E na Tibwaaki n Ritembwa te Turaeki ae Rongorongon te Tautaeka n Uea Na. 38!
1. Tera aia titiraki aomata ibukia maate, ao a na kanga ni kaekaaki titiraki aikai n Ritembwa?
1 Te mate bon aia kairiribai aomata ni kabane n aki ongeia bwa tera aia koaua. (1Kor. 15:26) A bati aomata aika a iaiangoia bwa a mena ia maate ao a na kona ni manga noriia ke a na aki. Mangaia are a na bane n ibuobuoki ekaretia ni katobibia te aonnaba n tibwaa te turaeki ae Rongorongon te Tautaeka n Uea Na. 38, ae kangai atuna: “A Kona ni Manga Maiu Maate?, ae e na tibwaaki n te maan ae teuana namwakaina. E na moanaki te mwakuri ae okoro aei n Ritembwa 1. Imwini karaoan te mwakuri ae okoro ibukin tibwaakin te turaeki ae Rongorongon te Tautaeka n Uea Na. 38, e nang kamanenaaki bwa te turaeki n te mwakuri minita.
2. E kanga ni katauraoaki te turaeki ae Rongorongon te Tautaeka n Uea Na. 38?
2 Aroni Katauraoana: E katauraoaki te turaeki ae Rongorongon te Tautaeka n Uea Na. 38 bwa e na kona n rukumaki mai nukana n ira ananaun te beeba, bwa e aonga n noraki raoi te atu ae kakaongora n ikotaki ma taeka aika “Ko kona ni kangai . . . eng? a aki? tao?” Ngkana e kaukaki iroun temanna te turaeki ae Rongorongon te Tautaeka n Uea, e na kona n nora ae taekinaki n te Baibara ae kaekaan atun te titiraki, ao manenan ae beritanaki n te Baibara ibukina. E na nora naba bukina ngkai e kona ni kakoauaa te Baibara. E kaotaki i akun te turaeki ae Rongorongon te Tautaeka n Uea te titiraki ae kakannongora nakoina bwa e na iaiangoia, ao e na kaungaaki iai bwa e na reiakina ae bati riki.
3. E na kanga n tibwaaki te turaeki ae Rongorongon te Tautaeka n Uea Na. 38?
3 Aron Tibwaakina: Titeboo te mwakuri ae okoro aei ma aron tibwaakin te beeba ni kakao ibukin te Kauring ao te bwabwaro. E na katauraoaki irouia unimwaanen te ekaretia te kaetieti ibukini mwakurian te aono, ae kaineti ma kanoan te reta are a karekea ae bonginaki n Eberi 1, 2013. A kona ekaretia aika uarereke aia aono n anga nanoia bwa a na buokiia ekaretia ake a uakaan ma ngaiia ake a rangi ni bubura aia aono. Ngkana ko na karekea am turaeki ae Rongorongon te Tautaeka n Uea Na. 38, uringnga n anaa tii te mwaiti ae ko na kainnanoia ibukin teuana te wiki. N tain tibwaakin te turaeki, a kona n tibwaaki katotona n te uarongorongo n ana tabo te botannaomata imwin te uarongorongo man te auti teuana ma teuana n am aono. Ngkana e a buta te aono n tibwaakin te turaeki aei imwain tokin te namwakaina, e riai ni kaotaki te boki ae e na anga te aba n te namwakaina anne. N te moani Kaonobong, ti na kaatuua ara mwakuri n uataboan te mwakuri ae okoro n oneani mwin ae ti na moana te reirei n te Baibara. Ti riai naba n tibwai maekatin n te wikeen ngkana e angaraoi. Ko karaoi am babaire ibukini kabatiaan uataboan te mwakuri ae okoro aei?