Tera Manenani Maiura?
Ana kaeka te Baibara
E kona n tabekaki te titiraki ni kaineti ma manenani maiura n aanga aika bati n aron ae, E aera ngkai ti mena ikai? ke Iai raoi te kantaninga ni maiuu? E kaota te Baibara ara kantaninga n te maiu bwa ti na karikirakea ara iraorao ma te Atua. Iangoi tabeua koaua aika kakawaki aikai, aika e kaotii te Baibara.
Te Atua bon ara tia Karikiriki. E kangai te Baibara: “Bon [te Atua] ae e karaoira ao tiaki ngaira.”—Taian Areru 100:3; Te Kaotioti 4:11.
Iai ana kantaninga te Atua ibukini bwaai nako ake e karikii, n ikotaki naba ma ngaira.—Itaia 45:18.
E karikira te Atua ma ‘kainnanoana’ iroura, ao kan ataakini manenani maiura. (Mataio 5:3) E tangiria bwa a na rauaki nanora ni baika ti tangiri.—Taian Areru 145:16.
A rau nanora ni kaineti ma kainnanoan te Atua iroura man arora ni karikirakea ara iraorao ma te Atua. E ngae ngkana iai tabeman aika a iangoia bwa e kangaanga te riki bwa raoraon te Atua, ma e kaungaira te Baibara ni kangai: “Kaania te Atua, ao ane e na kaaningkami.”—Iakobo 4:8; 2:23.
Ngkana ti na riki bwa raoraon te Atua, ti riai ni maiuakina ae boraoi ma ana kantaninga ibukira. E taekinaki ana kantaninga aei n te Baibara n Te Minita 12:13 ae kangai: “Karinea te Atua ao ongeaba n ana tua nako, bwa bon aei bukini karikara ni kabane.”—Good News Translation.
N te tai ae e na roko ao ti nang kona n nora raoi ana moani kantaninga te Atua ibukira, ngkana e a kamauna te rawawata ao ni karekea te maiu ae aki toki nakoia raoraona, ake taan taromauria.—Taian Areru 37:10, 11.