Aron te Buaka ao te Tiritiri ni Kona n Toki

E NA KAMAUNAI TAUTAEKA N AOMATA TE ATUA

E na kamaunai tautaeka n aomata te Atua, rinanon te buaka ae aranaki n te Baibara bwa Aremaketon.a (Te Kaotioti 16:16) N te tai anne, a na ikotaki “ueea n te aonnaba ni kabutaa,” ibukin “te buaka n te bong ae kakannato ae ana bong te Atua ae Moan te Mwaaka.” (Te Kaotioti 16:14) Aremaketon bon ana buaka te Atua are e na kamaunai iai buaka ni kabane.

E na onei mwin tautaeka n aomata te Atua n ana Tautaeka n Uea, ke ana tautaeka are e na kairiri mai karawa, ao e na bon aki kamaunaaki. (Taniera 2:44) E a tia te Atua n rinea Natina ae Iesu Kristo bwa te Uea iai. (Itaia 9:​6, 7; Mataio 28:18) Te tautaeka aei bon te Tautaeka n Ueab are e reireinia Iesu taan rimwina, bwa a na tataroakinna. (Mataio 6:​9, 10) A nangi bane aomata ni katiteuanaaki i aani mwaakan Iesu ae te tia Kairiri n te tautaeka ae kabutaa aonnaba aei.

E kaokoro Iesu ma taani kairiri aika aomata, ao e na bon aki kona ni kamanena mwaakana ni karekea iai kabwaiana. Ibukina bwa e kakaraoa ae riai ao e aki inanonano, e na akea ngkanne ae e na raraoma bwa e na kakeaaki bongana ibukin ana reeti, abana, ke rikiana. (Itaia 11:​3, 4) Ao a na aki naba buaka aomata ibukin inaomataia. Bukin tera? Ibukina bwa e na bon tabeakina mweraoin temanna ma temanna Iesu. “E na kamaiuia akana maiu ni kainnano aika tang ni kani buokaki, ao ane e mangori naba ao ane akea te tia buokia. . . . E na kamaiuia man te karawawataaki ao man te iowawa.”​—Taian Areru 72:​12-14.

E na kamaunai bwaai ni buaka aika kamamate Ana Tautaeka n Uea te Atua. (Mika 4:3) E na kamaunaia naba aomata aika buakaka ake a rawa ni katoka te buaka, ke a teimatoa n aki karauia aomata. (Taian Areru 37:​9, 10) A na boni bane mwaane, aine, ao ataei, n namakina te mano n taabo nako ake a mena iai n te aonnaba.​—Etekiera 34:28.

A nang karekea te maiu ae kakukurei aomata i aan Ana Tautaeka n Uea te Atua. E na kamaunai kangaanga aika karekea te buaka, n aron te maiu ni kainnano, te baki, ao aki taun te auti. A na bane aomata ni karekei amwarake aika bati aika kamarurung, ao e na reke aia tabo ni maeka ae kamwengaraoi.​—Taian Areru 72:16; Itaia 65:​21-23.

A na kamaunaaki n Ana Tautaeka n Uea te Atua mwin nako ana urubwai te buaka. E na aki tii kamaoaki te ikoaki, ma e na katokaki naba te nanokawaki ma baike a kakorakaia te iango imwin te buaka. A na kautaki naba naake a a tia ni mate bwa a na manga maiu n te aonnaba. (Itaia 25:8; 26:19; 35:​5, 6) A na manga ikotaki kaain te utu nako, ao a nang “mauna bwaai rimoa,” ake baike a ururingaki aika karawawata imwin te buaka.​—Te Kaotioti 21:4.

E NA KAMAUNA TE BURE TE ATUA

E na katiteuanaia aomata Ana Tautaeka n Uea te Atua bwa a na taromauria te Atua ae koaua ae Iehovac n tii ngaia, ae “te Atua ae nibwan te tangira ma te rau.” (2 I-Korinto 13:11) A na reiakina aroia aomata n uaia ni maeka ma te rau. (Itaia 2:​3, 4; 11:9) A na bane ni kainaomataaki man uaan te bure naake a maiuakini baike a reiakin.​—I-Rom 8:​20, 21.

E NA KAMAUNAIA TATAN MA ANA TAIMONIO TE ATUA

E na kamaunaia Tatan ma ana taimonio ake taani kauekea te buaka, Ana Tautaeka n Uea te Atua. (Te Kaotioti 20:​1-3, 10) “E na bati te raoi” kioina ngkai ai akea aia kariri ae buakaka.​—Taian Areru 72:7.

Ko boni kona ni kakoauaa bwa e na koro bukin ana berita te Atua are e na katoka te buaka ao te tiritiri. Iai ana konabwai ao nanona ni kani kamauna te buaka.

• Iai wanawanan te Atua ma mwaakana ae kainnanoaki ibukini katokan te buaka ao te tiritiri. (Iobi 9:4) Bon akea te bwai ae e aki kona ni kakoroa bukina.​—Iobi 42:2.

• E ribaa te Atua noraia aomata n rawawata. (Itaia 63:9) E “riribaa [naba] ane e tangira te iowawa.”​—Taian Areru 11:5.

• E kakakoroa nanon ana taeka te Atua, bwa e aki kona ni kewe.​—Itaia 55:​10, 11; Tito 1:2.