E na Roko n Ningai te Toki? Te Bwai ae E Taekinna Iesu

IANGOI BAIKA UOUA AKE E TAEKIN IESU NI KAINETI MA TE TOKI:

“Mangaia ae teimatoa n tantani, bwa kam bon aki ataa te bong ma te aoa.”​—MATAIO 25:13.

“Teimatoa n taratara, teimatoa n tantani, bwa kam aki ataa te tai ae e a tia ni baireia te Atua.”​—MAREKO 13:33.

Ngaia are akea n te aonnaba aei ae ataa raoi te tai are e na roko iai n tokina te waaki ae ngkai i aon te aba, ma e ngae n anne, ao te Atua e namata “te tai ae e a tia ni baireia” ae kakoauaaki raoi iai “te bong ma te aoa” ibukin rokon te toki. (Mataio 24:36) Nanon aei bwa ai akea riki te anga ae ti na ataia iai bwa e a kaan te toki? Tiaki ngaia anne. E tuangia taan rimwina Iesu bwa a na ukoukori bwaai ake a a tia n riki tabeua are e na oti iai bwa e a kaan te toki.

TE KANIKINA

Baika karinanaki aikai boni kanikinaean “tain tokin te waaki ae ngkai i aon te aba.” E taku Iesu: “E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana, ao a na roko roongo ma mwaeiein te aba n te tabo teuana ma teuana.” (Mataio 24:​3, 7) E taku naba bwa a na kaoti “aoraki aika kamamate” ao aoraki aika butinako n te aonnaba. (Ruka 21:11) Ko a tabe n nori ngkai bwaai aika e taetae ni burabetini Iesu aikai?

A karawawataaki aomata ni boong aikai ibukini buaka, roongo, taiani mwaeiei ao te aoraki teuana imwin teuana. N te katoto, n 2004 ao e riki te mwaeiei ae rangi ni korakora ni Marawan Inria ike e a riki mai iai te tunami ae kamateia 225,000 tabun aomata. I nanon tenua te ririki ao a a tia ni mate 6.9 te mirion aomata man te aoraki ae butinako n te aonnaba ae te COVID-19. E taku Iesu bwa bwaai aika riki aikai, e kaotia bwa e a kaan tokin te waaki ae ngkai i aon te aba.

“KABANEANI BOONG”

E kabwarabwaraa te Baibara te tai are imwain raoi te toki bwa “kabaneani boong.” (2 Betero 3:​3, 4) N te kauoua n Timoteo 3:​1-5, ao e na kanikinaeaki kabaneani boong ni waekoani kerikaakini kakaraoan ae raoiroi. (Nora te bwaoki ae “Imwain Raoi Tokin te Aonnaba.”) Ko noriia aomata aika bangaomata, a nanonrang, a iowawa, ao n aki kaokaota te tangira i marenaia ni boong aikai? Aio naba te kanikina ae kaotia bwa ti a maeka ngkai n te tai ae e a rangi ni kaan iai tokin te aonnaba.

E na maanra kabaneani boong? Ni kaineti ma te Baibara ao ‘e a kimototo te tai.’ Imwina ao te Atua e nang kamaunaia “te koraki ake a urua te aonnaba.”​—Te Kaotioti 11:​15-18, kbn; 12:12.

E A KAAN TE AONNABA AE TE BWARETAITI!

E a kaman tia n namata te bong ao te aoa te Atua are e na karokoa iai tokin te waaki ae ngkai i aon te aba. (Mataio 24:36) Ma e ngae n anne, bon iai riki naba te rongorongo ae kakukurei. “E aki tangira kamaunaan temanna” te Atua. (2 Betero 3:9) Mangaia are e anganira ara tai ae ti na kona n reiakina iai ana kantaninga ao n ongeaba irouna. Bukin tera? Ibukina bwa e tangirira bwa ti na maiu ngkana e a roko tokin te aonnaba aei ao ni maeka n ana aonnaba ae boou ngkana e a riki te aonnaba aei bwa te bwaretaiti.

E a tia naba te Atua ni bairea te angareirei ni kabutaa te aonnaba ike e na buokiia iai aomata bwa a aonga ni kona n reiakina taekan ae a na riki bwa kaain te aonnaba ae boou i aan ana Tautaeka n Uea. E taku Iesu bwa e na bon uarongorongoaki te rongorongo ae raoiroi ibukin Ana Tautaeka n Uea te Atua “n te aonnaba ni kabutaa.” (Mataio 24:14) A kabanei aoa aika birion ma birion Ana Tia Kakoaua Iehova ni katobibia te aonnaba n uarongorongo ao n angareirei i aon te kantaninga are taekinaki n te Baibara. E taku Iesu bwa e na waakinaki te uarongorongo aio ni kabutaa te aonnaba imwain rokon te toki.

E a rangi ni kaan roko n tokina aia kairiri aomata. Ma te rongorongo ae kakukurei iai bwa ko boni kona ni kamaiuaki n tokin te aonnaba aei ao n riki bwa kaain te aonnaba ae te Bwaretaiti are e beritanna te Atua. E na maroroakinaki n te kaongora ae imwina arom ni kona ni maiu n te aonnaba ane boou anne.