Bukini Kainnanoan te Atua

A tuangira taan rabakau i aoni marurungin te iango bwa ngkana a kani karekea te marurung ni koaua aomata, a boni kainnanoi baika bati riki i rarikin ake a kainnanoi ibukini marurungin rabwataia. Ti nora te koaua n aei bwa a kani karaoa te bwai teuana ae iai te kantaninga iai ibukini kakaaean raun nanoia ni mwakuri aika manena, tiaia ke koaua aika kakawaki riki nakoni baike a kainnanoi ni katoabong. Ibukini ngkanne katokan nanoia n anne, a a kabanei aia tai ni kaokirii tabeman ni kakukureiia n te korobanna, te katangitang ao a a bati riki. Mangaia are angiia aomata aikai, a bon aki karekea te raunnano ae korakora ke ae teimaan n tiaia akanne.

A aki mimi te koraki ake a wawareka te Baibara n te koaua ae a bungiaki aomata ma te ingainga n tangiri bwaai n taamnei. E kaotaki ni moani mwakoroni Karikani Bwaai bwa imwini karikaia te moan taanga iroun te Atua, ao e aki toki n taetae ma ngaiia ike e a kariaia iai moanakin aia iraorao ma ngaia. (Karikani Bwaai 3:​8-10, BG) E aki karikiia aomata te Atua ae aia tia Karikiriki bwa a na inaomata mairouna ngkai a kainnanoa reitakia ma ngaia. E aki toki n taekinaki te bwai ae a kainnanoia aei n te Baibara.

N te katoto, e taku Iesu: “A a kukurei akana ataia bwa a kainnanoa te Atua.” (Mataio 5:3) Ti kona ni motinnanoia man taeka akanne bwa e rangi ni kakawaki katokan nanora ibukin ataakin te Atua, bwa e karekea te raunnano ao te kukurei ni maiura. Ti na kanga ni karaoa anne? E kamataataa te kaeka Iesu ngke e kangai: “E aki riai ni maiu te aomata n tii te amwarake, ma e na maiu naba n taeka nako aika otinako mai win Iehova.” (Mataio 4:4) N aaro raa ae e kona n reke iai iroura te maiu ae kakukurei ma n rangi ni manena man ana taeka te Atua ao ana kaetieti? Ti na rinanoi baika a kakawaki aika tenua.

Ti Kainnanoa Ana Kaetieti Aika Raraoi

A rangi ni bati taan rabakau ni boong aikai ao aika bubura aia beeba aika a tauraoi n anga te taeka n reirei ni kaineti ma te iraorao, te tangira, te maiu n utu, aroni katokan te itabarara, karekean te kukurei ao ai manenan te maiu. Ma e ngae n anne, antai te aomata ae te kabanea ni mwaatai ae kona n anga kaetieti aika manena ma n riai n aaro akanne ni kabane, ngkana ngaia bwa tiaki te tia Karikiia aomata ae Iehova ae te Atua?

Aio kabwarabwaraana: Ngkana ko kabooa te bwai ae boou n aron te bwai n rawetaamnei ke te kaombiuta, ko kantaningaia bwa e na airi ma bokina ae kabwarabwaraa aroni kamanenaana ae moan te tamaroa ke ni manena. E kona ni kabotauaki te Baibara ma te boki anne. Bon te boki ibukini maiun te aomata are e katauraoia te Atua ae te tia karaoia bwa ti na kamanena. E kabwarabwaraaki nakoia “taani kamanena te boki” aei bukini karaoana ao aroni kamanenaana n te aro ae na karekei uaa aika moan raraoi.

N aron te boki ae karauaki raoi ni koreaki kaetieti i nanona, a kauringaki naba n te Baibara taani warekia ni kaineti ma mwakuri aika kona n urui maiuia. A kona tabemwaang n anga te taeka n reirei ae kaokoro ae taraa ni bebete riki touani mwina, ma e koaua bwa e aki eti iangoan ae ti na boni karekei uaa aika moan raraoi ao n totokoi kangaanga ngkana ti tou mwin ana kaetieti te tia Karikiira?

E ngae ngkai e anganira Iehova ae te Atua tuua ao kaetieti, ma e bon aki kairoroira bwa ti na butimwaei. Ma ibukina bwa e tangirira ao e kani buokira, e bubutiira ma te tangira ni kangai: “Bon Iehova ae Atuam Ngai, ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai. Ko bia kaman iri nanon au tua nako! Ao ai aron te karanga raun nanom iai, ao ai aron naoni marawa am raoiroi.” (Itaia 48:​17, 18, BG) E nanonaki n aei bwa e na bon nakoraoi maiura ngkana ti mutiakin ana kaetieti te Atua. N taekinana n te itera riki teuana, ti boni kainnanoa te Atua ngkana ti na kanakoraoa maiura ao ni kukurei.

Ti Kainnanoa Kanakoraoan Ara Kangaanga ni Maiura

A iangoia tabeman bwa a aki kainnanoa te Atua ibukina bwa a kaaitara ma titiraki aika kaminonano aika aki boraoi ma te koaua ae e tatangira te Atua. N te katoto, a kona n titiraki ni kangai: ‘E aera bwa a karawawataaki aomata aika raoiroi?’ ‘E aera bwa a bungiaki ni bwaibwainnanti ataei tabeman ngkai akea aia bure?’ ‘E aera bwa e a rangi ni korakora te ribuaka n te maiu aei?’ Ni koauana, akanne titiraki aika kakawaki ao ngkana a reke kaekaaia aika karaunano, e na rangi ni kanakoraoaki iai maiura. Ma n oneani mwin are ti na waekoa ni bukina te Atua n rikini kangaanga akanne, ti na nora aroni kamatataan te iango aei n Ana Taeka te Atua ae te Baibara.

Ni Karikani Bwaai mwakoro tenua, ti nora iai rongorongon Tatan are e karikia bwa te naeta ngke e kakorakoraa ni kairiia te moan taanga bwa a na urua ana tua Iehova ae te Atua, ni kaineti ma aki kanakin uaan te kai n ataa te raoiroi ma te buakaka. E taku Tatan nakon Ewa: “Kam na bon aki mate: ba E ataingkami te Atua ba n te bong ae kam na kanna iai, ao a na kaureaki matami, ao kam na riki ba kaanga te Atua n ata te raoiroi ma te buakaka.”​—Karikani Bwaai 2:​16, 17; 3:​4, 5, BG.

N taekinan anne iroun Tatan, e aki tii taekinna iai bwa te tia kewe te Atua ma e bon nanonna naba bwa e ribuaka n arona n tautaeka. E kamatoaa n taekinna te Riaboro bwa ngkana a ongeaba irouna aomata, a na bon nakoraoi bwaai ni kabane. A na kanga ni katokaki kangaanga akanne? E baireia Iehova bwa e na anga te tai ae tau bwa a aonga n ataia aomata nako bwa a koaua ke a kewe taeka ni bukibuki ibukina. N etina, E angan Tatan ma ake a tei n ana itera aia tai ni kaotia bwa a kona n nakoraoi maiuia aomata n akea ana kairiri te Atua ke a aki.

Tera ngkoe am iango ibukini kaekaan ana taeka Tatan? A kona aomata ni maiuraoi ao n tautaekania n te aro ae kakukurei n akea ana kairiri te Atua? Aikai bwaai ni kakoaua aika katereterea raoi bwa a rangi ni kabwaka aomata n tautaekania n akea ana kairiri te Atua aika a karawawataia i nanon tienture aika bati: te rawawata, te ribuaka, te aoraki, te mate n ikotaki naba ma te tiritiri, kerikaakin te aroaro ni maiu ae riai, buaka, tiringan te reeti teuana ao ai aaro n tiritiri riki tabeua. N oneani mwin are e na taekinaki te Atua n te Baibara bwa e riai ni bukinaki n rawawata aika taonia aomata, e katerea raoi bukin rikini baikanne ni kangai: “E taua aron te aomata temanna te aomata temanna ni karekea oini kaina iai.”​—Te Minita 8:​9, BG.

Ni kaineti ma mataatara n aei, ti aki ngkanne ota raoi bwa ti riai n okira te Atua tiaki tii ibukini kaekaan titiraki aika katabeaiangaia aomata ma ibukin naba katokaia? Tera ae na karaoia te Atua?

Ti Kainnanoa Ana Ibuobuoki te Atua

A a kaman ingainga aomata ni kani kainaomataaki man te aoraki, te kara ao te mate. A a tia ni kabanea te tai ae bati, korakoraia ao kaubwaia ibukini uaiakinan aei ma e aki reke te bwai ae a kantaningaia. A kakoauaa tabeman bwa a aki kona ni kara ngkana a nim bwainnaoraki tabeua, a kamarurung ao a tabunea. E a tia n noraki bwa a kabwaranano aeka n iango aikai ni kabane.

E tangiriia aomata te Atua bwa a na nakoraoi maiuia ao ni kukurei. Bon aei ana moani kantaninga ibukini karikaia aomata ao e bon aki mwanuokinna. (Karikani Bwaai 1:​27, 28; Itaia 45:18) E karau nanora Iehova ae te Atua bwa e na bane ni kakoroi bukini bwaai ake e iangoi bwa e na karaoi. (Itaia 55:​10, 11) Ti tuangaki taekan ana berita te Atua n te Baibara bwa e na kaoka te Bwaretaiti are e bua irouia te moan taanga. Ti nori taeka aikai ni kabaneani bokin te Baibara: “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.” (Te Kaotioti 21:4) E na kanga ni karokoi aaro aika rangi n tamaroa aikai te Atua ao ti na kanga ni kona ni kakabwaiaaki man te berita aei?

E reireinia taan rimwina Natin te Atua ae Iesu Kristo bwa a na tataro ibukini kakororaoan nanon te Atua. A bati aomata aika rangi n ataa te tataro anne ke n okioki n tataroia are a aranna tabeman bwa Ana Tataro te Uea. E kangai taekana: “Tamara are i karawa, e bia katabuaki aram. E bia roko am tautaeka n uea. E na kakororaoaki nanom i karawa ao n te aonnaba naba.” (Mataio 6:​9, 10) Eng, e na bane ni kamaunai rawawata Iehova ae te Atua ao ni karokoa te aonnaba ae mena iai te raoiroi are e beritanna rinanon Ana Tautaeka n Uea.a (Taniera 2:44; 2 Betero 3:13) Tera ae ti riai ni karaoia bwa ti aonga ni kakabwaiaaki man ana berita te Atua?

E kaota te kawai ae bebete Iesu Kristo ae ti riai n toua ni kangai: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” (Ioane 17:3) Eng, ti kona ni karekea te maiu n aki toki n te waaki ae boou ae beritanaki man ana ibuobuoki te Atua. E kona ni kairiko te kantaninga anne bwa ko na kakoauaa ae iai bukina ngkai e na kaekaaki te titiraki riki teuana ae Ti kainnanoa te Atua?

Aio te Tai n Onimakina te Atua

E taekina aei te abotoro Bauro uoua te nga te ririki n nako n te Areiobako ke te Maunga are Mars i Atenai ibukin te Atua nakoia kaain Atenai ake a bon ukeri oin aia iango: “Boni ngaia ae anga te maiu ma te ikeike ao bwaai ni kabane nakoia aomata nako. Bwa boni ngaia ae ti maiu irouna ao ti kakammwakuri, ao iai ngaira, n aron are a taekinna tabeman taani kario i buakomi ni kangai, ‘Boni kanoana naba ngaira.’ ”​—Mwakuri 17:​25, 28.

E teimatoa ni koaua te bwai are e taekinna Bauro nakoia kaain Atenai. E katauraoa te ea ae ti ikeikenna te tia Karikiriki, te amwarake ae ti kanna ao te moi ae ti nimma. Ti bon aki kona ni maiu n akea baika raraoi ake e a tia ni katauraoi Iehova ibukini kateimatoaani maiura. Ma e aera bwa e teimatoa te Atua ni katauraoi bwaai akanne ibukia aomata ni kabane, e ngae naba ngkai a iaiangoia ke a aki? E taekinna Bauro bwa a riai ni karaoa anne “bwa a aonga n ukoukora te Atua, ma ni kakorakoraia bwa a aonga ni kunea. Ma n etina, e bon aki raroa mairoura n tatabemanira nako.”​—Mwakuri 17:27.

Ko kani kinaa riki te Atua ae nanona bwa ko na reiakina ae bati riki ibukin ana kantaninga, ao ana taeka n reirei ibukini kanakoraoani maium ngkai ao n aki toki? Ngkana ngaia anne, ko a kaumakaki bwa ko na tuanga te aomata ae anganiko te maekatin aei ke reitaki ma naake a boreetia. A na boni kukurei ni buokiko.