao e nako ni maeka i Tahiti. Ma e ngae n anne, e kaota ana tangira teuarei n te aro are e teimatoa ni kanakoa te mwane nakoina ma n tatarebon nakoina n titirakinna bwa iai te bwai ae e kainnanoia neiei ke natiia. Mangaia are e karaoa ana kabanea n raoiroi iai ni kataia ni karaoa bukin tabena ni Kristian. (1 Timoteo 5:8) E aki toki n tataro ni bubutii bwa a na manga iooki kaain ana utu, ao imwin tabeua te tai, e a manga oki buuna. Ngke e oki neierei, teuaei e akoia n ‘te tangira, te taotaonaki n nano, ao te nimamanei’ nakoina. (1 Timoteo 6:11) E babetitoaki n 1998, ao e taonaki n te kimwareirei imwina riki ngke e a butimwaea te reirei n te Baibara neiere buuna. Te reirei anne, bon teuana mai buakon reirei ake 1,351 ake a waakinaki n te aono ae mena i aan ana tararua Tahiti, n te ririki ae nako.
7. N aron are e taekinna te mwaane temanna i Tiaman, tera ae e a kakorakora riki te iraorao n ana mare?
7 I Tiaman, te mwaane temanna e ribaa buuna ngke e tangiria ni kan ataa te koaua man te Baibara, i aan ae teuaei e kakoaua bwa Ana Tia Kakoaua Iehova a na mwamwana buuna. Ma imwina riki e kororeta nakon te tia Kakoaua are e moani kawara buuna, ao e kangai: “Ko rabwa ngkai ko kaira buu nakoia Ana Tia Kakoaua Iehova. I raraoma n te moan tai ibukina bwa a mwaiti rongorongoia aika buakaka ake I ongoraei. Ma I a tibwa ataia bwa I rangi ni kairua iai, ngkai I a kakaei botaki ma buu. I ataia ngkai bwa I a ongora n te koaua iai, ao e a kateimatoa riki ara iraorao ni mare.” A mwaiti utu ake a katiteuanaki n te itangitangiri ae mairoun te Atua, ake a mena ibuakoia taani Kakoaua ibukin Iehova aika 162,932 mwaitiia, ake i Tiaman—ao 1,773 ake a mena n abamwakoro aika a mena i aan ana tararua mwaangan te Totaieti are i Tahiti.
Tangiraia Tarira ni Kristian
8, 9. (a) Antai ae e reireinira bwa ti na tangiriia tarira, ao tera ae e kairira te tangira bwa ti na karaoia? (b) Taekina te katoto teuana n aron te tangira ni buokiia taari bwa a na uaia n ibuobuoki imarenaia.
8 E kangai Bauro nakoia Kristian ake I-Tetaronike: “Kam bon reireiaki iroun te Atua ba kam na i tangitangiri.” (1 I-Tetaronike 4:9) Eng, akana a “reireiaki iroun Iehova” a itangitangiri imarenaia. (Itaia 54:13) E kaotaki aia tangira n aia mwakuri, n aron are e kaotia Bauro ngke e kangai: “Kam na i torotoro i roumi n te tangira.” (I-Karatia 5:13; 1 Ioane 3:18) A karaoa aei ngkana a kawariia taari aika mwaane ao aine aika aoraki, ngkana a kaungai nanoia aomata aika a rawawata nanoia, ao a buokiia aomata aika mamaara. (1 I-Tetaronike 5:14) Ara tangira ni Kristian ni koaua e buoka aron rikiraken ara baretaiti n taamnei.
9 N te ekaretia are i Ancón—ae teuana mai buakon ekaretia ake 544 mwaitiia ake i Ecuador—taari ake a mena iai a kakaota aia tangira n te aro ae manena. A bane n akea aia mwakuri ke aia kareke mwane ibukin te kangaanga are e a riki n aia tabo ni kaineti ma te mwane, ngaia are taan ua rongorongo ake a mena iai a iangoia bwa a na karikirake, n te aro ae a na kabooa nako te amwarake nakoia taan akawa ake a oki imwin te kangaina n akawa. A bane n ibuobuoki iai, n ikotaki naba ma ataei. A riai ni moana aia mwakuri n te aoa teuana n te nukanibong, bwa e aonga n tauraoi te amwarake imwain te aoa 4:00 n te karangaina, are a na oki iai taan akawa. E tibwatibwaki te mwane ae reke mai iai nakoia taari, ni kaineti ma kainnanoia. Te uaia n ibuobuoki iai e kaota te tangira ni Kristian ni koaua.
10, 11. Ti na kanga ni kakaota tangiraia taari ake ti aki kinaia?
10 Ma e ngae n anne, e aki tii kaotaki ara tangira nakoia Kristian ake ti boni kinaia. E kangai te abotoro Betero: “Tangiriia taian tari.” (1 Betero 2:17, ara bwai man reireiti.) Ti tangiriia tarira ao mwaanera n onimaki ni kabaneia ibukina bwa bon raora n taromauria Iehova ae te Atua. Kabuanibwai aika a riiriki, a kona ni karekea ara tai ni kaotiota iai te aeka n tangira aei. N aron anne, n te ririki ni mwakuri ae 2000, ieka aika korakora a karika te kabuanibwai i aon Mozambique, ao te buaka imarenaia kaain te aba ae e wawaakinako i Angola e karika te kangaanga ae te kainnano n akea aia bwai, nakoia aomata aika mwaiti. A mwaiti mai buakoia taari ake 31,725 mwaitiia ake a mena i Mozambique, ao 41,222 ake i Angola, ake a rootaki iai. Mangaia are taani Kakoaua n te aba ae uakaan ma ngaiia are Aberika Maiaki, a kanakoi bwaai n ibuobuoki aika mwaiti nakoia, ibukin buokan kainnanoia tariia n aaba aikai. Kukurein nanoia n anga ‘kaubwaia’ nakoia tariia aika kainnano, e kaotiota aia tangira.—2 I-Korinto 8:8, 13-15, 24.
11 E noraki naba te tangira ngkana taari n aaba aika mwaiti a bwaintangira ibukin kateani Maneaba n Uea ao Taabo ni Botaki, n aaba aika a aki kaubwai. Te katoto n aron anne e noraki i Toromon. E ngae ngke e korakora te aki-rau iai, ma a raka mwaitiia taan ua rongorongo i Toromon n te mwaiti ae 6 te katebubua n te ririki are nako, ao e a reke te mwaiti ae te kabanea ni bubura ae 1,697. A bairea katean te Tabo ni Botaki. E ngae ngkai a mwaiti kaain te aba anne ake a birinako mai iai, ma taan ibuobuoki mai Aotiteria a roko bwa a na buoka te kateitei. N tokina, a riai naba ni kitana te aba anne taan ibuobuoki aikai, ma imwain nakoia a reireinia taari ake kaain te aba, aron katiaan aan te auti. Rabwatan te tabo ni botaki ae karaoaki man te biti e kateaki moa i Aotiteria, ao imwina, a manga kamaeaki nako bwaina man ni kanakoaki nako Toromon. Katiaan te auti n taromauri aei e na riki bwa te kaotioti ae korakora ibukin aran Iehova ao ibukin aia tangira taari—e ngae ngkai a mwaiti aia kateitei aomata tabeman ae aekan anne aika a wene n aki tia.
Ti Tangira te Aba, n ai Aron Tangirana Iroun te Atua
12. Ti na kanga ni katotonga Iehova n arora ae ti kakaraoia nakoia aomata aika tiaki kaain ara onimaki?
12 Ti bon tii tangiria kaain ara utu ao kaain ara botaki n itaritari? Tiaki, ngkana ti ‘kakairi iroun te Atua.’ E kangai Iesu: “E tangiriia aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (I-Ebeto 5:1; Ioane 3:16, ara bwai man reireiti.) N ai aron Iehova ae te Atua, ti kaota te tangira nakoia aomata ni kabane, n ikotaki naba ma aomata ake tiaki kaain ara onimaki. (Ruka 6:35, 36; I-Karatia 6:10) N aron aei, ti tataekina euangkerion te Tautaeka n Uea ma ni kaongoia aomata taekan ana mwakuri n tangira te Atua ae kakannato, are E karaoia ibukia. A kona ni kamaiuaki iai aomata ni kabane ake a ongora.—Mareko 13:10; 1 Timoteo 4:16.
13, 14. Tera aia rongorongo taari tabeman n aron kaotan te tangira irouia nakoia aomata ake tiaki taani Kakoaua, e ngae ngke a rangi ni mweebuaka iai?
13 Iangoia minita aika aman aika special pioneer ake a mena i Nepal. A mwiokoaki bwa a na mwakuri n te kaawa are mena i maiaki/maeaon te aba anne, ao inanon ririki aika nimaua ake a tibwa nako, a kaotiota aia tangira n te aro are a taotaona nanoia n tataekina te rongorongo inanon kaawan te tabo anne ae bubura, ao ni kaawa naba aika uarereke ake a raroa teutana. Ibukin iangoan rokoia n taabo nako ike a mwiokoaki iai, a aki toki ni bwatika nako inanon aoa aika mwaiti, n te kabuebue ae rangi ni korakora. Aia tangira ao aroia ni “botumwaka ni makuri raoi” e kariki uaa aika raraoi ngke e a kateaki te kurubu ibukin te reirei n te boki n te ekaretia, n te kaawa teuana. (I-Rom 2:7) Ni Maati 2000, 32 aomata aika a roko n ongora n te kabwarabwara mairoun te mataniwi ibukin te aono ae uarereke. E a reke te mwaiti ae te kabanea ni bubura ibukia taan ua rongorongo i Nepal n te ririki are nako, ae 430—ae te raka ae 9 te katebubua. E teretere bwa Iehova e kakabwaiaa ingaingan nanoia ao aia tangira, taari n te aba anne.
14 I Colombia, special pioneer ake a tuai ni kamatoaki, a nako n tataekina te rongorongo nakoia kaain te baronga teuana are te Wayuu Indians. Ibukin karaoan aei, a riai moa n reirei te taetae ae boou, ma kaotan tangiraia aomata n te aro aei e a uaa ngke e a karaoaki te kabwarabwara ibukia aomata nako, ao 27 aomata ake a roko iai e ngae ngke e korakora bwakan te karau n te tai anne. Te ingainga n nano ae boto i aon te tangira n aron are e kaotiotaki irouia bwaiania aikai e buoka reken te raka n te mwaiti ae 5 te katebubua i Colombia, ao e a reke te mwaiti ae boou ibukia taan ua rongorongo ae 107,613. I Denmark, te tari-te-aine temanna ae kara, e tangiria n tataekina te euangkerio nakoia aomata tabemwaang, ma e mwauku. E aki bwara nanona iai, ma e maroro ma aomata aika a kan ongora rinanon te koro reta. N te tai aei, ao e kororeta ma aomata aika 42 mwaitiia, ao e kairi reirei n te Baibara aika 11 mwaitiia. Ngaia bon temanna mai buakon te mwaiti ae boou ibukia taan ua rongorongo i Denmark ae 14,885.
Tangiriia Am Kairiribai
15, 16. (a) Tera aron rababan ara tangira are e taku Iesu bwa e riai ni kaotaki iroura? (b) A kanga taari aika a mwiokoaki ni kaota te tangira nakon te aomata are e kairua ni bukinia Ana Tia Kakoaua Iehova ni bwaai tabeua?
15 Iesu e tuanga te mwaane are e rabakau n te Tua bwa te I-Tamaria e riai n iangoaki bwa raona n aomata. N ana Kabwarabwara i aon te Maunga, Iesu e karababa riki te iango aei ngke e kangai: “Kam ongo ba e atongaki ae kangai, Ko na tangira raom, ao riba am kairiribai: ao Ngai I taku nako imi, Kam na tangiriia ami kairiribai, ao tataro i bukiia akana bainikiriningkami; ba kam aonga n riki ba natin Tamami are i karawa.” (Mataio 5:43-45) E ngae ngkana e kairiribai te aomata, ma ti kataia ni “kataea ana kai te buakaka n te raoiroi.” (I-Rom 12:19-21) Ngkana ti kona, ao ti tibwatibwa ara bwai ae te kabanea ni kakawaki nakoia, ae taekan te koaua.
16 N te Ukraine, te kaongora teuana n te nuutibeeba ae te Kremenchuk Herald, e taekinia Ana Tia Kakoaua Iehova bwa te katei n Aro ae karuanikai. Bon te kangaanga aei, bwa i Eurobe, a taekinaki Ana Tia Kakoaua Iehova n te aro aei bwa e aonga n anaki nanoia aomata iai bwa a na taku bwa aia mwakuri taani Kakoaua e riai n totokoaki ke ni katabuaki. Mangaia are e a kawaraki te tia boretia te nuutibeeba aei ni butiaki bwa e na boretia te kaongora teuana ae e na kaetii kairua ake a mena n te moan kaongora. E bon nano iai, ma ngke e a karaoa anne, e taekinna naba iai bwa te moani kaongora e boto i aon te koaua. Mangaia are e a manga kawaraki riki irouia taari ake a mwioko iai, ao e a anganaki riki rongorongo tabeua. N tokina, te tia boretia te nuutibeeba e noria bwa e kairua te moan kaongora, ao e a boretia te kaongora ae e kaota anne. Kaotan te koaua ma te akoi nakon teuaei bon te aro ae tatangira ni kaitara ma te kangaanga aei, ao e a uaa raoi mwina.
Ti na Kanga ni Kona ni Karikirakea Riki te Tangira?
17. Tera ae kaotia bwa tao e aki bebete kaotan te tangira nakoia aomata tabemwaang n taai nako?
17 Ngke e moani bungiaki te merimeri, ao a bon namakina naba tangirana ana karo. Ma e aki kai reke tangiraia aomata aika ikawai n aron anne. Boni ngaia anne bukina ae te Baibara e kaokioka tuangakira ae ti riai n itangitangiri imarenara—ae te bwai ae ti riai ni keiakina aron karaoana. (1 Betero 1:22; 4:8; 1 Ioane 3:11) E ataia Iesu bwa e na kataaki ara tangira ngke e taekina bwa ti riai ni kabwara ana bure tarira ‘itingaun ma itiua’ te tai. (Mataio 18:21, 22) E kaungaira naba Bauro bwa ti na ‘i taotaon nanora’ imarenara. (I-Korote 3:12, 13) Maroaka ae ti a bon tuangaki ni kangai: “Kam na kaaea te tangira”! (1 I-Korinto 14:1) Ti na kanga ni kona ni karaoa aei?
18. Tera ae e na buokira ni karikirakea tangiraia aomata tabemwaang iroura?
18 Te moani bwai, ti kona n ururinga tangiran Iehova ae te Atua iroura. Te tangira aei bon te bwai ni kairiri ae korakora bwa ti na tangira naba raora. Bukin tera? Ibukina bwa ngkana ti karaoa aei, ao e na reke iai neboan ao karaoiroan Tamara are i karawa. (Ioane 15:8-10; I-Biribi 1:9-11) Te kauoua ni bwai, ti kona ni kataia ni kaboraoa aron tarakin bwaai iroura ma aron tarakina iroun Iehova. Ti katoa tai ni bubure, ao ti bure naba nakon Iehova; ma e ngae n anne, e okioki kabwaran ara bure irouna ao e teimatoa naba n tangirira. (Taian Areru 86:5; 103:2, 3; 1 Ioane 1:9; 4:18) Ngkana ti kaboraoa ara taratara ma ana taratara Iehova, ao ti na tangiriia iai raora n aomata ma ni kabwarai aia bure ake a a tia ni karaoi nakoira. (Mataio 6:12) Te katenua ni bwai, ti na tabeakinia aomata n aron are ti tangiria bwa a na tabeakinira naba iai. (Mataio 7:12) Ti aki toki ni kainnanoa kabwaran ara bure, ibukina bwa ti aki-kororaoi. N aron anne, ngkana ti taekin bwaai aika a kammaraka nanoia aomata tabeman, ao ti kaantaningaia bwa a na uringnga bwa a bane aomata ni bubure n taai tabetai ni wiia. (Iakobo 3:2) Ngkana ti tangiriia aomata tabemwaang bwa a na kaota naba te tangira nakoira, ao ti riai ni kaota te tangira nakoia.
19. Ti na kanga ni karekea te ibuobuoki mairoun te taamnei ae raoiroi ibukin karikirakean te tangira iroura?
19 Te kaaua ni bwai, ti kona ni bubutii buokara mairoun te taamnei ae raoiroi, ibukina bwa te tangira bon teuana mai buakon uaan te taamnei ae raoiroi. (I-Karatia 5:22, 23) Te iraorao, te reitaki n te utu, ao te kareke tangira, bon aroaro aika a kai reke irouia aomata n angiin te tai. Ma ti kainnanoa te ibuobuoki mairoun taamnein Iehova bwa ti aonga ni karekea te aeka n tangira are iroun Iehova, ae te bwai ni kabaebae ae moan te raoiroi. Ti kona ni kakaea buokara mairoun te taamnei ae raoiroi ngkana ti wareka te Baibara ae e kairaki koreana irouna. N aron anne, ngkana ti reiakina taekan maiun Iesu, ao ti na nora aroarona nakoia aomata, ao ti kona n reireiaki aron katotongan aroarona. (Ioane 13:34, 35; 15:12) Irarikina, ti kona ni butiia Iehova bwa e na anganira te taamnei ae raoiroi, ao e a moamoa riki n taai ake ti namakinna iai bwa e a kangaanga iroura kaotan te tangira iai. (Ruka 11:13) Te kabanea ni bwai, ti kona ni kaea te tangira ngkana ti nim ma te ekaretia ni Kristian. Te iraorao ma taari aika mwaane ao aine aika a tatangira, e buokira bwa ti na karikirakea te tangira inanora.—Taeka N Rabakau 13:20.
20, 21. Tera aron kaotan te tangira ae rangi ni korakora ae kaotaki irouia Ana Tia Kakoaua Iehova inanon te ririki ni mwakuri ae 2000?
20 N te ririki are nako, te mwaiti ae te kabanea ni bubura ibukia taan uarongorongoa te euangkerio ni katobibia te aonnaba, bon 6,035,564. Ana Tia Kakoaua Iehova a kabanea 1,171,270,425 te aoa ni kakaia aomata ma ni kaongoia taekan te euangkerio. Bon te tangira ae kairiia bwa a na nanomwaaka i aan te kabuebue, te karau, ao te mwaitorotoro ngke a karaoa te mwakuri aei. Bon te tangira ae kairiia bwa a na maroro ma raoia n reirei ao raoia ni mwakuri, ma ni kawariia aomata ake a aki kinaia aika a nakonako irarikin te kawai ao n taabo tabeua riki. Aomata aika mwaiti ake a kawaraki irouia taani Kakoaua a aki kan kuba iai, ao tabeman a kairiribai. Ma iai naba ake a kan ongora, ao a manga okiraki aomata n te mwaiti ae 433,454,049 te tai, ao 4,766,631 mwaitin reirei n te Baibara ake a kairaki irouia aomata.a
21 Ai korakorara iai nanoia Ana Tia Kakoaua Iehova ni kaotiota tangiran Atuaia ao raoia n aomata irouia! E aki kona ni mauna te tangira aei. Ti kakoaua bwa n te ririki ni mwakuri ae 2001, ti na nora karaoan te kaotioti nakoia botannaomata nako, bwa e na bubura riki nakon aei. E bia teimatoa ana kakabwaia Iehova ni mena i aoia taan taromauriia aika a ingainga nanoia, ngkai a ‘karaoi bwaai ni kabane n te tangira’!—1 I-Korinto 16:14.
[Kabwarabwara ae nano]
a Ibukin rongorongon te Ririki ni Mwakuri ae 2000 ae bwanin, nori rongorongo ake a mena n iteraniba 18-21.
Ko Kona ni Kabwarabwaraa?
• Ti katotonga aroaron antai ngkana ti tangiriia raora n aomata?
• E na kanga aron rababan ara tangira?
• Baikara rongorongo tabeua are e a kaotiotaki iai te tangira ni Kristian?
• Ti na kanga ni kona ni karikirakea te tangira ni Kristian?
[Taibora n iteraniba 18-21]
2000 SERVICE YEAR REPORT OF JEHOVAH’S WITNESSES WORLDWIDE
(Nori bound volume)