Bukin Teimatoan Riirikin te Buaka ao te Tiritiri

TE BURE

E karikiia ara moani karo aika Atam ma Ewa, te Atua ni katotongana. (Karikani Bwaai 1:27) Nanona bwa a kona ni kakairi n aroaron te Atua n ikotaki ma te rau ao te tangira. (1 I-Korinto 14:33; 1 Ioane 4:8) Ma a aki ongeaba Atam ma Ewa iroun te Atua, ao a karaoa ae bure. Ao ibukin anne, ti a ituaki ni kabane n te bure ao te mate. (I-Rom 5:12) Ti kairaki n te bure are ituira bwa ti na iaiangoi mwakuri aika buakaka, ao e kona ni kairira bwa ti na karaoi.​—Karikani Bwaai 6:5; Mareko 7:​21, 22.

TE TAUTAEKA N AOMATA

E aki karikira te Atua ma ara konabwai ni kairira i bon iroura. E kangai te Baibara: “Tiaki naba ana bwai te aomata kairani maiuna.” (Ieremia 10:23) Ibukin anne, a aikoa kona tautaeka n aomata ni kamauna raoi te buaka ao te tiritiri.

TATAN MA ANA TAIMONIO

E taekinaki n te Baibara bwa “a bane kaain te aonnaba ni mena i aani mwaakan teuare buakaka.” (1 Ioane 5:19) “Teuare buakaka” bon Tatan te Riaboro, ao bon te tia tiriaomata. (Ioane 8:44) Boni ngaia ma raona n taimonio ake tabeman, aika taani kauekea te buaka ao te tiritiri.​—Te Kaotioti 12:​9, 12.