“Kam na Okirai”

1. Tera ana namakin Iehova ngkana e a manga oki ana tiibu temanna?

N ARON ae ti maroroakinna n te kaongora are mai mwaina, e kabotaua Iehova ma te tia kawakintiibu ae raoiroi ae tabeakinia raoi ana tiibu n tatabemania nako. Ao e ukoukora naba ane e tiotionako. E taku Iehova nakoia tibun Iteraera ake a a tia ni kitanna: “Kam na okirai, ao N na okiringkami.” Ti ataia ae e teimatoa n namakina anne, bwa e taku: “I aki bibitaki.” (Maraki 3:6, 7) E taekinna Iesu bwa e kimwareirei Iehova ma anera ngkana e a manga okiria ana toro temanna are e a tia n tiotionako.​—Ruka 15:10, 32.

2. Tera ae ti na rinanona n te kaongora aei?

² Ti na rinanoi ana kaikonaki Iesu aika tenua aika kaatuuaki iai taekani buokaia naake a tiotionako mairoun Iehova. Ti na maroroakin aroaro tabeua aika ti kainnanoi bwa ti aonga ni buokiia tiibu aika bua bwa a na manga okiria. Ao ti na noria bwa e aera ngkai e materaoi ara kakorakora ni boutokaiia naake a mamaara.

UKOUKORAN TE MWANE AE TE TURAKEMWA AE BUA

3-4. E aera ngkai e kakorakoraa te aine are n Ruka 15:8-10 ni kakaaea ana turakemwa are bua?

³ Ti riai ni kakorakoraira ni kakaaeia naake a kan okira Iehova. N ana kabotau Iesu are koreaki n te Euangkerio ae Ruka, e taekina iai te aine are kakaaea ana bwai ae kakawaki ae bua ae te turakemwa. E kateretereaki n te kaikonaki aei taekan te kakaae anne.​—Wareka Ruka 15:8-10.

⁴ E kabwarabwaraa Iesu ana namakin te aine are kunea ana turakemwa ae kakawaki are bua. N ana bong Iesu, iai tabeman tiina aika I-Iutaia ake a angania natiia aine te turakemwa ae tebwina mwaitina, n aia bong ni mare. Tao te turakemwa are bua, bon teuana i buakon ake tebwina ake e anganaki neienne iroun tinana. E iangoia neiei bwa e bwaka i nanon te auti. Ngaia are e kauraa ana taura ao e kakaaea ma e aki reke. Tao e aki tau ootan ana taura ibukini kakaaean te mwane ae te tirewa ane uarereke anne. N tokina, e a iaakina nanon ana auti ni kabutaa. I buakon te tano are e taeia ao e a wene ana turakemwa ao n teke n ootan ana taura. E oki nanona ngke e kunea! E a weteiia raoraona ao kaain rarikina bwa e na kaongoia te rongorongo ae kakukurei.

5. E aera ngkai e kangaanga ukoukoraia naake a kitana te ekaretia?

⁵ Ti noria n ana kaikonaki Iesu bwa e kainnanoaki te kakorakora ibukini kakaaean te bwai ae bua. N aron anne, ti riai naba ni kakorakoraira n ukoukoriia naake a kitana te ekaretia. Tao a a tia ni bwakanako ririki ni moa man te tai are a katoka iai reitakia ma ngaira. Tao a a tia naba ni mwaing nakon te tabo ae a aki kinaaki iai irouia taari. Ma n te tai aei, a a bae ni kan okira Iehova tabeman i buakoia. A a kani manga beku ibukin Iehova i rarikia kaain aia utu n te onimaki, ma a kainnanoa ara ibuobuoki.

6. A na kangaa kaain te ekaretia ni kabane n uataboa kakaaeaia naake a a katoka aia beku?

⁶ Antai aika kona ni buoka kakaaeaia naake a a katoka aia beku? Boni ngaira ni kabane​—unimwaane, bwaiania, kaain te utu, ao taan uarongorongo, ti kona ni bane n ibuobuoki ni kakaaeia naakai. Iai raoraom ke am koraki ae e a katoka ana beku? Ko a tia ni kaitiboo ma temanna ae e a tia ni katoka ana beku n am tai n uarongorongo man te auti teuana ma teuana, ke n ana tabo te botannaomata? Tuangnga bwa ngkana e kukurei ni kawaraki, ko na anga nambwan ana tareboon ke ana tabo ni maeka nakoia unimwaane.

7. Tera reireiam man ana taeka te unimwaane ae Thomas?

⁷ Baikara aanga aika manena ake a kona ni karaoi unimwaane ibukini kakaaeaia naake a kan okira Iehova? Nora ana taeka te unimwaane ae Thomasb ae maeka i Tibein. E a tia ni buokiia taari aika e raka i aon 40 bwa a na okira te ekaretia. E taku: “Te moan, I titirakinia taari aika kakaokoro ngkana a atai aia tabo ni maeka naake a a katoka aia beku. Ke I titirakinia taan uarongorongo ngkana iai ae a uringnga ae tuai man iririi bobotaki. A rangi ni kan ibuobuoki angia kaain te ekaretia, ibukina bwa a ataia ae a uataboa naba te kakaae. Imwina riki ngkana I kawariia taari ake a a katoka aia beku, I titiraki ibukia natiia ke aia koraki riki tabeman. Tabeman a kakairiia ngkoa natiia nakoni bobotaki, ao tao a a tia n riki natiia aikai bwa taan uarongorongo n te tai teuana. A kona naba ni buokaki bwa a na okira Iehova.”

KAOKIIA NATIN IEHOVA AKE A A TIA NI BUA

8. N te kaikonaki are te nati ae bua are kaotaki n Ruka 15:​17-24, tera aron te tama nakon natina are e a raira nanona?

⁸ Baikara aroaro aika ti kainnanoi ngkana ti na buokiia naake a kan okira Iehova? Nori reireiara tabeua man ana kaikonaki Iesu ae taekan te nati ae bakatae are kitana mwengana. (Wareka Ruka 15:​17-24.) E kabwarabwaraa Iesu aron te nati aei bwa imwina riki ao e a oki ana iango ao e a motikia bwa e nang okira mwengana. E biri tamana ni kawaria ao e rabwatia, ni kaotia nakoina bwa e bon tangiria. E tabeaianga mataniwin nanon te nati aei ao e iangoia bwa e a aki tau n aranaki bwa te nati. Ngke e kaota raoi ana namakin ao e rangi n nanoangaia tamana. Imwina, e a karaoi bwaai tabeua tamana ni kaotia nakon natina aei bwa e butimwaeia nakoni mwengana bwa kaain ana utu ae tangiraki, ma tiaki te tia mwakuri ae kabooaki. Ibukini kakoauaan anne, e karaoa te baka n amwarake te tama aei ao e katauraoi kunnikai aika raraoi ibukin natina are e a raira nanona.

9. Baikara aroaro aika ti kainnanoi bwa ti aonga ni buokiia naake a a katoka aia beku bwa a na okira Iehova? (Nora te bwaoki ae “Aroni Buokaia Naake A Kan Oki.”)

⁹ Bon titeboo Iehova ma te tama are n te kaikonaki anne. E tangiriia taari ake a a katoka aia beku, ao e tangiria bwa a na manga okiria. Ti kona ni buokiia bwa a na manga oki ngkana ti katotonga Iehova. Ti kainnanoa te taotaonakinnano, te atataiaomata, ao te tangira. E aera bwa ti riai ni kaotiotii aroaro akanne, ao n te aro raa?

10. E aera ngkai ti riai ni bwaina te taotaonakinnano ngkana ti buoka temanna bwa e na oki korakoran ana onimaki?

¹⁰ Ti riai ni bwaina te taotaonakinnano ibukina bwa e kainnanoaki te tai ae maan ibukini buokan temanna bwa e na oki korakoran ana onimaki. A bati ake a a tia ni katoka aia beku mai mwaina ake a taekinna bwa a a tibwa oki imwin okiokiraia ae bati irouia unimwaane ao kaain te ekaretia. E korea aei te tari te aine ae Nancy mai Atia Maiakimainiku: “E rangi ni buokai raoraou ni kaan temanna n te ekaretia. E tangirai n aron tangiran tarina ae ikawai riki. E kakarakin taai aika kakukurei n reitakira n taai aika nako. E kakauongo irou ma te taotaonakinnano ngkana I bunra nanou, ao e aki tabwara n anganai te taeka n reirei. Bon te rao ni koaua ae tauraoi n taai nako ni buokai.”

11. E aera bwa ti kainnanoa te atataiaomata ibukini kabebetean ane e rawawata nanona?

¹¹ Te atataiaomata kaanga te bwaa ae kamarurung. E kona ni kabebetea te nano. Tao a a tia tabeman ake a katoka aia beku ni kabokorakora i nanon ririki aika bati ma ribaakin temanna n te ekaretia. Ibukin anne, a aikoa kan okira Iehova. Tao a iangoia tabeman bwa e karaoaki ae aki riai nakoia. A kona ni kainnanoa temanna ae e na ongora irouia ao n ota n aia namakin. (Iak. 1:19) E taku María ae e a tia naba ni katoka ana beku: “I tangira temanna ae e na ongora irou, e na kabebetea nanou, ao e na anganai te taeka n reirei ma te ibuobuoki.”

12. Taekina te katoto ibukin aron ana tangira Iehova ni katikiia ni kaokiia naake a a katoka aia beku.

¹² E kabwarabwaraa te Baibara ana tangira Iehova ibukia ana aomata bwa kaanga te bwai ni kabaebae ke te roobu. N te aro raa? Iangoa te katoto aei: Aongkoa ko a kani bwabwa i taari ao e a kareiko naba temanna n te bwai ni kamaiu. Ko na boni kakaitau ni buokam anne, bwa ko a aki kua n uaua ao n iinako. Ma e aki tau te bwai ni kamaiu anne n tii ngaia. E mwaitorotoro taari, ao ko na bon aki maiu ngkana ko aki toka n te booti ni kamaiu. Ko kainnanoa temanna bwa e na kareiko n te roobu ao ni katikiko nakon te booti ni kamaiu. E taku Iehova ibukia tibun Iteraera ake a tiotionako: “I teimatoa ni kairiia . . . ni bwaai ni kabaebae aika bwain te tangira.” (Otea 11:4) Anne naba ana namakin te Atua ni boong aikai ibukia naake a a katoka aia beku ao n taonakinako n aia kangaanga ao tabeaiangaia. E tangiria bwa a na ataia ae e bon tangiriia ao e kani kaokiia nakoina. Ao e kona Iehova ni kabonganako ibukini kaotiotan ana tangira anne nakoia.

13. Taekina te katoto ae kaota kakawakin te itangitangiri n tari.

¹³ E kakawaki bwa ti na karaui nanoia naake a a katoka aia beku n tuangia bwa e bon tangiriia Iehova ao ti tangiriia naba. E katoka ana beku Pablo are taekinaki n te kaongora are mai mwaina, i nanon 30 tabun te ririki. E taku teuaei: “N te ingabong teuana ngke N nang kitana mwengau, I a kaitiboo naba ma te tari te aine ae e a kara, ao e kataetaeai ma te akoi. I a bon tang n aron te teei ae uarereke. I tuangnga ae taraan ae e boni kanakoaki iroun Iehova bwa e na kataetaeai. I motikia n te tai anne bwa N nang okira Iehova.”

BOUTOKAIIA AIKA MAMAARA

14. Ni kaineti ma te kaikonaki are n Ruka 15:​4, 5, tera are e karaoia te tia kawakintiibu ngke e kunea te tiibu are bua?

¹⁴ A kainnanoa ara boutoka ae teimatoa naake a a katoka aia beku. N aron te nati are bua are n ana kaikonaki Iesu, a kona naba n rawawata nanoia i nanon te tai ae maan. Ao ibukina bwa a mena n ana waaki Tatan, e a mamaara aia onimaki. Ti riai ni buokiia bwa a na manga onimakina Iehova. N te kaikonaki are taekan te tiibu are bua, e kabwarabwaraa Iesu aron te tia kawakintiibu ni katokaa te tiibu i aon angana ao n uouotia ni kaokia nakon te nanai. E a tia teuaei ni kabanea ana tai ao korakorana ni kakaaea te tiibu are bua. Ma e ataia ae e riai n uouotia rikaaki nakon te nanai ibukina bwa ai akea korakorana n oki i bon irouna.​—Wareka Ruka 15:​4, 5.

15. Ti na kangaa ni buokiia aika mamaara ake a a kan okira Iehova? (Nora te bwaoki ae “Te Bwai ni Mwakuri ae Rangi ni Manena.”)

¹⁵ Ti kona naba ni kainnanoa te tai ae bati ao te kakorakora ibukini buokaia naake a a katoka aia beku, bwa a na tokanikai i aoni mamaaraia. Ma ti kona ni buokiia bwa e na manga oki korakoran aia onimaki man ana ibuobuoki taamnein Iehova, ana Taeka, ao booki ake a katauraoaki n te ekaretia. (IRom 15:1) Ti na kangaa ni karaoa anne? E taku te unimwaane ae e a maan ni beku: “Angia naake a katoka aia beku, a kainnanoa te reirei n te Baibara imwin te tai are a baireia iai bwa a kan okira Iehova.”c Ngaia are ngkana ko butiiaki bwa ko na reirei ma temanna ae katoka ana beku, e aera bwa ko aki butimwaea te kakabwaia anne? E taku naba te unimwaane anne: “Te tia uarongorongo are kaira te reirei anne e riai n riki bwa te rao ni koaua, ae e na aki maakinna te aomata are katoka ana beku.”

TE KIMWAREIREI I KARAWA AO I AON TE ABA

16. Ti kangaa n ataia bwa ti na boni buokaki irouia anera?

¹⁶ A bati rongorongo ake a oti iai bwa a boni buokira anera ni kakaaeia naake a katoka aia beku ake a ingainga ni kan okira Iehova. (TeKao. 14:6) N te katoto, e kakorakoraa n tataro Silvio mai Ecuador ibukini buokana n okira te ekaretia. Ngke e tabe n tataro ao e a karebwerebweaki naba ana mataroa. A a tei unimwaane aika uoman i matan ana mataroa. Ni kawarakina anne, a rangi ni kukurei unimwaane akanne n anganna te ibuobuoki are e kainnanoia.

17. Tera kaniwangara mani buokaia naake a mamaara n te onimaki?

¹⁷ Ti na boni karekea te kukurei ae bati ni buokaia naake a mamaara aia onimaki bwa a na okira Iehova. Nora ana taeka Salvador ae te bwaiania ae kakorakoraa ni buokiia naake a katoka aia beku. E taku teuaei: “N tabetai, I a bon tang ibukini kimwareireiu. I rangi ni kukurei n iangoan ae Iehova e kamaiua temanna mai buakoia ana tiibu aika tangiraki man ana waaki Tatan, ao I kakabwaiaaki ngkai I uaia ni mwakuri ma Ngaia.”​—Mwa. 20:35.

18. Tera ae ko kona ni kakoauaa e ngae ngke ko a tia ni katoka am beku?

¹⁸ Ngkana ko a tia ni katoka reitakim ma ana aomata Iehova, ko kona ni kakoauaa ae e teimatoa n tangiriko. E tangiria bwa ko na okiria. Ao ko bon riai ni karaoi mwaneka tabeua. Ma n aron te tama are n ana kaikonaki Iesu, e kariariaa okim Iehova ao e na boni kukurei ni butimwaeiko.