E na Toki te Aonnaba Aei?

Tera ae E na Aki Toki?

AOMATA

E taku te Baibara: “E aki [karaoa te aonnaba te Atua] bwa e na matebuaka, ma e karaoia bwa e na maekanaki.” ​—ITAIA 45:18.

TE BURANETI AE TE AONNABA

E taku te Baibara: “E nako te rorona ao e a manga roko te rorona, ma e teimatoa n aki toki te aonnaba.” ​—TE MINITA 1:4.

AE NANONAKI IAI: N aron ae taekinaki n te Baibara, e na bon aki kamaunaaki te aonnaba ao e na teimatoa ni maekanaki. Mangaia are tera ae nanonaki n tokin te aonnaba?

IANGOA AEI: E kabotaua te Baibara tokin te aonnaba ae imwaira aei ma te bwai are riki n ana bong Noa. N te tai anne ao e onrake te aonnaba ‘n te iowawa.’ (Karikani Bwaai 6:13) Ma e ngae n anne, e bon raoiroi Noa. Ngaia are e kamaiua Noa ma ana utu te Atua, ma e kamaunaia aomata aika buakaka n te ieka. E taekina ae kangai te Baibara ni kaineti ma baike a riki n te tai arei: “A kamaunaaki iai kaain te aonnaba n te tai arei ngke e iekaki n te ran.” (2 Betero 3:6) Anne ngkanne tokin te aonnaba n te tai arei. Ma tera ae kamaunaaki? Tiaki te aonnaba, ma bon aomata aika buakaka aika mena n te aonnaba. Ngaia are ngkana e taekina tokin te aonnaba te Baibara, e aki nanona kamaunaan te buraneti aei ma e bon taekina kamaunaaia aomata aika buakaka aika n te aonnaba aei ao aika mena n te waaki ae ngkai.

Tera ae E na Toki?

KANGAANGA AO TE BUAKAKA

E taku te Baibara: “Ai tii teutana riki ao a nang akea aomata aika buakaka, ko na tarataraa aia tabo ao a na akea iai. Ma a na abana te aonnaba akana nimamannei, ao e na korakora kimwareireia n te rau ae bati.”​—TAIAN ARERU 37:​10, 11.

AE NANONAKI IAI: E aki kamaunanakoa te buakaka n aki toki te ieka are n ana bong Noa. Imwin te Ieka a a manga karawawataaki naba maiuia aomata irouia aomata aika buakaka. Ma n te tai ae waekoa ao e nang katoka te buakaka te Atua. N aron ae taekinna te tia Areru: “A nang akea aomata aika buakaka.” E nang kamauna te buakaka te Atua rinanon Ana Tautaeka n Uea ae te tautaeka mai karawa ae e na tautaekania aomata aika raoiroi n te aonnaba.

IANGOA AEI: A na butimwaea ana kairiri Ana Tautaeka n Uea te Atua naake a tautaekana te aonnaba ngkai? E kaotia te Baibara bwa a na aki. A nanobaba bwa a na boni kaitaraa Ana Tautaeka n Uea te Atua. (Taian Areru 2:2) Tera mwina? E na bon onei mwin aia tautaeka aomata Ana Tautaeka n Uea te Atua ao “e na teimatoa n aki toki.” (Taniera 2:44) Ma e aera ngkai e riai ni katokaki aia kairiri aomata?

TE BAE TANGIRAKI​—Tokin Aia Kairiri Aomata

E taku te Baibara: “Ao tiaki naba ana bwai te aomata kairani maiuna.”​—IEREMIA 10:23.

AE NANONAKI IAI: A aki karikaki aomata bwa a na kairiia i bon irouia. E aki kona n nakoraoi aia mwakuri n tautaekania raoia n aomata ao ni katoki aia kangaanga.

IANGOA AEI: E taekinna te Britannica Academic bwa a taraa n ae a aki kona “ni katoki kangaanga ni katobibia te aonnaba tautaeka n aron te maiu ni kainnano, te baki, te aoraki, kabuanibwai aika karina, ao te buaka ke iowawa riki tabeua.” E reitia ni kangai: “A kakoauaa . . . tabeman bwa ai bon reken te tautaeka ae tii teuana ibukin te aonnaba ae bwanin, ao a a kona naba ni katokaki kangaanga nako.” Ma e ngae n anne, e ngae ngkana a a katiteuanaaki aia tautaeka nako aomata ma a na bon teimatoa naba ni kairiri iai aomata aika aki kororaoi aika bon aki kona ni katoki kangaanga ake a taekinaki i eta. Bon tii Ana Tautaeka n Uea te Atua ae iai mwaakana ni kona ni katoki raoi kangaanga n te aonnaba aei ni kabutaa.

Ngaia are ni kaineti ma te Baibara, tokin te aonnaba aei ae taekan te waaki ae ngkai i aon te aba, bon tiaki te bwai ae a na riai ni maakua aomata aika raoiroi. Ma bon te rongorongo ae kakukurei ibukina bwa e nang kamaunaaki te aonnaba ae e a mane aei, ao n oneaki mwina n ana aonnaba ae boou ae kamimi te Atua!

E na riki aei n ningai? N te kaongora ae imwina ao e na kabwarabwaraaki iai ana kaeka te Baibara.