Karekean te Rau n Aki Ongea te Buaka ao te Tiritiri
E taku Gary ae kaaini ngkoa te taanga ni buaka, “Imwain reiakinan te Baibara, ao I aki ataia bwa e aera ngkai e rangi ni bati te iowawa, te ribuaka, ao kangaanga n te aonnaba. Ma e a rau nanou ngkai. I a ataia ae e na boni karika te aonnaba Iehova ae te Atua bwa te tabo ae mano raoi.”
Tiaki tii Gary n namakina aei. Iangoa aron te Baibara ni buokiia riki ake tabeman.
E KANGAI TE BAIBARA: “Ko raoiroi ngkoe ae Iehova, ao ko tauraoi ni kabwarabure.”—Taian Areru 86:5.
TE IBUOBUOKI IAI: “I kakoauaa man te kibu aei bwa e bon nanoanga Iehova. I ataia ae e kukurei ni kabwarai au bure ake I karaoi ngke I ira ngkoa te buaka.”—Wilmar, Colombia.
E KANGAI TE BAIBARA: “I a karika karawa ae boou ao te aonnaba ae boou, ao a na aki manga rin n te iango bwaai ake rimoa, ao a na aki naba manga rin n te nano.”—Itaia 65:17.
TE IBUOBUOKI IAI: “I ituaki n aorakin te iango teuana ae te post-traumatic stress disorder, ao te rawawatannano imwin te baere I rinanona ngke I kaaina ngkoa te taanga ni buaka. Ma e kauringai te kibu aei bwa e na waekoa ni katoki Iehova au iango aika I aki rau iai aikai, ao miiu naba ake I aikoa kona ni matu raoi iai. A nang boni maunanako man au iango ke mai nanou. Ai bon tamaroara naba te bwaintangira aei!”—Zafirah, United States.
E KANGAI TE BAIBARA: “A na maiureirei akana raoiroi n ana bong, ao e na bati te raoi ni karokoa ae ai akea namwakaina.”—Taian Areru 72:7.
TE IBUOBUOKI IAI: “I aki toki n iangoi taeka akanne. I aoni kawaina ngkai ni katokaki te buaka ma baike a riki mai iai, ao ti nang aki manga raraomaeakina kamanoaia naake ti tangiriia.”—Oleksandra, Ukraine.
E KANGAI TE BAIBARA: “A na maiu am mate. . . . Kam na uti ao takarua ni kimwareirei, ngkami aika taani maeka n te tano!”—Itaia 26:19.
TE IBUOBUOKI IAI: “A kamateaki angia kaain au utu n tain tiringaia taian Tutsi. Ma e rau nanou n te kibu aei bwa N na boni manga kaitiboo ma ngaiia. I kariariaa te tai are N na ongo iai bwanaaia ni kukurei ngkana a a kautaki!”—Marie, Rwanda.
E KANGAI TE BAIBARA: “Ai tii teutana riki ao a nang akea aomata aika buakaka . . . Ma a na abana te aonnaba akana nimamannei, ao e na korakora kimwareireia n te rau ae bati.”—Taian Areru 37:10, 11.
TE IBUOBUOKI IAI: “E ngae ngke e a tia n toki te buaka, ma bon iai naba mwakuri n ribuaka ao aomata aika buakaka. A rangi ni kakorakoraai kiibu aikai. E bon nori bwaai nako Iehova ao e ota n au kangaanga. E berita bwa a na waekoa n toki rawawata ni kabane, ao a na aki manga uringaki.”—Daler, Tajikistan.
Aomata nako aika taekinaki n te maekatin aei, a mena i buakoia Ana Tia Kakoaua Iehova aika mirion ma mirion, ake a a tia ni buokaki n te Baibara ni karekea te rau. A a tia n reiakina aroia n tokanikai i aon te kairiribai n te reeti, n te aba, n te baronga, ao ai aeka n riribai ni kabane. (I-Ebeto 4:31, 32) A tei i nuka Ana Tia Kakoaua Iehova ni kaineti ma te tautaeka, ao a rawa n irekereke ma mwakuri n iowawa.—Ioane 18:36.
A karekea naba boutokaaia Ana Tia Kakoaua Iehova, man aia itangitangiri n tari ni katobibia te aonnaba. (Ioane 13:35) N te katoto, Oleksandra are taekinaki mai mwaina, e a riai ni birinako ma tarina nakon te aba teuana ibukin te buaka. E taku neiei: “Ngke ti a otinako man tian te aba, ti a bon noriia naba taani Kakoaua n te tabo anne aika tauraoi ni butimwaeira. Ti buokaki man aia boutoka bwa ti na kona ni kaangaraoa aroni maiura n te aba ae boou, ngkai ti birinako ngaira mai abara.”
Ti kukurei ni butimwaeiko bwa ko na raonira n ara taromauri, ike ti na reiakina iai ana rongorongo te Baibara aika karaunano ao arora ni maiuakini. Nakon jw.org ibukini kakaaean ara tabo ae kaan ma ngkoe, ke bubutii reireim n te Baibara ae akea te roo iai ma temanna Ana Tia Kakoaua Iehova, ni kabonganaan te boki ae Ko Kona ni Kukurei n Aki Toki!