“Te Toki” Tera ae Nanonaki Iai?

Tera ae ko iangoia ngkana ko ongo taeka aikai: “E a kaan te toki”? Ko iangoa te aomata ae roko nanona ni kabwarabwara mai moa ae taua te Baibara ao ni kateitea kain ana kabwarabwara? Ke ko iangoa te unimwaane ae buai ae e tei irarikin te kawai, e kunnikainna n ae mwarairai ma kabaean nukana ae te roobu ao e taua te kanikina ae koreaki iai rongorongon te toki? E kona ni katabeaiangaia aomata iaiangoani baikai ao tabeman, a aki kakoauai ke a mimi iai.

E taekinaki ae kangai n te Baibara: ‘E na roko te toki.’ (Mataio 24:14) E aranaki te bong anne bwa “te bong ae kakannato ae ana bong te Atua” ao “Aremaketon.” (Te Kaotioti 16:14, 16) Ni koauana, e mwaiti te mangaongao irouia Aaro ni kaineti ma te reirei aei, e aki ota ao a a bati iango aika aki raraoi iai. Ma e ngae n anne, e kateretereaki raoi n te Baibara taekan te toki bwa tera ae nanonaki iai ao ae e aki nanonaki iai. E buokira Ana Taeka te Atua bwa ti na ataia raoi ae e a kaan te toki ke e tuai. Ao ae kakawaki riki, ti reiakinaki iai arora ni kamaiuaki! Ma ti na kaetii moa iango aika kairua ao ni kakaaea raoi ae nanonaki iai. Tera raoi ae nanonaki n “te toki” ae taekinaki n te Baibara?

TE BAE E AKI NANONAKI N TE TOKI

1. KAMAUNAAN TE AONNABA N TE AI AE URAMWAAKA.

   E koreaki ae kangai n te Baibara: “[E] kawene aonaba [te Atua] i aoni bouana, Ba a aonga n aki mwemwe n aki totoki.” (Taian Areru 104:5, BG) E karaui nanora te kibu anne ao kiibu riki tabeua, bwa e na bon aki kamauna te aonnaba te Atua ao e na aki naba kariaia kamaunaana—Te Minita 1:4; Itaia 45:18.

2. TE KABUANIBWAI AE E AKI BAIREAKI ROKONA.

   E kaotaki n te Baibara bwa e boni baireaki rokon te toki bwa e a tia te Atua n namata te tai ae na roko iai. Ti wareka ae kangai: “Akea ae ataa te bong ke te aoa anne, a aki ataia anerani karawa ao e aki ataia naba te Nati, ma tii te Tama. Teimatoa n taratara, teimatoa n tantani, bwa kam aki ataa te tai ae e a tia ni motikia te Atua.” (Mareko 13:32, 33) E teretere iai bwa e a tia te Atua (ae “te Tama”) ni bairea rokon te toki n “te tai ae e a tia ni motikia.”

3. E AKI RIKI MAIROUIA AOMATA KE MANI BWAKANI BWAAI MAI TINANIKUN TE AONNABA.

   Tera ae na riki n te toki? E taekinaki ae kangai n Te Kaotioti 19:11: “Ao I nora karawa bwa e uki, ao akea bwa I a nora te aoti ae mainaina. Ao aran teuare toka i aona, Kakaonimaki ao Koaua.” E a manga reitaki ni kangai ni kibuna 19: “Ao I nora te man are tiritiri ma uean aonnaba ma aia taanga ni buaka, aika ikotaki bwa a na buakana teuare toka i aon te aoti ma ana taanga ni buaka.” (Te Kaotioti 19:11-21) E ngae ngke angiin taeka aikai bon taiani kaikonaki, ma ti ataia bwa e na boni kanakoa te taanga ni buaka n anera te Atua ni kamaunaia taan riribaia.

TE BAE E NANONAKI N TE TOKI

1. TOKIN AIA TAUTAEKA AOMATA AIKA KABWAKA.

   E kabwarabwaraaki ae kangai n te Baibara: “N aia tai tan tautaeka akanne ao e na kateirakea te tautaeka teuana Atuani karawa. E na bon aki uruaki te tautaeka anne, ma e na kamaunai tautaeka akekei ni kabane, ao e na teimatoa ngaia n aki toki.” (Taniera 2:44, BK) N aron ae e oti mai mwaina n te katenua n iango, a na boni kamaunaaki “uean aonnaba ma aia taanga ni buaka” ake a na “ikotaki bwa a na buakana teuare toka i aon te aoti ma ana taanga ni buaka.”—Te Kaotioti 19:19.

2. TOKIN TE BUAKA, TE IOWAWA AO TE RIBUAKA.

   “E katoki buaka [te Atua], ao tokina tabon aonaba.” (Taian Areru 46:9, BG) “A na maekana aon te aba akana raoiroi, Ao a na tiku i aona akana moa n raoiroi. Ma a na teweaki nako akana buakaka mai aon te aba, Ao a na taekaki taani bure mai nanona.” (Taeka N Rabakau 2:21, 22, BG) “Noria! I a kabooui bwaai ni kabane.”—Te Kaotioti 21:4, 5.

3. TOKIA AARO AIKA KEWEA TE ATUA AO BOTANNAOMATA.

   “A taetae ni burabeti ni kewekewe burabeti, ao a tautaeka ibonga ni baiia; . . . ao tera ae kam na karaoia n tokina [ke ‘n rokon te toki,’ NW]?” (Ieremia 5:31, BG) “Ane a na kangai aomata aika bati nakoiu n te bong arei, ‘Te Uea, te Uea, tiaki ti taetae ni burabeti n aram, ma ni kanakoia taimonio n aram, ao ni karaoi kakai aika bati n aram?’ Ao ngai N na kangai nakoia: I bon aki kinaingkami naba teutana! Naako mairou, ngkami aika taani kakaraoa ae buakaka.”—Mataio 7:21-23.

4. TOKIIA AOMATA AIKA KATEIMATOA TE WAAKI N TE AONNABA NGKAI AO NI BOUTOKAIA.

   E taku Iesu Kristo: “Ao aei bukin te kabuakaka, bwa e a roko te oota i buakoia kaain te aonnaba, ma a tangira riki te rotongitong aomata nakon te oota, bwa a bubuaka aia mwakuri.” (Ioane 3:19) E kabwarabwaraaki n te Baibara kamaunaaia kaain te aonnaba n te moantai n ana tai te mwaane ae kakaonimaki are Noa. “A kamaunaaki iai kaain te aonnaba n te tai arei ngke e iekaki n te ran. Ma e kawakinaki karawa ma te aonnaba ae ngkai ibukin te ai, n te taeka naba anne, ao a kawakinaki ni karokoa te bong ni motikitaeka ao bongini kamaunaaia aomata ake a aki karinea te Atua.”—2 Betero 3: 5-7.

Uringnga are e kabotauaki rokon “te bong ni motikitaeka” ma kamaunaan “te aonnaba” n ana tai Noa. Tera te aonnaba ae na kamaunaaki? E teimatoa n tiku ara buraneti ma bon “aomata ake a aki karinea te Atua” ma n ribaa te Atua aika a na “kamaunaaki.” N rokon ana “bong ni motikitaeka” te Atua, a na kamaunaaki te koraki ake a rineia bwa a na riki bwa taan riribaa te Atua. Ma a na kamaiuaki raoraon te Atua n aron Noa ao ana utu.—Mataio 24:37-42.

Iangoa aron tamaroan te aonnaba aei imwini kamaunaan te waaki ae buakaka! E teretere iai bwa e boni kakukurei te rongorongo man te Baibara ibukin te toki ma e aki kananokawaki. Ma e ngae n anne, ko bae n iango ni kangai: ‘Te koaua bwa e kaotaki nakoira n te Baibara te tai ae na roko iai te toki? E koaua bwa e a kaan? N na kangaa ni kamaiuaki mai iai?’