Ti Reiakina Taekan te Atua Mairouia Ana Burabeti
N taai ake ngkoa ao e angania ana burabeti te Atua rongorongo aika kakawaki ibukia te botannaomata. A kona rongorongo aikai ni kaotii nakoira aroni karekeani kakabwaia mairoun te Atua? Eng, a kona. Ti na nori reireiara mairouia burabeti aika teniman aika kakaonimaki aikai.
ABERAAM
E aki inanonano te Atua ao e kani kakabwaiaia aomata nako.
E berita te Atua nakon te burabeti are Aberaam bwa “a na boni bane ni kabwaia utu aika n te aonnaba [rinanona].”—Karikani Bwaai 12:3.
Tera reireiara? E rangi n tangirira te Atua ao e kani kakabwaiaia utu nako aika ongeaba irouna, n aroia mwaane, aine, ao ataei.
MOTE
E nanoanga te Atua ao e kakabwaiaia ake a kakorakoraia ni kani kinaa.
E anga te mwaaka Teuare Moan te Mwaaka nakon te burabeti ae Mote bwa e na karaoi kakai aika korakora. Ma e tataro ni kangai Mote: “Kaotii nakoiu aroarom nako bwa I aonga ni kinako, ao n teimatoa ni karekea akoau i matam.” (Te Otinako 33:13) E kukurei te Atua n ana bubutii Mote ao e kakabwaiaa n anganna te atatai ae bati riki ao te kona n ota ni Kawaina ao n Aroarona. N te katoto, e a ataia Mote ae te tia Karikiriki bon “te Atua ae nanoanga ao e atataiaomata.”—Te Otinako 34:6, 7.
Tera reireiara? E kani kakabwaiaira ni kabane te Atua ngkana ti kakorakoraira ni kani kinaa riki, ngaira aika mwaane, aine, ao ataei. E kaota nakoira aron taromauriana n te Koroboki ae Tabu ao e ingainga ni kan akoira ao ni kakabwaiaira.
IESU
E atataiaomata Iesu ngke e kamarurungia aomata man aorakia ni kabane
Ti kona ni karekei kakabwaia aika akea tokia mairoun te Atua ngkana ti reiakina taekan Iesu ao baike e karaoi ao e angareirei iai.
A bati rongorongoni maiun Iesu ao ana angareirei n Ana Taeka te Atua. E anga te mwaaka te Atua nakon Iesu bwa e na karaoi kakai aika bati aika korakora, n aroni kamarurungaia mataki, bonotaninga, ao mwauku. E kautiia naba aika mate. Mangaia are e kaotii Iesu kakabwaia aika e na uotii te Atua nakoia aomata nako n te tai ae imwaira. E kabwarabwaraa arora n tatabemanira nako ni karekei kakabwaia akanne, ni kangai: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”—Ioane 17:3.
E atataiaomata Iesu, e mwamwannano ao e akoi. A roko ni mwaiti nakoina mwaane, aine, ataei, ao kaara bwa e kangai nakoia ma te tatangira: “Reirei irou bwa I nimamannei ao I nanorinano, ao e na kabebeteaki nanomi iai.” (Mataio 11:29) E kaokoro Iesu ma aomata ake n ana tai ake a iowawa nakoia aine, bwa e akoia aine ao e karineia.
Tera reireiara? E kaota te tangira ae bati Iesu ibukia aomata, ao e katea te katoto ae rianako n arora nakoia tabemwaang.
TIAKI TE ATUA IESU
Ti reireinaki man te Koroboki ae Tabu bwa “bon tii temanna te Atua,” ao Iesu Kristo bon ana tia uataeka ae nanorinano. (1 I-Korinto 8:6) E kamataataa raoi Iesu bwa e kakannato riki te Atua nakoina ao bon te Atua anne are e kanakomaia nakon te aonnaba.—Ioane 11:41, 42; 14:28.a