E Aera Ngkai A Mate Aomata?

Ana kaeka te Baibara

E bon riiriki ae ko na iangoia bwa e aera ngkai a mate aomata, riki ngkana e mate temanna ae ti rangi ni kaan ma ngaia. E kangai te Baibara: “Te kainnewa ae karika te mate bon te bure.”​—1 I-Korinto 15:56.

E aera ngkai a bure aomata ni kabane ao ni mate?

A kabuaa maiuia moan aomata ake Atam ma Ewa ibukina bwa a bure nakon te Atua. (Karikani Bwaai 3:17-19) E reke nakoia te mate bwa mwin aia karitei nakon te Atua, bwa boni ngaia “nibwan te maiu.”​—Taian Areru 36:9; Karikani Bwaai 2:17.

A a ituaki kanoan Atam ni kabane irouna ni mwin te bure. E kangai te Baibara: “Aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.” (I-Rom 5:12) A mate aomata ni kabane ibukina bwa a bane ni bure.​—I-Rom 3:23.

Aroni kamaunaan te mate

E beritana te tai teuana te Atua are “e na onga [iai] te mate n aki toki.” (Itaia 25:8) Ngkana e na katoka te mate, e riai moa ni kamauna te bure are karika te mate. E na karaoa aei te Atua rinanon Iesu Kristo are “kamaunai aia bure kaain te aonnaba.”​—Ioane 1:29; 1 Ioane 1:7.