Uringnga n Tataro Ibukia Tabemwaang

1. Ti kangaa n ataia ae a kakawaki ara tataro iroun Iehova?

TE TATARO bon te bwaintituaraoi ae rianako arona. Iangoa aei: E a tia Iehova n anga mwioko tabeua nakoia anera. (TaiAre. 91:11) E a tia naba n angan Natina mwioko aika rangi ni kakawaki. (Mat. 28:18) Ma tera aron ongoraeakinan taian tataro? E taua anne Iehova bwa mwiokoana n tii ngaia. E ongoraei ara tataro Iehova are te “tia Ongo te tataro.”​—TaiAre. 65:2.

2. Tera ana katoto te abotoro Bauro are e kateia ni kaineti ma te tataro ibukia tabemwaang?

² E ngae ngke ti kona ni kawara Iehova n taai ake ti bon taku ma ara kangaanga, ma ti riai naba n tataro ibukia tabemwaang. E karaoa anne te abotoro Bauro. N te katoto, e korea ae kangai nakoia kaain te ekaretia i Ebeto: “I teimatoa ni mwaneweingkami n au tataro.” (IEbe. 1:16) E tataro naba Bauro ibukin temanna ma temanna. N te katoto e tuanga Timoteo ni kangai: “I katituaraoa te Atua, . . . I aki toki n uringko n au kakorakora n tataro ni bubutii ni ngaina ao ni bong.” (2Tim. 1:3) Iai naba tabeaiangani Bauro ake e tataroi naba. (2Kor. 11:23; 12:​7, 8) Ma e boni karekea naba ana tai n tataro ibukia tabemwaang.

3. E aera ngkai ti kona ni mwaninga n tataro ibukia tabemwaang?

³ Ti kona ni mwaninga n tabetai n tataro ibukia tabemwaang. Bukin tera? E taekina bukina teuana te tari te aine ae te Kristian ae Sabrina.a E taku: “E rangi ni katabetabe te maiu aei. Ti kona ni mangaongao ma ara kangaanga n te aro are ti a tataroa tii kainnanora.” E a tia n rereke naba aekakin anne iroum? Ngkana eng, e na kona ni buokiko te kaongora aei. E na (1) kabwarabwaraa bukina ngkai e kakawaki te tataro ibukia tabemwaang, ao (2) e na kaotaki naba iai arom ni kona ni karaoia.

BUKIN TERA BWA TI NA TATARO IBUKIA TABEMWAANG?

4-5. E na kangaa n “rangi ni mwaaka” ara tataro ibukia tabemwaang? (Iakobo 5:16)

⁴ “E rangi ni mwaaka” te tataro ibukia tabemwaang. (Wareka Iakobo 5:16.) E kona te tataro ibukia tabemwaang ni karekea te bitaki nakon te baere a rinanona? Eng, e kona. E ngae ngke e ataia Iesu ae e na kakeaaki iroun te abotoro Betero, ma e boni kangai naba: “I a tia ni kakorakoraai n tataro ni bubutii ibukim bwa e na aki bua am onimaki.” (Ruka 22:32) E ataia naba Bauro ae e kona te tataro ni karekea te bitaki. Ngke e kabureaki i Rom i aani bukina ae aki riai ao e koroboki nakoni Biremon ni kangai: “I kantaningaia bwa N na kaokaki nakoimi man ami kakorakora n tataro ibukiu, bwa I aonga ni beku ibukimi.” (Bire. 22; nora te study note i aon “for I am hoping that through your prayers,” nwtsty-E) E noraki bwa e boni waekoa ni kainaomataaki Bauro ao ni manga reitaanako ana uarongorongo.

⁵ Ma ni koauana, tiaki nanona bwa ti kairoroa Iehova n ara tataro anne. E atai tabeaiangaia ana toro ao n tabetai e boni buokiia. Ti buokaki n ataakin anne bwa ti na kakorakoraira n tataro nakon Iehova ibukin te bwai teuana ae riki, ao ni katikua nako nanoni baina ma te onimaki.​—TaiAre. 37:5; nora 2 I-Korinto 1:11 ao taian study notes.

6. E na kangaa te tataro ibukia tabemwaang n rota ara namakin ibukia? (1 Betero 3:8)

⁶ Ti buokaki ni karikirakea “te nanoanga” ngkana ti tataro ibukia tabemwaang. (Wareka 1 Betero 3:8.) Te nanoanga bon ataakin rawawatan temanna ao kani buokana n ana kangaanga. (Mareko 1:​40, 41) E kangai te unimwaane n te ekaretia ae Michael: “Ngkana I tataro ibukini kainnanoia tabemwaang, I a ota riki n aia kangaanga are a rinanona ao e a korakora riki tangiraia irou. I namakinna ae I a kaan riki nakoia, e ngae naba ngkana a aki ataia.” E kabwarabwaraa riki raoiroini karaoan anne te unimwaane n te ekaretia ae Richard. E taku: “Ngkana ti tataro ibukin temanna, ti a kairaki riki iai bwa ti na karaoa te bwai teuana ibukini buokana.” E reitia n taku: “Ngkana ti anga ara ibuobuoki nakon te aomata are ti tataro ibukina, ai aron ae ti a buoka aroni kaekaan ara tataro ibukina.”

7. E kangaa te tataro ibukia tabemwaang ni buokira n iangoa ara kangaanga n te aro ae riai? (I-Biribi 2:​3, 4) (Nori naba taamnei.)

⁷ Ngkana ti tataro ibukia tabemwaang, ti a buokaki iai bwa ti na iangoi ara kangaanga n te aro ae riai. (Wareka I-Biribi 2:​3, 4.) Ti bane n toa ma ara kangaanga tabeua aika riiriki ibukina bwa ti maeka n te aonnaba ae tautaekanna te Riaboro. (1Ioa. 5:19; TeKao. 12:12) Ngkana ti karekea anuara ae te tatataro ibukia tabemwaang, ti a kauringaki iai ae “a a tabe n rinanoni maraki aika tii te arona, [taari] nako.” (1Bet. 5:9) E taku te bwaiania temanna ae arana Katherine: “I kauringaki n au tataro ibukia tabemwaang ae a bane taari n rinanon naba taiani kangaanga. I buokaki n anne bwa N na aki kaatuua iaiangoan tii au kangaanga.”

A KAINNANOA ARA TATARO

8. Aanga te katoto bwa antai ae ti kona naba n tataro ibukia.

⁸ Antai aika ti kona naba n tataro ibukia? Ti kona n tataro ibukia te koraki n aomata nako, n aroia naake iai aorakin rabwataia, rooro n rikirake aika kaaitara ma te kakanikoaki ao te kariri irouia tabonroroia n aia reirei, ao ai naake a rinanon te kara. A bati raora n te onimaki aika nanomwaaka i aan te kakaaitara, mairouia aia utu ke man te tautaeka. (Mat. 10:​18, 36; Mwa. 12:5) Iai tabeman taari ake a a kitani mwengaia ibukin aki nakoraoin te tautaeka. Tabeman a rinanon taiani kabuanibwai aika karina. Tao ti aki kinaia taari aikai. Ma ngkana ti tataro ibukia, ti a kaotia iai bwa ti kakairi n te baere e tua Iesu are ti na ‘itangitangiri i marenara.’​—Ioa. 13:34.

9. Bukin tera bwa ti riai n tataro ibukia naake a kairiri n ana botaki Iehova n ikotaki naba ma buuia?

⁹ Ti kona naba n tataro ibukia naake a kairiri n ana botaki Iehova. N aroia kaain te Rabwata n Tautaeka ma aia taan ibuobuoki, taiani Komete n te Aobiti n Tararua, mataniwi n taian aobiti n tararua, mataniwi n aono, unimwaane n te ekaretia, ao ai tabonibai. A bati i buakoia taari mwaane aikai aika kabokorakora naba ma tabeaiangaia ao a aanga ngaiia ibukira. (2Kor. 12:15) N te katoto, e kangai te mataniwi n te aono ae Mark: “Teuana au kangaanga ae bubura boni kitanaia au karo aika kara. A a mamaara ni kauoman. E ngae ngke e tararuaiia mwaaneu ma buuna, ma I rawawata ngkai e rangi ni karako te bae I kona ni karaoia ibukia.” E ngae ngke ti aki atai tabeaiangaia taari mwaane aika mwakuri korakora aikai, ma ti karaoa ae riai ngkana ti ururingia n ara tataro. (1Tet. 5:​12, 13) Ti kona naba n tataro ibukia buuia taari mwaane aikai, ngkai a kakaonimaki ni koaua ni boutokaiia buuia bwa a na teimatoa ni mwiokoaia.

10-11. E kukurei Iehova ngkana ti a ikotiia naba tarira ao mwaanera ni kabane n ara tataro? Kabwarabwaraa.

¹⁰ N aron ae ti a tia ni maroroakinna, ao n angiin te tai ti a bon ikotiia naba taari mwaane ao aine n ara tataro. N te katoto, e ngae ngkana akea ae ti kinaa, ma ti kona ni bubutii nakon Iehova buokaia naake a kabureaki ke kabebeteaia naake a mate buuia. E taku te unimwaane n te ekaretia ae Donald, “A rangi ni bati tarira ao mwaanera n te onimaki aika rinanon taiani kangaanga, n te aro are n tabetai ti a bon ikotiia naba n ara tataro naake a karawawataaki ni kabane.”

¹¹ E kukurei Iehova n aeka n tataro aikai? E boni kukurei! Bwa ni koauana ti aki atai raoi kainnanoia taari ni kabane. Ngaia are e bon raoiroi naba ngkana ti a ikotiia naba tarira ao mwaanera ni kabane n ara tataro. (Ioa. 17:20; IEbe. 6:18) E oti n aeka n tataro aikai bwa ti “tangiriia [taari] nako i nanon te onimaki.”​—1Bet. 2:17.

NGKANA TI TATARO IBUKIN TEMANNA MA TEMANNA

12. Ti na kangaa ni buokaki n taekin raoi baika ti kan tataroi ngkana ti kamatairikira?

¹² Kamatairikiko. Irarikin ara tataro are ti ikotiia iai taari, e raoiroi naba ngkana ti tataro ao ni mwanewea aran temanna ma temanna. Iai n am ekaretia ae kabokorakora ma te aoraki ae wenemaan? Iai te roronrikirake ae bwara nanona bwa tao e kaaitara ma kariri n ana reirei? Iai te karo ae akea buuna ae kabokorakora ni kaikawaa natina “i nanon ana reirei ni kaetieti ao ana kaungaunga Iehova”? (IEbe. 6:4) Ngkana ko kamatairikiko, ane e na korakora riki nanoangaaia tabemwaang, ao e na korakora riki nanom ni kan tataro ibukia.b​—IRom 12:15.

13. Ti na kangaa n tataro ibukia naake ti aki kinaia?

¹³ Tataro ibukia tabemwaang ni mwanewei araia. Ti kona ni karaoa anne e ngae naba ngkana ti tuai ni kaitiboo ma ngaiia. N te katoto, iangoiia tarira ma mwaanera ake a kabureaki n aaba aika Crimea, Eritrea, Rutia, ao Singapore. Ko kona n nori araia n jw.org naake a kabureaki ngkai.c E kangai te mataniwi n te aono ae Brian: “I a tia n noria ae ngkana I korei ao n atongi araia ni kabaibati taari n te onimaki ake a kabureaki, I kona n ururingnga iai ao ni mwaneweia n au tataro.”

14-15. Ti na kangaa ni kona n taekin raoi baika ti kan tataroi?

¹⁴ Taekin raoi baika ko kan tataroi. E anga ana ibuobuoki Michael are e taekinaki mai mwaina ni kangai: “Ngke I wareki rongorongoia taari mwaane n jw.org ake a kabureaki, ao I kataia ni kataamneia bwa e na tera au namakin ngke arona bwa ngai ngaiia. Ni koauana N na bon raraomaeakina buu, ao I tangiria bwa e na tararuaaki raoi. N te aro anne, I a ataia bwa tera ae N na taekinna raoi n au tataro ibukia taari mwaane ake a kabureaki ake iai buuia.”​—Ebera 13:​3, kbn.

¹⁵ Ngkana ti iaiangoi aroia ni katoabong taari mwaane ake n te karabuuti, ti kona naba n nori iai baika ti na kona n taekin raoi n ara tataro. N te katoto, ti kona n tataro bwa a na kaotiota te akoi taan tararuaiia buure, ao a na aki tutuka te taromauri naake taani kairiri. (1Tim. 2:​1, 2) Ti kona n tataroia bwa a na kaungaaki kaain aia ekaretia naake a kabureaki n aia katoto, ke tao a bia ongora n ara rongorongo naake tiaki taani kakoaua ake a nori raoiroin aroaroia taari ake a kabureaki. (1Bet. 2:12) Ti na buokaki n aekan iango akanne bwa e na tera ae ti na tataroia ibukia tarira ao mwaanera ake a nanomwaaka i aani kataakia. Ngkana ti kamatairikira, ti mwanewei araia n ara tataro, ao n taekin raoi baika ti kan tataroi, ti a kaotia iai bwa ti ‘kabatiai ara tangira i marenara.’​—1Tet. 3:12.

TE IANGO AE RIAI IBUKIN ARA TATARO

16. Ti na kangaa ni kateimatoa te iango ae riai ibukin ara tataro? (Mataio 6:8)

¹⁶ N aron ae ti a tia n noria, a kona ara tataro ni karekea te bitaki nakon te aomata temanna. Ma e ngae n anne ti riai naba ni bwaina te iango ae riai. Ngkana ti tataro, ti aki tuanga Iehova te bwai ae e tuai n ataia, ke tao ti reireinna arona ni kanakoraoa te kangaanga teuana. E atai kainnanoia ana toro Iehova imwain ae a ataia ke ti ataia. (Wareka Mataio 6:8.) Bukin tera bwa ti riai ngkanne n tataro ibukia tabemwaang? Irarikini bukina ake a a tia n taekinaki n te kaongora aei, bon te bwai naba ae a kakaraoia aomata aika tabeakinia tabemwaang. E kairira te tangira bwa ti na tataro ibukia raora n tatabemania nako. Ao e kimwareirei Iehova n noriia ana toro ni kaotiota ana tangira.

17-18. E kangaa ni kaikonakaki ara tataro ibukia raora n te onimaki?

¹⁷ E ngae ngkana e taraa n ae e aki karekea te bitaki ara tataro, ma e oti iai ara tangira ibukia tarira ma mwaanera, ao e nora anne Iehova. Ti kona ni kaikonakia ni kangai: Iangoa te utu teuana ma natiia aika uoman, ae te mwaane ao te aine. E wene n aoraki are te mwaane. Ao e a bubutiia tamana are te aine ni kangai: “Taiaoka ma buoka mwaaneu. E a rangi n aoraki!” E a kaman ataia te karo arei ae e a riaon ana konaa te kangaanga, e tangira natina ao e kan tararuaia raoi. Ma e boni kukurei te karo aei n noran natina te aine ae e rangi n tabeakina naba mwaanena ao e bubutiia tamana bwa e na buoka mwaanena.

¹⁸ Anne te bae e kaungaira Iehova bwa ti na karaoia, ti na tabeakinira i marenara ao n tataro ibukia raora n tatabemania nako. Ngkana ti karaoa anne, e na oti n ara tataro ae ti rangi n tabeakinia tabemwaang, ao e nora anne Iehova. (2Tet. 1:3; Ebera 6:10) N aron naba ae ti a tia ni maroroakinna, a kona naba ara tataro ni karekea te bitaki. Ngaia are ti bia ururingnga n tataro ibukia raora n tatabemania nako.