Arom ni Kakabwaiaaki Man Am Kurubu Ibukin te Mwakuri ni Minita
1. Baikara kakabwaia n te babaire ibukin te Reirei n te Boki n te Ekaretia aika ti kona naba ni karekei man ara kurubu ibukin te mwakuri ni minita?
1 Ko a tia n aki irira iteran te botaki ibukin Te Reirei n te Boki n te Ekaretia? E karako mwaitiia kaain te kurubu n te aro are e aki mangaongao. E bebete iai karikirakean te iraorao ae nibwani kakorakoraakin ara onimaki. (TaeRab. 18:24) E kona iai te mataniwi ibukin te reirei n te boki n atai ara kangaanga n tatabemanira nako ao ni kona ni katauraoa kaungaakira. (TaeRab. 27:23; 1Bet. 5:2, 3) Ti kona naba ni karekei kakabwaia aikai rinanon ara kurubu ibukin te mwakuri ni minita.
2. Ti na kanga ni biririmoa ni karekea ara iraorao ma tabemwaang n ara kurubu ibukin te mwakuri ni minita ae nibwani kakorakoraakin ara onimaki?
2 Biririmoa ni Karekea Am Iraorao ma Tabemwaang: Titeboo mwaitiia kaain te kurubu ibukin te mwakuri ni minita ma kaain te kurubu ibukin te reirei n te boki. Ngkana ti “uaia ni kakorakoraira” ni karaoa te mwakuri ni minita ma tabemwaang, ti kona iai ni karekea te iraorao ae kaan. (IBir. 1:27) Iraman ae ko a tia n toa ma ngaiia n am kurubu? Ko kona ni ‘kamwaawa nanom’ ibukin aei? (2Kor. 6:13) Irarikin anne, ti kona n tabetai ni kaoa temanna man ara kurubu bwa e na ira ara Taromauri n Utu n te tairiki ke ti na amwarake ma ngaia. A katauraoa te amwarake ibukin te tia kabwarabwara ae te iruwa, kaaini kurubu nako ibukin te mwakuri ni minita n ekaretia tabeua. N te wiki are a mwakuri iai ma teuanne, ao e reke aia tai ni botaki n amwarake ike e a reke iai te ikaungaunga i marenaia n aki ongeia bwa e tiku n amwarake i rarikia te tia kabwarabwara ae te iruwa ke e aki.
3. Baikara aanga aika ti na karekea iai te kairiri n ara kurubu ibukin te mwakuri ni minita?
3 E ngae ngke ai tii uoua te tai ni bobotaki n te ekaretia i nanon te wiki, ma e aki nanonaki iai bwa e na bitaki aron te kairiri nakoia taan uarongorongo. A rineaki mataniwini kurubu nako bwa a na angania kaain te kurubu n tatabemania nako, kaungaaia ao kataneiaakia n te mwakuri ni minita. Ngkana e tuai n reke ana tai mataniwin te kurubu n toa ma ngkoe n te mwakuri ni minita, e aera ko aki tuangnga bwa ko na toa ma ngaia? Irarikin anne ao e kakawari kurubu nako te mataniwi ibukin te mwakuri, teuana te tai n te namwakaina. N ekaretia aika uarereke ike tii tabeua iai kurubu ibukin te mwakuri ni minita, e kona te mataniwi anne ni bairea ana tai ni kawari kurubu nako uoua te tai n te ririki. Ko a tia ni bairea am tai bwa ko na toa ma ngaia n te mwakuri ni minita ngkana e kawara am kurubu?
4. (a) A kanga ni baireaki taiani botaki ibukin te mwakuri ni minita? (b) Bukin tera bwa ti riai n iangoa ae ti na anganano bwa e na kabonganaaki mwengara ibukin te botaki ibukin te mwakuri ni minita?
4 E nakoraoi riki n angiin te tai ngkana e kaokoro aia tabo ni botaki ibukin te mwakuri ni minita n te wikeen kurubu nako. Ngkana a mwaiti taabo ni botaki ibukin te mwakuri ni minita ao titeboo taia ni karaoaki, e kona ni bebete irouia taan uarongorongo bwa a na kaea aia kurubu ao te aono are a na mwakuria. E kona ni waekoa iai baireaia taan uarongorongo, ao moanakini karaoan te aono are e na mwakuriaki. E bebete naba iai irouni mataniwin te kurubu tararuaaia kaain ana kurubu. Ma a kona n ikotaki kurubu aika uoua ke e raka riki ngkana iai baika riki. Ngkana a bane ni botaki kaain te ekaretia ibukin te mwakuri ni minita n te moani Kaonobong n te namwakaina ke imwin te Reirei n Te Taua-n-Tantani, e na ibuobuoki n angiin te tai ngkana a kaai n tekateka kaaini kurubu nako ao ngkana a baireia kaain aia kurubu mataniwini kurubu, tabeua te miniti imwain ae kainaki te kurubu n te tataro.—Nora te bwaoki ae “Ko Kona n Anganano Bwa E na Kabonganaaki Mwengam?”
5. Tera ae ti aki nanououa iai, e ngae ngkai e a toki te babaire ibukin te Reirei n te Boki n te Ekaretia?
5 E ngae ngke e a toki te babaire ibukin te Reirei n te Boki n te Ekaretia, ma e teimatoa Iehova ni katauraoi bwaai ni kabane aika ti kainnanoi ibukini karaoan nanona. (Ebera 13:20, 21) A aki kai nanora n te bwai teuana kioina ngkai e kawakinira Iehova. (TaiAre. 23:1) A bati kakabwaia aika ti kona ni karekei rinanon ara kurubu ibukin te mwakuri ni minita. Ngkana ti biririmoa ni karekea ara iraorao ma tabemwaang ao n “unika ae bati,” ti na “taia naba ae bati.”—2Kor. 9:6.
[Te Bwaoki n te iteraniba 6]
Ko Kona n Anganano Bwa E na Kabonganaaki Mwengam?
N ekaretia tabeua, ao a ikotaki kurubu nako ibukin te mwakuri ni minita n te wikeen ibukina bwa akea mwenga aika tauraoi ibukin te kurubu. Bobotaki ibukin te mwakuri ni minita bon iteran naba ana mwakuri te ekaretia, mangaia are bon te kakabwaia ngkana ti anganano bwa e na kabonganaaki mwengara. Ko kona n anganano bwa e na kabonganaaki mwengam? Tai tabwara ni karaoa anne e ngae ngke e aki kamwengaraoi mwengam. Ngkana a rineaki taabo ake e na boo iai te reirei n te boki irouia unimwaanen te ekaretia, a na rinanoa te tabo ae mena iai am auti ao bwaai riki tabeua aika kainnanoaki. Ngkana ko kan anganano bwa e na kabonganaaki mwengam, kaongoa mataniwin am kurubu.