Ana Iango te Baibara i Aon te Buuraure ao te Raure

E kantaningaiia ake a a tia ni mare Iehova bwa a na teimatoa ni kakaonimaki nakon aia berita ni mare. Ngke e moani mareia te moani mwaane ao n aine Iehova ao e taku: “E na nim ma buna [te aomata]: ao a na riki n ti te irikona nakai.” Imwina riki e a manga taekina anne Iesu Kristo ao n raonna riki ni kangai: “Mangaia ae ane e botiia te Atua ao ke a tai karaureia aomata.” (Karikani Bwaai 2:24, BG; Mataio 19:3-6) Mangaia ae a iangoa te mare Iehova ao Iesu bwa te reitaki ae na teimatoa, ae e na tii toki ngkana e mate te rao temanna. (1 I-Korinto 7:39) Kioina ngkai e baireaki te tekateka ni mare iroun Iehova, e aki riai n iangoaki te buuraure bwa te bwai ae bebete karaoana. Ni koauana, e ribaa te buuraure Iehova n akea bukina ae riai ae boto i aon te Baibara.—Maraki 2:15, 16.

Tera bukin te buuraure ae riai n te Baibara? E bon ribaa te wene ni kimoa Iehova ao te wene ni bure. (Karikani Bwaai 39:9; 2 Tamuera 11:26, 27; Taian Areru 51:4) Ni koauana, e taraa te wene ni bure bwa e rangi ni kammaira, ngaia are e a kariaia iai te buuraure. (Ibukini maroroakinani baika irekereke ma te wene ni bure, nora Mwakoro 9, barakirabe 7, ae kabwarabwaraaki iai te wene ni bure.) E kariaia Iehova bwa e na boni baireia te aomata are aki wene ni bure bwa e na teimatoa n tekateka ma buuna are wene ni bure ke e na buuraure. (Mataio 19:9) Mangaia ae ngkana e baireia te rao are aki bure bwa e na buuraure, e aki ribaa te buuraure anne Iehova. Ma e ngae n anne, a aki riai kaain te ekaretia ni kaungaa te aomata temanna bwa e na buuraure. Ni koauana, e kona n iai bwaai tabeua ake e kan teimatoa iai te rao ae aki bure n tekateka ma buuna are e a tia ni wene ni bure, ai moarara riki ngkana e raraoma ni koaua buuna. Ma e ngae n anne, a bon riai ni karaoi aia motinnano naake e boto aia buuraure i aoni bukina ae riai man te Baibara, ao ni butimwaei naba mwina ake tao a na kaoti rimwi.—I-Karatia 6:5.

Iai waaki tabeua aika kakaiaki ake a baireia Kristian tabeman bwa a kona n raure iai ke ni buuraure ma buuia, e ngae ngke e aki wene ni bure. N aekaki aikai, ao e tua te Baibara bwa te buu are nako, e na “tiku na aki manga mare . . . ke e na manga iooki.” (1 I-Korinto 7:11) E aki inaomata te Kristian anne ni kakaaea raona temanna ibukin iangoan te manga mare. (Mataio 5:32) Iangoi bwaai tabeua aika kakawaki aikai ake a iangoia tabeman bwa e boto iai raureia.

Akean te nano ni kani boutoka. A kona n rangi ni maiu ni kainnano kaain te utu ibukina bwa akea irouia baika a rangi ni kainnanoi ibukin te maiu, bwa e kabwaka ni karekei te buu te mwaane e ngae ngke e boni kona ni karekei. E taku te Baibara: “Ngkana iai temanna ae e aki karekei kainnanoia . . . kaaini batana, ao e kakeaa te onimaki ao e buakaka riki nakon te aomata ae aki onimaki.” (1 Timoteo 5:8) Ngkana e rawa te mwaane anne ni bitii arona, e kona ngkanne ni baireia te aine bwa e kainnanoa kamanoana ma natina, n arona ni karekea kariaiakan ana raure n te tua ma bon tiaki te buuraure. A bon riai unimwaanen te ekaretia n rinanoa raoi bukinan te Kristian are e rawa ni boutokaa ana utu. E kona ni kabaneaki te aomata ae rawa n tabeakina ana utu.

Te iowawa n te aro ae riao. E kona n iowawa n te aro ae riao te buu temanna n te aro are e a rotakibuaka iai marurungini buuna ao e a kona ni kabuanibwai maiuna. Ngkana bon te Kristian ae karaoa ae iowawa, a riai ni kakaaea raoi koauan aei unimwaanen te ekaretia. E kona ni karekea te kabaneaki man te ekaretia te boo n un ao te mwakuri n iowawa.—I-Karatia 5:19-21.

Tukan te buu man ana taromauri. E kona te buu temanna ni kataia n tutuka aron ana taromauri ae koaua buuna, ke ni kataia ni kairoroa bwa e na urua ana tua te Atua n aanga tabeua. Ngkana e riki anne, e kona te buu are kakamaakaki ni baireia bwa e na raure ngkana e taku bwa te raure bon tii ngaia ana anga ae e na kona iai n “ongeaba iroun te Atua bwa te tia tautaeka, nakon ae [e] na ongeaba irouia aomata.”—Mwakuri 5:29.

Ni kaineti ma aeka ni waaki aikai ni kabane n aron ake a a tibwa maroroakinaki, akea ae riai ni kairoroa te buu are akea ana bure, bwa tao e na raure ke e na tiku n tekateka. E ngae ngke a kona n anga aia ibuobuoki raoraona aika ikawai n te onimaki ma unimwaane ao aia taeka n reirei aika boto i aon te Baibara, ma a aki kona naakai n atai bwaai ni kabane aika riki i marenaia taanga. Tii Iehova ae kona n nora aei. E bon aki karinea te Atua ke te babaire n te mare te aine ae te Kristian, ngkana e karakarakai taekan ana kangaanga bwa e aonga n raure ma buuna, ao ai arona naba ma te buu te mwaane. E atai iango nako Iehova ake e bairei temanna ni kaineti ma raurena, e ngae ngke e kataia ni karabaa. Ni koauana, “a bane na aki karabaaki bwaai ao a tangaina ma n ootara i matan teuare ti nang anganna taekan arora.” (I-Ebera 4:13) Ma ngkana e reitinako te kangaanga i nanon te tai ae maan, akea ae riai ni kabuakakaa te Kristian are e motikia bwa e na raure kioina ngkai e taku bwa ai akea riki ana anga. Bwa n tokina ao “ti na bane n tei i matan ana bao ni motikitaeka te Atua.”—I-Rom 14:10-12.