Titiraki Mairouia Taani Wareware
E koaua bwa “uaan te taamnei” bon tii aroaro ake a karinanaki n I-Karatia 5:22, 23?
A kaotaki ni kiibu akanne aroaro ni Kristian aika ruaiwa: “Uaan te taamnei bon te tangira, te kimwareirei, te rau, te taotaonakinnano, te akoi, te raoiroi, te onimaki, te nimamannei, ao te taubaang.” Ma ti aki riai n iangoia bwa tii akanne aroaro aika raraoi ake e kona ni buokira taamnein te Atua ni karikirakei.
Nora te bwai ae e koreia te abotoro Bauro ni kiibu ake mai mwaina: “Ana mwakuri te rabwata [bon] te wene ni bure, te kamwara, te aroaro ae kammaira, taromauriani bouannanti, te tabunea, te kairiribai, te kiriwe, te bakantang, taian un, te ikakaiwi, te iraraure, te iraraure n te Aro, te nanonibwi, te koro ni manging, botaki aika akea te taubaang iai, ao aroaro riki n aron aikai.” (IKar. 5:19-21) E motikia n taeka akanne Bauro ngaia are e a aki kainnanoa taekinan “ana mwakuri te rabwata” ake tabeua n aron ake a kaotaki n I-Korote 3:5. N aron anne, imwini karinanakin aroaro aika ruaiwa aika raraoi ao e taku: “Akea te tua ae ekinako baikai.” Ngaia are e aki taekini Bauro aroaro ni kabane aika raraoi ake ti kona ni karikirakei man ana ibuobuoki te taamnei ae raoiroi.
Ti kona n ota iai ngkana ti kabotaui aroaro akana karinanaki akanne ma te baere e koreia Bauro nakon te ekaretia are i Ebeto: “Uaan te oota bon te raoiroi n aekana nako ao bwainakin te eti ma te koaua.” (IEbe. 5: 8, 9) Eng, e taekinaki “te raoiroi” ao bwainakin te eti ma te koaua i buakon “uaan te oota,” ma boni kanoan naba “uaan te taamnei.”
N aron anne, e kaumaka Timoteo Bauro bwa e na “ukoukora te raoiroi, tangiran te Atua, te onimaki, te tangira, te nanomwaaka, ao te nimamannei,” ae aroaro aika raraoi aika onoua. (1Tim. 6:11) Tii tenua mai buakon aroaro akanne (te onimaki, te tangira, ao te nimamannei) aika taekinaki bwa kanoan “uaan te taamnei.” Ma e boni bae naba Timoteo n tangira ana ibuobuoki te taamnei ibukini karikirakean aroaro ake tabeua are te raoiroi, tangiran te Atua, ao te nanomwaaka.—Kabotaua ma I-Korote 3:12; 2 Betero 1:5-7.
Ngaia are tiaki nanona bwa tii aroaro ni Kristian ake a kaotaki n I-Karatia 5:22, 23 ao ai akea riki. E kona taamnein te Atua ni buokira ni karikirakei aroaro aika ruaiwa ake a taekinaki bwa “uaan te taamnei.” Ma bon iai riki aroaro aika riai ni karikirakeaki bwa ti aonga n riki bwa Kristian aika ikawai n te onimaki, ao ni “karina te aroaro ae boou ae karaoaki ni kaineti ma nanon te Atua ao e boraoi ma te itiaki ni koaua ao te kakaonimaki ni koaua.”—IEbe. 4:24.