ARONI KATOKANI BUTANAKON TE RIRIBAI

1 | Tai Inanonano

Ana Reirei te Baibara:

“E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.”—MWAKURI 10:34, 35.

Ae Nanonaki n te Kibu Anne:

E aki motiki taekara Iehovaa ae te Atua ni kaineti ma abara, ara reeti, kaokoroni kunra ke ara katei. Ma e kaatuua taraan te bwai ae kakawaki ae taekani baika raba i nanora. Eng, “ana taratara te aomata e tii nora ae e kona n noria te mata, ma Iehova e nora te nano.”—1 Tamuera 16:7.

Te Bwai ae Ko Kona ni Karaoia:

E ngae ngke ti aki kona n atai nanoia aomata ma ti kona ni kakairi iroun te Atua ao n aki inanonano nakoia tabemwaang. Kataia n iangoia aomata n tatabemania nako, n oneani mwin are ko na iangoiia bwa kaain te koraki teuana. Ngkana iai am namakin aika aki raraoi tao nakoia aomata aika kaokoro aia reeti ke abaia ma ngkoe, tataro nakon te Atua ao butiia bwa e na buokiko ni kanakoi aeka n namakin akanne. (Taian Areru 139:23, 24) Ngkana ko tataro ma nanom ni koaua ao ni butiia bwa e na kakorakorako n aki inanonano, ko kona ni kakoauaa ae e na bon uki taningan Iehova nakon am tataro.—1 Betero 3:12.

a Aran te Atua bon Iehova.—Taian Areru 83:18.

“I bon tuai man tetekateka n amwarake ma te Imatang . . . Ao ngkai I a tia n riki bwa kaain te botaki n itaritari ae katobibia te aonnaba.”—TITUS

Te Rongorongo ae Koaua—TITUS

E Tokanikai i Aon te Riribai

E kaaina ngkoa te kaeng ae iowawa te mwaane ae Titus ibukina bwa e un n ana tua aika ribuaka te tautaeka ni kaineti ma te reeti. E taku: “Ti nanako n taabo ake a aki butimwaeaki iai aomata aika bwatabwata n aron taian outero ke taabo ni moi manging bwa ti na kakiriwe iai.” E taekinna Titus bwa e rangi ni korakora irouna te kairiribai ao e a manga taku riki: “Ngkana I un ma temanna, n aki ongeia bwa te mwaane ke te aine, ma boni ngai ae I moan oro n taai nako.”

E boni karaoi bitaki Titus ngke e moana ana reirei n te Baibara ma Ana Tia Kakoaua Iehova. Ngke e wareka te Baibara ao e bon rotaki nanona iai. E rotaki riki nanona n te berita ibukin te aonnaba n taai aika a na roko are ‘e nang akea riki iai te mate ke te nanokawaki ke te tang ke te maraki.’—Te Kaotioti 21: 3, 4.

N te moantai ao e kabokorakora Titus ma katokan ana riribai. E taku, “E rangi ni kangaanga bitakin aroarou n iaiango ao au mwakuri.” Ma e reke buokana n te baere e reiakinna ni Mwakuri 10:34, 35, ae kaotaki iai bwa e aki inanonano te Atua.

Tera uaana? E taku Titus: “I a kakoauaa raoi ae Ana Tia Kakoaua Iehova bon te Aro ae koaua, n noraia bwa a itangitangiri i marenaia n aki ongea kaokoron aia reeti ke karani kunia. Imwaini bwabetitoakiu, e boni kaoai temanna te tia Kakoaua ae te Imatang bwa N na katairiki ma ngaia. Ai aron ae I mii. I bon tuai man tetekateka n amwarake ma te Imatang, ma I a bon tekateka. Ao ngkai I a riki bwa kaain te botaki n itaritari ae katobibia te aonnaba.”