E “Aki Inanonano” Iehova

Iai te tai ae ko a tia n aitara iai ma te inanonano? Ko a tia ni bubutii ao e kakeaaki bongan am bubutii, ko aki anganaki te mwakuri teuana ke ko riribaaki ibukini karani kunim, am reeti ke rikiam? Ngkana ngaia anne, a bati aika a a tia naba n aitara ma aaro akanne. Ma aio te rongorongo ae raoiroi: E ngae ngke a rangi n riiriki aaro ni kamaamaa akanne i aon te aba ma bon akea i karawa. E kaotaki kakoauaan raoi anne iroun te abotoro Betero ngke e kangai: “E aki inanonano te Atua.”​—Wareka Mwakuri 10:​34, 35.

E taekin taeka akanne Betero n te tabo ae aki bati n tataekinaki iai ae mwengan te Tientaire ae Korenerio. E bungiaki Betero bwa te I-Iutaia ao e maiu n taai ake a iaiangoaki iai Tientaire irouia I-Iutaia bwa aomata aika aki itiaki, ai ngaia are e aki riai te iraorao ma ngaiia. Ma e aera ngke e mena Betero n ana auti Korenerio? Ni kauarerekeana, ibukina bwa aei ana babaire Iehova ae te Atua bwa a na kaitiboo ikanne. E a tia n anganaki te miitara Betero mairoun te Atua ao e tuangaki ae kangai: “Katoka atongani baike e a tia ni kaitiakii te Atua bwa a kamwara.” E aki ataia Betero ae te bongina imwain aei ao e roko te miitara iroun Korenerio ao e tuangnga te anera bwa e na kawaekoaa Betero. (Mwakuri 10:​1-15) E a aki rawa n taetae Betero ngke e a ataia bwa boni mairoun Iehova.

E taku Betero: “I a ota ngkai bwa e boni koaua bwa e aki inanonano te Atua.” (Mwakuri 10:34) Te taetae ni Kuriiti ae rairaki nakon “inanonano” bon nanona raoi “te tia anai ubuia.” (The Kingdom Interlinear Translation of the Greek Scriptures) Ni kaineti ma te taeka aei, e kabwarabwaraa ni kangai te tia rabakau i aon te Baibara temanna: “E nanonaki iai te tia moti ae e taraa ubun te aomata ao e a kaotinakoa naba ana moti, tiaki ni kaineti ma baika riki ma bon ibukin nanona bwa e tangira te aomata anne ke e ribaia.” E aki tangira ubun temanna te Atua ibukin ana reeti, abana, rikiana ke aaro riki tabeua aika kona n noraki.

Ma e nori nanora Iehova. (1 Tamuera 16:7; Taeka N Rabakau 21:2) E manga taku riki Betero: “A butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.” (Mwakuri 10:35) Maakan te Atua nanona karineana, kamoamoaana, onimakinana ao te rarawa ni karaoi baike e na aki kukurei iai. Ngkana ti kani karaoa ae raoiroi, ti riai ni kukurei ni karaoa ae eti i matan te Atua. E kimwareirei Iehova iroun te aomata ae onrake nanona n te karinerine ike e a kairaki iai bwa e na karaoa te eti.​—Te Tua-Kaua 10:​12, 13.

Ngkana ko a tia n aitara ma te inanonano ke te riribai, e raoiroi ngkana ko kaungaa nanom n ana taeka Betero ibukin te Atua. E tabe ni katikiia aomata man natannaomata nako Iehova nakon te taromauri ae koaua. (Ioane 6:44; Mwakuri 17:​26, 27) E kakauongo ao e kaekai aia tataro taan taromauria n aki ongea aia reeti, abaia ke rikiaia. (1 Uea 8:​41-43) Ti a kona ni kakoauaa ngkanne bwa ngkana e taraa aon te aba Iehova mai karawa, e na nora tii teuana te reeti ae te botannaomata. Ko aki ngkanne kaungaaki bwa ko na reiakina ae bati riki ibukin te Atua ae aki inanonano aei?