Ti Beku Iroun te Atua ae “Moan te Nanoanga”

1. Tera ae kona n rio n ara iango ngkana ti iangoa te aomata ae nanoanga?

NGKANA ti iangoa te aomata ae nanoanga, e kona n rio n ara iango te aomata ae akoi, e mwamwannano, e atataiaomata, ao e tituaraoi. Ti kona n iangoa naba ana karaki Iesu are taekan te rao ae te I-Tamaria. E “karaoa te mwakuri n nanoanga” te mwaane ae te ianena aei, nakon te I-Iutaia are kamwaruaaki. E ‘korakora nanoangaan’ te I-Iutaia ae ikoaki aei irouna, ao e kaota te tangira n tabeakinna. (Ruka 10:​29-37) E kaotaki aroaron Iehova ae tamaroa n te kaikonaki aei, ae te nanoanga. E nanoanga te Atua ibukina bwa e tangirira, ao e kaotiota aroarona anne nakoira ni katoabong.

2. Tera riki te anga teuana ae kona ni kaotaki iai te nanoanga?

² Ma iai riki te anga teuana ae kona ni kaotaki iai te nanoanga. Te aomata ae nanoanga, e kona ni baireia bwa e na aki katuuaaea temanna ngkana iai bukina ae riai. E nanoangaira naba Iehova n aron anne. E taku te tia areru: “E aki karaoa nakoira ae e kaineti ma ara bure.” (TaiAre. 103:10) Ma n tabetai, e kona Iehova n anga te reirei ni kaetieti ae matoatoa nakon te tia bure.

3. Baikara titiraki aika ti na rinanoi?

³ N te kaongora aei, ti na kaekai titiraki aika tenua: E aera ngkai e kaotiota te nanoanga Iehova? E kaotaki te nanoanga n te reirei ni kaetieti ae matoatoa? Ao tera ae kona ni buokira bwa ti na kaotiota te nanoanga? Ti na nori kaekaan titiraki aikai n Ana Taeka te Atua.

E AERA NGKAI E KAOTIOTA TE NANOANGA IEHOVA?

4. E aera ngkai e kaotiota te nanoanga Iehova?

⁴ E tangiria Iehova ni kaotiota te nanoanga. E kairaki n te taamnei te abotoro Bauro bwa e na korea ae te Atua “moan te nanoanga.” N te kibu aei ao e taekinna Bauro bwa e nanoanga te Atua ibukina bwa e anga te kantaninga ae te maiu i karawa, nakoia ana toro aika kabiraki aika aki kororaoi. (IEbe. 2:​4-7) Ma e aki tii kaotiota te nanoanga Iehova nakoia taani kabiraki. E korea aei te tia areru ae Tawita: “E raoiroi Iehova nakoia aomata ni kabane, ao e oti raoi ana nanoanga n ana mwakuri ni kabane.” (TaiAre. 145:9) Ibukina bwa e tangiriia aomata Iehova, e kaotiota te nanoanga n taai nako ngkana iai bukina ae riai.

5. E kangaa Iesu n ataa aron ana nanoanga Iehova?

⁵ E ataia Iesu ae e rangi ni kani kaotiota te nanoanga Iehova. A mena Iehova ao Iesu i karawa i nanon te tai ae rangi ni maan imwain rokon Iesu i aon te aba. (TaeRab. 8:​30, 31) N taai aika bati ao Iesu e nora aron Tamana ni kaotiota te nanoanga nakoia aomata aika bubure. (TaiAre. 78:​37-42) N angiin te tai, e katuruturua Iesu aron Tamana ae anainano aei n ana angareirei.

6. E kangaa Iesu ni buokira bwa ti na ota n ana nanoanga Tamana?

⁶ N aron ae taekinaki n te kaongora are mai mwaina, e kamanena Iesu te kaikonaki ae taekan te nati ae bua, ni kaota iai korakoran nanon Iehova ni kani kaotiota te nanoanga. E kitana mwengana te nati anne ao e “bakataei . . . ana bwai n te maiu ni kaibwabwaru.” (Ruka 15:13) Imwina riki, e a raira nanona mani maiuna ni kaibwabwaru, e kananorinanoa, ao e a okira mwengana. Ao tera aron tamana? E waekoa n ataa aron tamana te rorobuaka n ataei anne. E taku Iesu: “Ngke e a ria [te nati aei], ao e a noria tamana ao e korakora nanoangaana, ao e biri n rabwatia, ao e kaboria ma ngaia.” E aki kamaamaea natina te karo aei. Ma e nanoangaia ni kabwaraa ana bure, ao e butimwaeia nakon ana utu. E boni kakaiaki ana bure te nati aei, ma tamana e kabwaraa ana bure ibukina bwa e raira nanona. E tei ibukin Iehova te karo ae nanoanga aei. N te kaikonaki ae ringa te nano aei, e kaota Iesu aron tauraoin Tamana ni kabwarai aia bure naake a rairi nanoia ni koaua.​—Ruka 15:​17-24.

7. E kangaa ni kaotaki wanawanan Iehova ae bati man arona ni kaotiota te nanoanga?

⁷ E kaotiota te nanoanga Iehova ibukin rianakoni wanawanana. E karaoi babaire n taai nako Iehova aika a na kabwaia iai ana karikibwai. E taekinna te Baibara bwa “te wanawana are mai karawa” e “on n te nanoanga ma uaa aika raraoi.” (Iak. 3:17) N aron te karo ae tatangira, e ataia Iehova ae a kakabwaiaaki natina n ana nanoanga. (TaiAre. 103:13; Ita. 49:15) Ana nanoanga te Atua e angania te kantaninga, e ngae ngke a aki kororaoi. Ngaia are e kairaki Iehova ni wanawanana ae bati bwa e na kaota te nanoanga ngkana e nora bukina ae riai. Ma e ataa naba te tai ae e na aki kaota iai te nanoanga. Ibukina bwa e wanawana, e aki kona ni kaota te nanoanga ngkana karaoan anne e a kariaia iai karaoan te bure.

8. Tera ae kainnanoaki karaoana n tabetai, ao bukin tera?

⁸ Iangoia bwa aongkoa iai ana toro te Atua ae bwaina te aroaro ni maiu ae aki riai n oin nanona. Tera ae ti riai ni karaoia? E koreia Bauro i aani kairana n te taamnei bwa ti na “katoka te reitaki” ma ngaia. (1Kor. 5:11) A kabaneaki man te ekaretia taani bure aika aki rairi nanoia. E kainnanoaki karaoan anne bwa a aonga ni kamanoaki taari aika kakaonimaki, ao e kaotiotaki naba iai aroaron Iehova aika itiaki. Ma e kangaanga irouia tabeman iangoan ae kabaneakin te aomata, boni kaotan ana nanoanga Iehova. Ma e koaua anne? Ti na noria.

E KAOTAKI TE NANOANGA N TE REIREI NI KAETIETI AE MATOATOA?

9-10. Ni kaineti ma Ebera 12:​5, 6, e aera ngkai ti kona n taekinna bwa kabaneakin temanna boni kaotan te nanoanga? Taekina te kaikonaki.

⁹ Ngkana ti ongo te katanoata n tain te taromauri bwa “ai tiaki Ana Tia Kakoaua Iehova” temanna ae ti kinaa ke ae ti tangiria, ti rangi n nanokawaki iai. Ti kona n iangoia bwa e bon riai kabaneakin te aomata ane ti tangiria anne, ke e aki. Te koaua bwa kabaneakin temanna e kaotaki iai te nanoanga? Eng. Ngkana e tauaki te reirei ni kaetieti mairoun te aomata ae kainnanoa kaetakina, e bon aki kaotaki iai te wanawana, te nanoanga, ke te tangira. (TaeRab. 13:24) Te koaua bwa e kona kabaneakin te tia bure ae aki raira nanona ni buokia bwa e na bita arona? E konaa. A bati taari aika a tia ni karaoa te bure ae kakaiaki ake a taekinna bwa ngke a kabaneaki, a a buokaki iai n ataa kakaiakin aia bure, a rairi nanoia, a bitii aroia, ao a okira Iehova.​—Wareka Ebera 12:​5, 6.

¹⁰ Iangoa te kaikonaki aei. E noria te tia kawakintiibu bwa iai ana tiibu temanna ae aoraki. E ataia ae ngkana e na bwainnaorakia ana tiibu aei, e riai ni kaokoroa ma te nanai. Ma taian tiibu boni maan aika kan ikoikotaki. A tangiria ni memena i buakon te nanai, ao a kona n aki kukurei ngkana a kaokoroaki. Ma te koaua bwa e iowawa te tia kawakintiibu ngkai e kaokoroa te tiibu anne? E bon aki. E ataia ae ngkana e kariaia te tiibu are aoraki bwa e na mena i buakon te nanai, e na butinako te aoraki anne. E boni kamanoa te nanai ae bwanin ngkai e kaokoroa te tiibu are aoraki.​—Kabotaua ma Nakoaia Ibonga 13:​3, 4.

11. (a) N aaro raa ake e kona iai ni kabotauaki te aomata ae kabaneaki ma te tiibu ae aoraki? (b) Baikara bwaai aika katauraoaki ake a kona ni buokaki iai ake a kabaneaki?

¹¹ Ngkana e kabaneaki te Kristian temanna, ti kona n iangoia bwa kaanga te tiibu are aoraki. E aoraki ni kaineti ma ana onimaki. (Iak. 5:14) Te aoraki n te onimaki kaanga ai aron aorakin te rabwata tabeua aika ewewe. Ngaia are e a bon riai n tabetai bwa e na kaokoroaki ma te ekaretia, te aomata ae aoraki n te onimaki. Te reirei ni kaetieti anne boni kaotan ana tangira Iehova ibukia kaain te nanai ake a kakaonimaki, ao e kona n rota nanon te tia bure ao ni kairia bwa e na raira nanona. Ngkana e kabaneaki, e boni kona ni kaakaei bobotaki ike e na kanuaaki iai ni bwaai n taamnei ao ni kakorakoraaki ana onimaki. E kona naba ni karekei booki ake e na wareki ao n ukeuke n reirei iai, ao ni mataku n Ana Kanakobwanaa JW^®. Ao ngkana a nora rikirakena unimwaane, a kona n anganna reirei ni kairiri ao kaetieti n te tai teuana ma teuana, ake a na buokia ni kaoka marurungin ana onimaki bwa e aonga ni manga riki bwa Ana Tia Kakoaua Iehova.b

12. Tera ae a kona ni karaoia unimwaane nakon te tia bure ae aki raira nanona, ni kaota iai te tangira ao te nanoanga?

¹² E kakawaki uringan ae a tii kabaneaki taani bure aika aki rairi nanoia. A ataia unimwaane ae bon te babaire ae rangi ni kakawaki aei, ao a riai n iangoia raoi. A ataia ae e anga te reirei ni kaetieti Iehova “n te mwaiti ae bon riai.” (Ier. 30:11) A tangiriia taari ao a aki kani karaoa te bwai teuana ae e na ruanikai iai aia onimaki. Ma n tabetai boni kaotan te tangira ao te nanoanga, kabaneakin te tia bure.

13. E aera ngkai e riai ni kabaneaki te Kristian temanna i Korinto?

¹³ Iangoa aron te abotoro Bauro nakon te tia bure ae aki raira nanona n te moan tienture. Iai te Kristian temanna i Korinto ae wene ni bure ma buun tamana. Ai buakakara te aro anne! N taai ake rimoa, e tuangia tibun Iteraera Iehova ni kangai: “Te mwaane ae wene n taanga ma buun tamana, e kamaamaea tamana. A bon riai n uaia ni kamateaki.” (NakIbo. 20:11) E bon aki kona Bauro n tua bwa e na kamateaki te aomata anne. Ma e tuangia kaaini Korinto bwa a na kabanea man te ekaretia. Aroaron te aomata anne ae aki riai e bon rotiia kaain te ekaretia. Tabeman i buakoia a aikoa iangoia bwa bon te bure ae kakaiaki anne!​—1Kor. 5:​1, 2, 13.

14. E kangaa Bauro ni kaota nanoangaan te mwaane are kabaneaki i Korinto, ao bukin tera? (2 I-Korinto 2:​5-8, 11)

¹⁴ Imwina riki, e a ataia Bauro bwa e karaoa te bitaki ae korakora te tia bure anne. E raira nanona ni koaua! E ngae ngke e a tia ni kamaamaea te ekaretia teuanne, ma e tuangia unimwaane Bauro bwa e aki tangiria n “rangi ni matoatoa” nakoina. E tuangia ni kangai: ‘Akoia ni kabwaraa ana bure ao kabebetea.’ Ao nora bukina ae e taekinna Bauro: “Bwa e aonga n aki taonakinako teuaei n nanokawakina.” E nanoangaa te mwaane ane raira nanona anne Bauro. E aki tangiria bwa e na nora teuanne n taonakinako ke ni korakora rawawatana ibukin te baere e karaoia, n te aro are e nang aki ukera kabwaraan ana bure.​—Wareka 2 I-Korinto 2:​5-8, 11.

15. A na kangaa unimwaane n anga te reirei ae matoatoa ao ni kaotiota naba te nanoanga?

¹⁵ N aron Iehova, a tangiria naba unimwaane ni kaotiota te nanoanga. A anga te reirei ni kaetieti ae matoatoa ngkana e riai, ma a kaotiota te nanoanga n aron ae a konaa, ngkana iai bukina ae riai. Ngkana a aki kaeta te tia bure unimwaane, a bon aki kaota te nanoanga, ma a a kariaia karaoan te bure. Ma te koaua bwa tii unimwaane aika riai ni kaotiota te nanoanga?

TERA AE KONA NI BUOKIRA BWA TI NA KAOTIOTA TE NANOANGA?

16. Ni kaineti ma Taeka N Rabakau 21:​13, tera aron Iehova nakoia naake a aki kaotiota te nanoanga?

¹⁶ A kekeiaki Kristian ni kabane ni kaotiota te nanoanga n aron Iehova. Bukin tera? Bukina teuana bwa Iehova e aki ongoraei aia tataro naake a aki kaotiota te nanoanga. (Wareka Taeka N Rabakau 21:13.) Ti aki tangiria bwa e na aki ongoraei ara tataro Iehova, ngaia are ti taratara raoi bwa ti na aki karikirakea te nano ae aki nananoanga. N oneani mwin ae ti na kaini taningara nakon raora n te onimaki ae rawawata, ti riai n tauraoi n taai nako ni kakauongo nakon “tangin ane e mangori.” N aron anne, ti mutiakina naba te reirei ni kairiri ae kairaki koreana n te taamnei aei: “Ane e aki nananoanga ao e na motikaki taekana n akea te nanoanga.” (Iak. 2:13) Ngkana ti nanorinano n ururinga ae ti rangi ni kainnanoa nanoangaara, ti na boni bae riki ni kani kaotiota te nanoanga. Ti a bon riai riki ni kaota te nanoanga ngkana e a okira te ekaretia te tia bure ae raira nanona.

17. E kangaa Tawita ni kaotiota te nanoanga ni koaua?

¹⁷ Ti kona ni buokaki n taiani katoto man te Baibara bwa ti na bwaina te nanoanga ao n rarawa n rangi ni matoatoa. N te katoto, iangoa te Uea ae Tawita. N angiin te tai e kaotiota te nanoanga ni koaua. E ngae ngke e kataia n tiringnga Tauro, ma e kaotiota te nanoanga Tawita nakon ana kabiraki te Atua aei, ao e aki kani karekea kain Tauro ke ni kammarakia.​—1Tam. 24:​9-12, 18, 19.

18-19. Baikara katoto aika uoua ake e aki kaota iai te nanoanga Tawita?

¹⁸ Ma e aki kaotiota te nanoanga n taai nako Tawita. N te katoto, ngke e taetae n aki akaka te mwaane ae iowawa ae Nabara ao e rawa ni karekea te amwarake ibukin Tawita ma ana rorobuaka, e roko unin Tawita ao e baireia bwa e na tiringa teuaei ma mwaanen ana auti ni kabane. Ma e tukaki Tawita mani karaoan te bure ni katuturaraa ngke e waekoa n ibuobuoki buun Nabara ae Abikaira, ae te aine ae taotaonakinnano.​—1Tam. 25:​9-22, 32-35.

¹⁹ N te tai teuana ao te burabeti ae Natan e a tuanga Tawita taekan te mwaane ae kaubwai ae iraea ana tiibu teuae maiu ni kainnano ae kaain rarikina. E rangi n un Tawita ao e taku: “Ngkai bon iai Iehova ao e riai ni mate teuane karaoa anne!” (2Tam. 12:​1-6) E bon ataa Tawita te Tua Rinanoni Mote. Te aomata ae iraea te tiibu, e riai ni kabooa mwina n aman te tiibu. (TeOti. 22:1) Ma taekinan ae e riai ni mate te aomata anne, bon te motikitaeka ae rangi ni matoatoa. Ni koauana, e taekina te karaki anne Natan bwa e na buoka Tawita n ota ae e a tia ni karaoi buure aika kakaiaki riki! Ao e oti bwa Iehova e kaota riki nanoangaan Tawita, ni kabotauaki ma aron Tawita nakon teuare iraea te tiibu are n ana kaikonaki Natan!​—2Tam. 12:​7-13.

20. Tera reireiara man ana katoto Tawita?

²⁰ Noria bwa ngke e rangi n un Tawita, e a baireia bwa e riai ni mate Nabara ma ana rorobuaka ni kabane. Imwina riki, e taekinna Tawita bwa e riai ni kamateaki teuare kaubwai are n ana kaikonaki Natan. N te katoto ae te kauoua aei, ti kona n iangoia bwa e aera te mwaane ae akoi aei ngkai e a taekina te motikitaeka ae iowawa. Iangoa te baere riki. N te tai anne, e tabetabe mataniwin nanon Tawita ibukin ana bure. Ngkana e motikitaeka temanna n te aro ae iowawa, e kaotia bwa iai te kangaanga n ana onimaki. E anga te kauring ae matoatoa Iesu nakoia taan rimwina ni kangai: “Katoka ami kabuakaka bwa kam kaawa ni manga kabuakakaaki, bwa e na motikaki taekami n ai aromi ni motikitaeka.” (Mat. 7:​1, 2) Ngaia are ti bia taratara raoi bwa ti na aki rangi ni matoatoa, ao ni kakorakoraira ni kakairi iroun Atuara ae “moan te nanoanga.”

21-22. Baikara aanga tabeua ake ti kona iai ni kaotiota te nanoanga?

²¹ E bati riki ae irekereke ma te nanoanga nakon ae tii te namakin. Aomata aika nanoanga, a karaoi bwaai tabeua ibukini buokaia tabemwaang. Ngaia are ti kona ngaira ni kabane n taraia raoi bwa tera ae a kainnanoia kaain ara utu, ara ekaretia, ao ara kaawa. Ni koauana, a bati aanga ake ti kona iai ni kaotiota te nanoanga! Iai ae e kainnanoa kabebeteana? Ti kona n anga te ibuobuoki ae manena tao n arora ni katauraoa te amwarake, ke ni karaoa te mwakuri n ibuobuoki ae kainnanoaki? E kainnanoa te kaungaunga ao te itamwaomwao te Kristian ae e a kaokaki nakon te ekaretia? Ti kona n taekina te rongorongo ae raoiroi ae karaunano nakoia tabemwaang? Aio te anga teuana ae ti kona iai ni kaotiota te nanoanga nakoia aomata ake ti kaitiboo ma ngaiia.​—Iobi 29:​12, 13; IRom 10:​14, 15; Iak. 1:27.

²² Ngkana ti tatauraoi ni buokiia aomata ni kainnanoia akanne, ti na bon noria ae a bati aanga ake ti kona iai ni kaotiota te nanoanga. Ngkana ti kaotiota te nanoanga, e na boni kimwareirei Tamara are i karawa ae te Atua ae “moan te nanoanga”!