E a Tia ni Bitaki te Baibara ke ni Kamangaoaki Kanoana?

E tuai. Ngke a kabotauaki taian nira ni boki ake rimoa ao e oti bwa e bon aki bitaki te Baibara i nanon iranga ma iranga te ririki ni kaeweweaki i aoni baika a kai mauna.

Nanona bwa akea kairua ngke e kaeweweaki?

Nga ma nga nira Baibara nikawai ake a a tia ni kuneaki. Iai tabeua baika kaokoro aika noraki ni Baibara aikai, ae oti iai bwa iai kairua aika riki n te kaewewe. Angini kairua aikai boni baika uarereke ao a aki bita nanon te koroboki. Ma bon iai naba baika kakawaki aika kuneaki bwa a kaokoro, ao tabeua mai iai a boni bitii taan rairai ake rimoa bwa a aonga ni bita ana rongorongo te Baibara. Iangoi katoto aika uoua aikai:

1. N 1 Ioane 5:7, tabeua rairai n te Baibara rimoa a karin taeka aikai: “i karawa, te Tama, te Taeka, ao te Taamnei ae Raoiroi, ao bon tii temanna naaka teniman aikai.” Ma e oti n nira ni boki aika eti raoi bwa bon akea taeka aikai n te Baibara nikawai. A a tibwa karinaki imwina riki.a Ngaia are Baibara ni boong aikai aika eti raoi a aki karin taeka aikai.

2. E kaoti aran te Atua nga ma nga te tai ni Baibara nikawai ake taian nira ni boki. Ma e ngae n anne, a mwaiti Baibara ake a onea mwina nakon nakoa aika te “Uea” ke te “Atua.”

Ti kangaa ni koaua raoi bwa ai akea ngkai te kairua ae kona ni manga reke?

A rangi ni mwaiti ni boong aikai taian nira ni boki aika a tia ni kuneaki, ao e a bebete riki ngkai noran te kairua.b Tera ae noraki ni kaineti ma etirurun te Baibara ni boong aikai, ngke a tia n tuoaki ao ni kabotauaki baikai?

• E taekina ae kangai te tia rabakau ae William H. Green ni kaineti ma te Koroboki ae Tabu n te Taetae n Ebera (ae ataaki riki n arana ae te “O Tetemanti”): “E boni kona n taekinaki bwa akea te koroboki rimoa ae eti raoi aroni kaeweweana nakon aei.”

• Ni kaineti ma te Koroboki ni Kristian ae Tabu n te Taetae ni Kuriiti, ke te “Nu Tetemanti,” e korea ae kangai te tia rabakau i aon te Baibara ae F. F. Bruce: “A a rangi ni bati riki ngkai bwaai ni kakoaua ibukin te koroboki ae n te Nu Tetemanti, nakoni bwaai ni kakoaua ibukini koroboki tabeua ake a tanoata taekaia. Ao akea ae e na iangoa waeani koroboki aika tanoata taekaia aikai.”

• E taekinna naba Sir Frederic Kenyon, ae te tia rabakau i aon Baibara nikawai, bwa “e kona temanna n taua te Baibara ni baina ao n aki maaku ke n nanououa n taekinna bwa e bon taua Ana Taeka te Atua ni koaua, ae kaeweweaki man te roro teuana ma teuana i nanoni bubua ma bubua te ririki.”

Baikara riki bukina tabeua aika ti kona ni kakoauaa iai bwa e boni kaeweweaki te Baibara n te aro ae eti raoi?

• Taani kaewewe aika I-Iutaia ao Kristian a kaoki rongorongon aia kairua aika kakaiaki ana aomata te Atua.c (Warekaia Iteraera 20:12; 2 Tamuera 11:2-4; I-Karatia 2:11-14) A kaoki naba rongorongoni kabuakakaan te natannaomata ae Iuta ibukin aia aki ongeaba, ao rongorongoni koaua aika karioaki mairouia aomata. (Otea 4:2; Maraki 2:8, 9; Mataio 23:8, 9; 1 Ioane 5:21) Ni kaewean rongorongo aikai n te aro ae eti raoi, a kaotia iai taani kaewewe aikai bwa a kona n onimakinaki, ao e rangi ni kakawaki irouia Ana Taeka te Atua ae tabu.

• Tiaki ngkanne e riai kakoauaan ae ngkai te Atua e kaira korean te Baibara n te moantai, e na boni kateimatoa naba etin te Baibara?d (Itaia 40:8; 1 Betero 1:24, 25) E kantaningaia bwa a na kakabwaiaaki iai tiaki tii aomata ake ngkoa ma aika ni boong aikai naba. (1 I-Korinto 10:11) Ni koauana, “bwaai ni kabane ake a koreaki ngkoa, a koreaki ibukin reireiara, bwa ti aonga ni karekea te kantaninga rinanon nanomwaakara, ao rinanon te kabebeteaki man te Koroboki ae Tabu.”—I-Rom 15:4.

• A mwanewei Iesu ma taan rimwina taeka ake ni katoton te Koroboki ae Tabu n te Taetae n Ebera, ao a aki iangoia bwa e kairua ma koroboki nikawai.—Ruka 4:16-21; Mwakuri 17:1-3.