Tera Ana Tautaeka n Uea te Atua?

“Te rongorongo ae raoiroi aei ae taekan te tautaeka n uea . . .”​—MATAIO 24:14.

NGKE e anga ana Kabwarabwara i aon te Maunga ae tanoata taekana Iesu, e taekina iai te tataro ni katoto ae irianaki n te bubutii aei: “E bia roko am tautaeka n uea.” A a tia ni kamatenanoa te tataro anne mirion ma mirion aomata ao ni kakamanena n angiin te tai. E taekinaki n te encyclopedia teuana bwa bon “te tataro ae rangi ni kakawaki ae a aki toki ni kakamanena Kristian ni kabane n aia taromauri.” Ma a bati ake a kamatenanoa ma a aki ataia bwa tera te Tautaeka n Uea ke tera ae e na karaoia n rokona.​—Mataio 6:9, 10.

E aki kamimi anne. A a manga boni kauntaba, a mangaongao ao a aki mataata raoi aia kabwarabwara mataniwi n Aaro ake aongkoa Kristian ngaiia ibukin te Tautaeka n Uea. E koreia temanna bwa Ana Tautaeka n Uea te Atua bon “te mwaaka ae riaon aia kona aomata, . . . ao a reitaki i nanoia ma te Atua ae maiu . . . , n te atatai ibukin te Atua are a karekea iai kamaiuaia mwaane ao aine.” E kabwarabwaraa temanna riki bwa te euangkerio ibukin te Tautaeka n Uea bon te “kairiri ibukin te Aro.” Ao e taekinaki naba ae kangai n te Catechism of the Catholic Church: “Ana tautaeka n uea te Atua [bon] te raoiroi ao te rau ao te kimwareirei i nanon te Taamnei ae Raoiroi.”

Ko na nora te kabwarabwara ae mataata riki n iteraniba 2 n te maekatin aei. Ti wareka iai ae kangai: “Ana Tautaeka n Uea te Atua bon te tautaeka ni koaua i karawa, are e na kamaunaia aomata aika buakaka ao imwina e na bita te aonnaba aei nakon te bwaretaiti.” Ti na nora boutokaan te atatai aei n te Baibara.

Taan Tautaekana te Aonnaba ni Kabane n Taai Aika Imwaira

Te tautaeka n uea bon te tautaeka ae kairaki iroun te uea. Te Uea n Ana Tautaeka n Uea te Atua bon Iesu Kristo are e kautaki. E kabwarabwaraaki kaueaana i karawa n te miitara are e anganaki te burabeti ae Taniera are e korea ae kangai: “I mataku ni mii ni burabeti e bong, ao noria, e roko temanna ma nangini karawa, ae ai aron natin te aomata [are Iesu], ao e kawara Teuare iai ma ngkoangkoa [are Iehova ae te Atua], ao a kairia nako matana ni kaania. Ao e anganaki te tautaeka, ma te neboaki, ma ueana, ba a aonga ni bane natanaomata, ma botanaomata, ma taian taetae, n toro i rouna: ana tau-taeka bon te tautaeka ae akea tokina, ae na aki nako, ao ueana bon ae na aki kamaunaki.”​—Taniera 7:13, 14, BG.

E kaotaki naba n te boki ae Taniera bwa e kamatoaaki ni kateaki te Tautaeka n Uea anne iroun te Atua, ao e na kamaunai aia tautaeka aomata ni kabane, ao akea ae e na kabwakaa. Ni mwakoro 2, e kabwarabwaraaki iai miin ueani Baburon mairoun te Atua, ike e a nora iai te boua ae abwabwaki ae e tei ibukin tautaeka aika korakora aika teirake teuana imwin teuana. E kabwaraa nanon te mii anne te burabeti are Taniera. E korea ae kangai: Ni “boong aika kaitira,” ao “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na teimatoa n aki toki.”​—Taniera 2:28, 44, BG.

E aki tautaeka n tii ngaia te Uea are n Ana Tautaeka n Uea te Atua. Ni karaoan ana mwakuri ni minita Iesu i aon te aba, e karau nanoia ana abotoro ake a kakaonimaki bwa a na kautaki nako karawa ma tabeman riki, ao n tekateka i aoni kaintokanuea. (Ruka 22:28-30) E aki nanoni kaintokanuea ni koaua bwa e kaotia Iesu ae e na mena te Tautaeka n Uea i karawa. A kabwarabwaraaki n te Baibara raona n uea aikai bwa a roko mani “baronga nako ma taetae ma taian natannaomata ma botannaomata.” A na riki bwa “te tautaeka n uea ao ibonga ibukin Atuara, ao a na kairiri bwa ueea n tautaekana te aonnaba.”​—Te Kaotioti 5:9, 10.

Bukin Raoiroin Rongorongon te Tautaeka n Uea

Noria bwa e anganaki Kristo Iesu te tautaeka i aoia “natanaomata, ma botanaomata, ma taian taetae” ao a na “kairiri bwa ueea n tautaekana te aonnaba” raona ake e na tautaeka ma ngaiia. Antai ngkanne aika a na tautaekanaki n te Tautaeka n Uea aei? Bon te koraki ake a butimwaea te rongorongo ae raoiroi are e tataekinaki ni boong aikai. A raonia naba nakanne te koraki ake a na kautaki nakon te maiu i aon te aba ake a kantaningaa te maiu are aki toki.

A kabwarabwaraaki n te aro ae e anainano n te Baibara kakabwaia ake a na karekei aomata i aan te Tautaeka n Uea. Aikai tabeua mai buakoia:

“E katoki buaka, ao tokina tabon aonaba; E otea te kainikatebe, ao E koroua te kai ni buaka; E kabuoki kaa-ni-buaka n te ai.”​—Taian Areru 46:9, BG.

“A na katei auti, ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna.”​—Itaia 65:21, 22, BG.

“E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—Te Kaotioti 21:3, 4.

“A na kaureaki iai mataia akana mataki, ao a na kaukaki taningaia akana a bono taningaia. Ane e na ewewe iai te mauku n ai aron te ria, ao e na anene ni kimareirei newen ane e bae newena.”​—Itaia 35:5, 6, BG.

“E na roko te tai are a na bane iai n ongo [bwanaan Iesu] aomata ake a mena i nanon taian ruanimate ao a na otinako, te koraki ake a karaoi baika raraoi nakon te mangauti are te maiu.”​—Ioane 5:28, 29.

“A na abana te aba akana nimamanei; ao a na kukurei ni kabatian te raoi.”​—Taian Areru 37:11, BG.

Bon te rongorongo ae raoiroi anne! Irarikin anne, e kaotaki ni kakororaoan taetae ni burabeti aika n te Baibara bwa e a kaan te tai are e na kaotiota iai ana kairiri ae raoiroi te Tautaeka n Uea i aon te aonnaba ni kabane.