Ko Uringnga?
Ko a tia ni wareki raoi kaongora man Te Taua-n-Tantani ibukin te ririki aei? Noria ngkana ko kona ni kaekai titiraki aikai:
Tera ae kairira bwa ti na neboa Iehova?
Ti karaoa anne ibukina bwa ti rangi ni karinea Iehova ao ti rangi n tangiria. Ao ti neboia naba ibukina bwa ti tangiriia tabemwaang bwa a na kinaa.—w25.01, i. 3.
Ngkana iai ae kaunira, ti na kangaa ni kona ni kai kabwarai buure?
Ti aki riai n tii kakeaa marakira, ma ngkana ti boni katoka unra ao marakin nanora, ti na buokaki iai bwa ti na aki rotakibuaka n te marakinnano.—w25.02, i. 15-16.
Bukin tera ngkai bon te banna ni katoto ae raoiroi nakoia taari mwaane aika ataei, te tia rimwini Kristo are Mareko?
E tauraoi Mareko ni butimwaea mwiokoana ae te beku ibukia tabemwaang. E ngae ngke tao e maraki nanona ao n un ibukin te bwai teuana ae riki, ma e bon aki katoka ana beku Mareko. E karikirakea ana iraorao ae kaan ma Bauro ao naake a ikawai n te onimaki.—w25.04, i. 27.
Tera ae nanonna Iesu ngke e tataro ni kangai: “I a tia ni kaotiota aram nakoia”? (Ioane 17:26)
A a kaman ataa aran te Atua taan rimwina. Ma e kaota Iesu nakoia bwa te aekaki n Aomata raa Iehova, n ikotaki ma ana kantaninga, baika e karaoi, ao aroarona.—w25.05, i. 20-21.
Tera ae ti ataia ngkana ti nanorinano?
Ti ataia ae iai bwaai tabeua aika ti aki atai. N te katoto, ti aki ataia bwa e na roko n ningai te toki ke e na tera ae e na karaoia Iehova n te tai anne. Ti aki naba ataia bwa tera ae e na riki ningabong ke tera aroni kinaakira iroun Iehova.—w25.06, i. 15-18.
Tera ae kona ni buokira ni kakabwaiaaki man te kaongora ke te kabwarabwara teuana?
Ti kona n titirakinira ni kangai: ‘Tera te bwai ni kakoaua ae kamanenaaki ni kaungaia taan ongora? Iai te kabotau ae anainano ae I kona ni kamanena ngkana I angareirei? Antai ae kan ongora n te reirei aei?’—w25.07, i. 19.
Tera reireiara man aron te Atua ni kabwaraa ana bure Tawita?
E ngae ngke e karaoi buure aika kakaiaki Tawita ma e bon raira raoi nanona ao e kabwaraaki ana bure iroun Iehova. (1Uea 9:4, 5) Ngkana e kabwaraa te bure te Atua, e aki manga tataua mwin ana bure te tia bure ke ni manga kaokiokia imwina riki.—w25.08, i. 17.
Ngkana e kangaanga otan te aomata ae reirei n te Baibara n te reirei teuana, tera ae ko kona ni karaoia?
Ngkana e kangaanga otana n te reirei teuana e ngae ngke ko a tia ni kataia n reireinna raoi man te Baibara, tai tiku i aona ma waakinako ao baireia bwa kam na manga okiria imwina.—w25.09, i. 24.
E taekinaki n te Baibara bwa iai “mwaakan te bure ae mwamwanaa te aba.” (Ebera 3:13) N te aro raa?
E kona te bure n ananaa nanora nakoni karaoani mwakuri aika kairua. E kona ni mwamwanaira bwa ti na teimatoa n raraoma bwa e tangirira raoi te Atua ke e aki.—w25.10, i. 16.
Baikara bwaai aika tenua aika kona ni kanakoraoa riki ara tataro?
(1) Ti kona n iaiangoi aroaron Iehova. (2) Ti kona n iaiangoi baika ti rinanoi ao ni mwaneweia n ara tataro, n aron ae tao ti tangiria ni kabwaraa ana bure temanna. (3) Ti kona ni kaananaua ara tataro. Karaoan aei ti a kona iai ni kaotii iai ara iango aika raba.—w25.10, i. 19-20.
Ti na kangaa ni kona ni buokiia kaara?
Ti kona ni kawariia ke n tareboonia naake a kara. Ti kona naba n iriia nakon te onnaoraki. Ke ti kona n toa ma ngaiia n iteran nako te mwakuri ni minita aika kakaokoro.—w25.11, i. 6-7.
Baikara baika kakawaki n ana mare te Kristian ae e na neboaki iai te Atua?
Ongeaba n ana kaetieti te tautaeka. Taraia raoi bwa e na kaotiotaki uaan taamnein te Atua n te taromauri ni mare ao n te botaki ni mare. Bwaina te aro ae riai n oneam ao taraia raoi bwa ko na rarawa nakoni katei aika bobuaka ma te Baibara. Mamaroro raoi n ami tai ni kakatauraoi nakon ami mare.—w25.12, i. 21-24.