Kaekaan Titiraki Aika Aua Ibukin te Toki

E TAETAE ni burabetinna Iesu Kristo bwa ‘e na roko te toki’ n taai aika a na roko. E kabwarabwaraa te tai anne ni kangai: “E na roko te rawawata ae korakora ae tuai ni kaoti mangke e moani karikaki te aonnaba ni karokoa ngkai, ao e na aki manga kaoti rimwi.”​—Mataio 24:14, 21.

A ueke titiraki tabeua aika kakawaki man ana taeka Iesu ibukin te toki, n ikotaki ma rongorongo riki tabeua aika taekinaki n te Baibara ni kaineti ma aio. E aera ko aki kauka am Baibara ni wareki kaekaan titiraki akanne?

1 Tera ae Nang Toki?

E aki reiakinaki n te Baibara bwa e na kamaunaaki te aonnaba. E korea ae kangai te tia areru: E “kawene aonaba i aoni bouana [te Atua], Ba a aonga n aki mwemwe n aki totoki.” (Taian Areru 104:5, BG) E aki reiakinaki naba n te Baibara bwa a na kamaunaaki baika maiu ni kabane n te ai ae uramwaaka ni katobibia te aonnaba. (Itaia 45:18) E taekinna Iesu bwa iai aomata tabeman aika a na kamaiuaki n tain te toki. (Mataio 24:21, 22) Tera ngkanne ae nang toki ae taekinaki n te Baibara?

E nang toki aia tautaeka aomata aika kabwaka. E kairaki te burabeti ae Taniera iroun te Atua bwa e na korea ae kangai: “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.”​—Taniera 2:44, BG.

E nang toki te buaka ao kabarekaan te ea. E kabwarabwaraaki n Taian Areru 46:9 (BG) te bae e nang karaoia te Atua: “E katoki buaka, ao tokina tabon aonaba; E otea te kainikatebe, ao E koroua te kai ni buaka; E kabuoki kaa-ni-buaka n te ai.” E reiakinaki n te Baibara ae te Atua e nang ‘kamaunaia te koraki ake a urua te aonnaba.’​—Te Kaotioti 11:18.

E nang toki te mwakuri n iowawa ao te ribuaka. E beritanaki n Ana Taeka te Atua bwa, “a na maekana aon te aba akana raoiroi, Ao a na tiku i aona akana moa n raoiroi. Ma a na teweaki nako akana buakaka mai aon te aba, Ao a na taekaki taani bure mai nanona.”​—Taeka N Rabakau 2:21, 22, BG.

2 E na Roko n Ningai te Toki?

E a tia Iehova ae te Atua ni bairea ‘te tai ae motikaki’ ibukini katokan te waaki ae buakaka ao katean ana Tautaeka n Uea. (Mareko 13:33) Ma e kamatataaki n te Baibara bwa ti aki kona n ataa te tai raoi ae na roko iai te toki. E taku Iesu: “Akea ae ataa te bong ma te aoa anne, a aki ataia anerani karawa ao e aki ataia naba te Nati, ma tii te Tama.” (Mataio 24:36) Ma e ngae n anne, a a kaman taekini baika a na riki n te aonnaba Iesu ma taan rimwina, imwain raoi karokoan te toki iroun te Atua. E a uakaan rokon te toki ngkana a a riki baikai ni kabane n te tai ae tii teuana ni katobibia te aonnaba.

E korakora te bitaki ae tuai nonoraki mangkoa nakon ana waaki te Tautaeka, te otabwanin ao te aroaro ni maiu. E taku Iesu ni kaekaan aia titiraki taan rimwina ibukin te toki: “E na teirake te botannaomata teuana ni buakana te botannaomata teuana, ao te tautaeka teuana ni buakana te tautaeka teuana, ao a na roko roongo ma mwaeiein te aba n te tabo teuana ma teuana. Baikai boni moan rikini kangaanga, kaanga ai aron te ariri imwain te bung.” (Mareko 13:8) E korea ae kangai te abotoro Bauro: “A na roko taai aika okoro aika karuanikai, ni kabaneani boong. Bwa ane a nang riki aomata bwa taan tangiriia i bon irouia, taani bakimwane, taani kamoamoa, taan nanorieta, taan taetae ni kabuakaka, taan aki ongeaba irouia aia karo, taani bangaomata, taan aki kakaonimaki nakoia raoia, taan aki tatangira, taani kakanneti, taan uarao, taan aki taubaang, taan iowawa, taan riribaa te raoiroi, taani kamwamwane, taan aki kani bwerengaki, taani kainikatonga, taan tangira riki kakukurein te rabwata nakon tangiran te Atua, ao a baka n tangira te Atua ma a kabwaka ni maiuakina tangirana.”​—2 Timoteo 3:1-5.

E a waaki te mwakuri n uarongorongo ni katobibia te aonnaba n taetae aika bati. E taku Iesu: “E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.”​—Mataio 24:14.

3 Tera ae na Riki Imwin te Toki?

E aki reiakinaki n te Baibara bwa a na bane aomata aika raoiroi n anaaki mai aon te aba, bwa a na maeka n aki toki i karawa. Ma e reirei Iesu bwa e na boni koro bukin ana moani kantaninga te Atua ibukin te botannaomata. E taku Iesu: “A a kukurei akana nimamannei bwa a na bwaibwai n te aonnaba.” (Mataio 5:5; 6:9, 10) E beritanaki n te Baibara bwa a na kautaki te koraki ake a mate imwain te toki. (Iobi 14:14, 15; Ioane 5:28, 29) Tera ae na riki imwin te toki?

E na tautaeka mai karawa Iesu bwa te Uea n Ana Tautaeka n Uea te Atua. E korea ae kangai te burabeti are Taniera: “I mataku ni mii ni burabeti e bong, ao noria, e roko temanna ma nangini karawa, ae ai aron natin te aomata [ae Iesu are e a tia ni kautaki], ao e kawara Teuare iai ma ngkoangkoa [ae Iehova ae te Atua], ao a kairia nako matana ni kaania. Ao e anganaki [Iesu] te tautaeka, ma te neboaki, ma ueana, ba a aonga ni bane natanaomata, ma botanaomata, ma taian taetae, n toro i rouna: ana tau-taeka bon te tautaeka ae akea tokina, ae na aki nako, ao ueana bon ae na aki kamaunaki.”​—Taniera 7:13, 14, BG; Ruka 1:31, 32; Ioane 3:13-16.

A na karekea te marurung ae kororaoi, mweraoia ae teimatoa ao te maiu ae aki toki, aomata aika a aantaeka nakon Ana Tautaeka n Uea te Atua. E korea ae kangai te burabeti are Itaia: “A na katei auti, ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna.” (Itaia 65:21-23, BG) E korea ae kangai te abotoro Ioane ibukin te tai anne: “Noria! E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—Te Kaotioti 21:3, 4.

4 Tera ae Ko Riai ni Karaoia Bwa Ko Aonga ni Kamaiuaki n Tain te Toki?

E kakoauaa te abotoro Betero bwa tabeman mai buakoia aomata aika maiu i nanon tain te toki, a na kakanikoa te iango ni kaineti ma kaetan ana waaki te botannaomata iroun te Atua ao katokan te buakaka i aon te aba. (2 Betero 3:3, 4) Ma e ngae n anne, e kaumakiia aika maiu n ara bong aikai Betero bwa a riai ni karaoi baikai.

Reirei man rongorongon rimoa. E korea ae kangai Betero: “E aki taona naba nanona [te Atua] ngke e katuuaaeia kaain te aonnaba rimoa, ma e kawakina Noa are te tia uarongorongoa taekan te raoiroi, ni kamaiua ma raona ake itiman ngke e karokoa te ieka irouia kaain te aonnaba ake a aki karinea te Atua.” (2 Betero 2:5) Ma e taku Betero ibukia te koraki ake a kakaniko: “Ibukin nanoia n aki kan ataia, ao e raba nakoia bwa n aron ana taeka te Atua, ao iai karawa ma ngkoangkoa ao iai naba te aonnaba ae matoatoa ae otirake man te ran ao e katobibiaki naba n te ran, are a kamaunaaki iai kaain te aonnaba n te tai arei ngke e iekaki n te ran. Ma e kawakinaki karawa ma te aonnabaa ae ngkai ibukin te ai, n te taeka naba anne, ao a kawakinaki ni karokoa te bong ni motikitaeka ao bongini kamaunaaia aomata ake a aki karinea te Atua.”​—2 Betero 3:5-7.

Maiuakina ana kaetieti te Atua ibukin te aroaro ni maiu ae riai. E korea ae kangai Betero bwa te koraki ake a kani kamaiuaki n tain te toki, a riai n ‘riki bwa aomata aika itiaki n aroaroni maiuia ao ni karaoi mwakuri ibukin tangiran te Atua.’ (2 Betero 3:11) Noria, bwa e katuruturua te ‘itiaki n te aroaro ni maiu’ Betero ao “mwakuri ibukin tangiran te Atua.” Mangaia are, e bati riki ae irekereke ni karekean am iraorao ma te Atua nakon ae tii taekinan ae iai am onimaki, ke karaoan am kabanea ni kona n te kabanea ni miniti ni maium.

Baikara aroaro ao mwakuri aika okoro aika butimwaeaki iroun te Atua? E aera ko aki kabotaui baika ko atai ma ae reiakinaki n te Baibara i aon te rerei aei? A na boni kukurei Ana Tia Kakoaua Iehova ni buokiko. Tuangia bwa a na kaotii koauan aia kaeka man am Baibara. Ni karaoan anne ko na buokaki iai ni kaaitarai kanoan taai aika a na roko ma te ninikoria ao te aki nanououa, n aki ongei baika otabwaninira aika karika te maaku.

[Kabwarabwara ae nano]

[Kabwarabwaraan n iteraniba 7]

Akea tokin te aonnaba, ma tii te koraki ake a urua