Kabongana te Atureti ae jw.org n am Mwakuri ni Minita

Te atureti ae kakawaraki n te Internet bon te bwai ni mwakuri ae ti buokaki iai ni kabutaanako te rongorongo ae raoiroi “nako tabon aonnaba.” (Mwa. 1:8) A aki kona ni karekea jw.org i bon irouia angiia kaain te auti. Ma a tii kona ni karekea imwin tuangakia iroun te tia uarongorongo.

E a tia te mataniwi ae mwamwananga ni karekea katoton te birim ae E Aera Ngkai E Raoiroi te Reirei n te Baibara? ni karinna n ana tareboon ae uouotaki ao ni kaotia n taai ake a angaraoi. N te katoto, ni kawaran te auti teuana ma teuana, e taekina aei: “I kawariia aomata tabeua te miniti ni buokiia ni karekei kaekaan titiraki aika tenua aika kakawaki aikai: Bukin tera bwa e a rangi ni bati te kangaanga n te aonnaba? E na kangaa te Atua ni katoki kangaanga aikai? Ao tera arora ni kekeiaki i aoia n te tai aei? A kaekaaki titiraki aikai n te taamnei ae kimototo aei.” E taona ngkanne te bwatin ae na oti iai ao n taraa aron rotakin kaain te auti iai. E rangi n anainano te taamnei anne n te aro are a a aki kona n tannako mai iai aomata ni karokoa banena. Imwina, e taku te mataniwi ae mwamwananga: “Ko a ataia ngkai ae ko kona ni bubutii reiakinan te Baibara i aon te Internet. I kona ni kaota aroni karaoan anne n te tai ae tawe ngkai I mena i rarikim.” Ngkana e kariaia kaain te auti ao e a kaota naba aron te reirei ni kamanenaan te boroutia ae te “Rongorongo ae Raoiroi.” Ngkana e aki reke ana tai kaain te auti, e boni karaoa ana babaire ibukini karaoan anne n rokona are imwina. Ngkana e motirawa teutana n te tabo ni moi kobee, e a manga taekina ae aron anne nakon temanna ae tekateka i rarikina. Ko kamanena jw.org n am mwakuri ni minita?