Buokiia te Koraki Ake A Tuai Tauraoi n Reirei n te Boki ae Ana Reirei te Baibara
1. E na anaaki nanoia aomata ni kabane n te boki ae Ana Reirei te Baibara ni moani kawaraia? Kabwarabwaraa.
1 E riai te aomata n reiakina ana reirei te Baibara bwa e aonga n riki bwa te tia taromauria Iehova. Ma e ngae n anne, tabeman boni kaain Aaro ake tiaki Kristian ao a aki kakoauaa te Baibara bwa bon Ana Taeka te Atua. Tabeman riki a aki kakoauaa te Atua ao a aki karinea te Baibara. Baikara bwaai ni mwakuri aika kakoauaaki bwa a rangi n ibuobuoki ibukia te koraki ake a aki kukurei ni butimwaea te boki ae Ana Reirei te Baibara ni moani kawaraia? A boto iango aika kaotaki i nano, i aon aia kaeka taan uarongorongo man aaba aika tao 20 mwaitiia aika kakaokoro.
2. Ngkana e tuangira temanna bwa e aki kakoauaa te Atua, tera ae ti na kataia n ukeria ao bukin tera?
2 Te Koraki Ake A Aki Kakoauaa te Atua: Ngkana e taekinna temanna bwa e aki kakoauaa te Atua, e ibuobuoki ongoraeani bukina ngkai e aki kakoauaa te Atua. E riki anne ibukina bwa e kakoauaa te ewarutin? E a bua irouna onimakinan te Atua ibukina bwa e bati te ribuaka n te aonnaba ke mwamwanaakin te aba irouia Aaro? Kaain ngaia te aba ae a aki kakoauaa te Atua? Tao e aki kakoauaa ae iai te Atua, ma e bon tuai man namakinna ae e kainnanoia. A bati taan uarongorongo aika kunea bwa e kona ni kairaki te aomata bwa e na kaota ana iango man te titiraki aei, “Ko teimatoa n namakina anne?” Kakauongo nakoina ao tai kamangaoa ana kakarabakau. Ngkana ti ataa bukin ae e aki kakoauaaki te Atua iroun temanna, ti na ataa iai arora ni kaekaa ao te boki ae ti na anganna.—TaeRab. 18:13.
3. Ti na kanga ni kaotiota te karinerine nakon te aomata ao ana koaua?
3 Ngkana ko kaekaa te aomata, ko riai n taratara raoi bwa e na aki iangoia bwa ko kaitaraa ana iango. Ti karekea te iango aei man te United States ae kangai: “E rangi ni kakawaki karinean inaomataia aomata n tatabemania nako, bwa a na bairea te baere a kakoauaa. N oneani mwin ae ti na iangoa tokanikaira i aoia aomata ake a kauntaeka nakoira, e tamaroa riki ngkana ti tabeki titiraki aika e na reke iai aia tai n iango ao ni karekea oin aia koaua.” E aki toki temanna te mataniwi ae mwamwananga ni moana ana kaeka n te titiraki ae kangai, ngkana e tia n ongoraea ana iango kaain te auti, “Ko a tia n iangoia bwa e kona n riki aei?”
4. Ti na kanga ni kona ni buokiia kaain te Aro ae te Buddhist?
4 A bon aki ataa te koaua ibukin te Atua angiia kaain te Aro ae te Buddhist. A tangiria ni kabongana te boroutia ae Lasting Peace and Happiness—How to Find Them, tabeman taan uarongorongo i Buritan ngkana a uarongorongo nakoia aeka n aomata aikai. Imwin rinanoan te moantaeka, a maroroakina te atu ae “Is There Really a Most High Creator?” ao imwina te atu ae “A Guidebook for the Blessing of All Mankind.” Imwin anne, a kona ni kaota te boki ae Ana Reirei te Baibara ao n tuanga kaain te auti ni kangai: “E ngae ngkana ko aki kakoauaa te Atua, ma e ibuobuoki reiakinan te Baibara ibukina bwa a bati i nanona kairiri aika manena.” E taekina ae kangai te bwaiania temanna n te United States are e beku n aia aono I-Tiaina: “A bati n ara aono aika a kani wawareware. Mangaia are a aki toki ni wareka te boki ni kabane are ti angania, imwaini manga okiraia iroura. Ma a kona n aki ataa te kantaninga ibukin reiakinan te Baibara. Ngaia are I kan anganiko te boroutia ae Te Rongorongo ae Raoiroi ni moan rokou, ibukina bwa e katauraoaki n te aro ae e na kaunga iai te maroro.” E ribootinna te mataniwi n te aono ae uarereke are e beku n te aono ae a taetae n Tiaina kaaina n te United States, bwa e angaraoi kaotan te boki ae Ana Reirei te Baibara ni moani kawaran te aomata. Ma e kona n angaraoi riki moanakin te reirei ni mwakoro 2 ae kabwarabwaraaki iai te Baibara, nakoni moanakin te reirei ni mwakoro 1 ae maroroakinaki iai taekan te Atua.
5. Bukin tera bwa e kakawaki te taotaonakinnano?
5 E kainnanoaki te tai ae maan ibukin temanna bwa e na karikirakea onimakinan te Atua, ngaia are e kakawaki te taotaonakinnano. N ara moantai ni maroro, e kona te aomata n aki waekoa ni kakoauaa ae bon iai te Tia Karikiriki. Ma i nanon tabeua te tai, e na bae ni kakoauaa bwa bon iai te Tia Karikiriki ke e kona n taku bwa e a ataa bukina ngkai a kona tabeman ni kakoauaa te iango anne.
6. Bukin tera bwa a kona tabeman n aki kan ongoraea kanoan te Baibara?
6 Te Koraki Ake A Aki Kan Ongoraea Kanoan te Baibara ke A Aki Onimakinna: N angiin te tai, e aki kan ongoraea ana reirei te Baibara te aomata are e kakoauaa bwa bon iai te Atua, ibukina bwa e aki kakoauaa ae te Baibara bon Ana Taeka te Atua. Tao e maeka te aomata anne n te aba ae tiaki Kristian kaaina ao e kairekerekea te Baibara ma Aaro ake aongkoa Kristian ngaiia. Ke tao e maeka n te aba ae atongaki bwa Kristian kaaina ae bon akea irekerekeia ma te Aro, ao e iangoia bwa e na aki manena te Baibara nakoina. Ti na kanga ni buokiia te koraki akanne bwa a na rikirake kan ongoraeia n te Baibara, ao ni butimwaea imwina te reirei n te boki ae Ana Reirei te Baibara?
7. Tera te anga ae te kabanea n tamaroa n taai nako ibukini kauekeani kan ongoraeia aomata ni kanoan te Baibara?
7 E kororeta ni kangai te aobiti n tararua i Kuriiti: “Te anga ae te kabanea n tamaroa ibukini buokaia te koraki ake a aki kan ongoraea kanoan te Baibara, bon tii kaukan te Baibara nakoia ao ni kaota te bae e taekinaki iai. A bati taan uarongorongo ake a a tia n ataia bwa e korakora riki rotakin nanon te aomata n te rongorongo man te Baibara, nakon te baere a kona n taekinna. (Ebera 4:12) A a tia ni buokaki aomata aika bati bwa e na rikirake irouia kani warekan te Baibara, ngkana a nora iai aran te Atua.” E kororeta ni kangai te aobiti n tararua i Inria: “A bati kaain te Aro ae te Hindu aika a rangi n anaaki nanoia n te koaua ibukin te maiu ao te mate. Mangaia are e anaaki naba nanoia n te berita man te Baibara ibukin te aonnaba ae akea iai te kairiribai i marenaia aomata ake a kaokoro aroia.” Ngkana a taekin aia kangaanga kaain te aono ae a tabeaianga iai, e kona n reke aia tai taan uarongorongo ni kaota ae taekinaki n te Baibara ibukin te bae e na karaoia Ana Tautaeka n Uea te Atua ni kaetii bwaai.
8. Tera ae ti kona n taekinna nakoia te koraki ake a aki eti otaia n te Baibara ibukin aia reirei Aaro ake aongkoa Kristian ngaiia?
8 Ngkana iai te aomata ae aki eti otana n te Baibara ibukin aia reirei Aaro ake aongkoa Kristian ngaiia, kaotia nakoina ae a a tia ni kabuakakaa te Baibara ao ana reirei Aaro ake aongkoa Kristian ngaiia. E kororeta ni kangai te aobiti n tararua i Inria: “N tabetai, ti riai ni buokiia aomata n tatabemania nako bwa a na ataia ae a aki teimatoa Aaro ni kabongana te Baibara.” A ribootinna bwa a aki toki kaain te Aro ae te Hindu n anaaki nanoia ni mwakoro 4 n te boroutia ae What Is the Purpose of Life? How Can You Find It?, are e a kabwarabwaraa iai aroia Aaro ni kataia ni kabwaoua ao ni kamauna Ana Taeka te Atua. E tuangia aomata te bwaiania temanna i Brazil ni kangai: “E aera ngkai kam aki ukeri riki kanoan te Baibara? A bati aomata ake a karaoa aei ni kauki raoi aia iango n aki tabe ma reitakia ma te Aro ae kewe. Kam na bae ni mimi n te bae kam reiakinna.”
9. Bukin tera bwa ti aki riai ni bwarannano ngkana iai temanna ae e aki kan ongora n ana reirei te Baibara ni moani kawarana?
9 E tarataraa nanoia aomata n tatabemania nako Iehova. (1Tam. 16:7; TaeRab. 21:2) E katikiia te koraki ake a raoiroi nanoia nakon te taromauri ae koaua. (Ioa. 6:44) A bati aeka n aomata aikai ake a tuai n reiakina taekan te Atua ke e aki bati aia atatai n te Baibara. E reke aia tai ni “kamaiuaki, ma ni karekea te atatai ae eti ibukin te koaua” n ara mwakuri ni minita. (1 Tim. 2:4) Mangaia are tai bwarannano ngkana iai tabeman aika a aki kan ongora n ana reirei te Baibara ni moani kawaraia! Kabongana teuana mai buakoni bwaai ni mwakuri tabeua aika tauraoi n am taetae, ni kauekea iai kan ongoraeia. Imwina, ko kona ni bita te maroro nakon ara bwai ni mwakuri ae kakawaki ibukini kairan te reirei n te Baibara, ae te boki ae Tera Ana Reirei ni Koaua te Baibara?
[Te Bwaoki n te iteraniba 4]
Ngkana e taekinna kaain te auti bwa e aki kakoauaa te Atua, kataa aei:
• Ukera bukina n titirakinna ni kangai, “Ko iaiangoa anne n taai nako?”
• Ngkana ngaia kaain te Aro ae te Buddhist, kabongana te boroutia ae Lasting Peace and Happiness—How to Find Them, iteraniba 9-12.
• Ngkana e kakoauaa te ewarutin, e kona n rangi ni buokaki ni bwaai n ibuobuoki aikai:
Te kaongora ae “Was it Designed?” man te Awake!
Te birim ae The Wonders of Creation Reveal God’s Glory
Boroutia aika A Satisfying Life—How to Attain It, mwakoro 4; Was Life Created?; ao The Origin of Life—Five Questions Worth Asking
• Ngkana e bua irouna onimakinan te Atua ibukin te ribuaka ao te rawawata, e kona n rangi ni buokaki ni bwaai n ibuobuoki aikai:
Te boki ae Is There a Creator Who Cares About You?, mwakoro 10
Boroutia aika E Tabeakinira Raoi te Atua?, mwakoro 6, ao What Is the Purpose of Life?, mwakoro 6
• Bita am maroro nakoni kaain te auti nakon te boki ae Ana Reirei te Baibara n te tai are e a butimwaea te iango ae bon iai te Atua. E kona n nakoraoi moanakin te reirei ni mwakoro 2 ke man te reirei teuana ae kaineti raoi nakoina.
[Te Bwaoki n te iteraniba 5]
Ngkana e aki kakoauaa te Baibara kaain te auti, kataa aei:
• Rinanoa mwakoro 17 ao 18 n te boki ae Life—How Did It Get Here? By Evolution or by Creation?
• Ibukia kaain te Aro ae te Hindu, kabongana te boroutia ae Why Should We Worship God in Love and Truth?
• Ibukia I-Iutaia, kabongana te boroutia ae Will There Ever Be a World Without War?, iteraniba 3-11.
• Maroroakini kakabwaia aika a na reke mani maiuakinani booto n reirei man te Baibara. Aikai booki aika ko kona ni kabonganai ni kaota kakawakin te Baibara nakon te aomata:
Te kaongora ae “Help for the Family” man te Awake!
Te birim ae The Bible—Its Power in Your Life
Boroutia aika Te Rongorongo ae Raoiroi Mairoun te Atua!, reirei 9 ao 11; A Book for All People, iteraniba 22-26; ao A Satisfying Life—How to Attain It, mwakoro 2
Ibukia kaain te Aro ae te Buddhist, kabongana te boroutia ae The Pathway to Peace and Happiness, iteraniba 3-7.
Ibukia kaain te Aro ae te Mutirim, kabongana te boroutia ae Real Faith—Your Key to a Happy Life, mwakoro 3.
Ngkana ko uarongorongo n te aono ae a riribaa te Baibara kaaina, e kona n nakoraoi ngkana ko aki kaota nibwan taeka aika a kaotiota te wanawana ake ko taekin, ni karokoa ae e a mwaiti am tai ni kakawariia.
• Kabwarabwaraa aroni koroni bukin taetae ni burabeti aika n te Baibara. Aikai booki aika ko kona ni kabonganai:
Te birim ae The Bible—Accurate History, Reliable Prophecy
Te boroutia ae A Book for All People, iteraniba 27-29
• Bita am maroro nakon te boki ae Ana Reirei te Baibara n te tai are e titiraki iai te aomata bwa tera ana reirei te Baibara i aoni maroro aika kakaokoro.
[Te Bwaoki n te iteraniba 6]
Ngkana e taekina ae kangai kaain te auti: “I aki kakoauaa te Atua,” ko kona ni kangai:
• “I kona ni kabwarabwaraa nakoim n te aro ae kimototo, te bae e kairai bwa N na onimakina te tia Karikiriki?” Imwina maroroakini baika kakawaki man te boki ae te Reasoning, iteraniba 84-86, ke karaoa am babaire bwa ko na angan te aomata anne te boki ae ko kani wawarekia.
• “Ma ngkana arona bwa iai te Atua, baikara anuana aika ko tangiri?” A kaeka angiia kaain te auti bwa a kona ni kaaniaki ma te Atua ae tatangira, e kaetitaeka n te aro ae riai, e nanoanga, ao e aki inanonano. Kaotia nakoina man te Baibara aroaron te Atua akanne. (E kona naba n nakoraoi kabonganaan te boki ae Ana Reirei te Baibara, mwakoro 1, ngkana ko moanna mani barakirabe 6.)
Ngkana e taekina ae kangai kaain te auti: “I aki kakoauaa te Baibara,” ko kona ni kangai:
• “A bati aika a iango naba n aron anne. A iangoia tabeman bwa te Baibara e aki irekereke kanoana ma te rabakau n aonnaba, ke a aki manena kaetieti ake iai. Ko kona n tuangai, e a tia n rereke am tai ni wareka te Baibara mai mwaina? [Kariaia te kaeka. Imwina kaota nakoina te moantaeka n iteraniba 3 n te boroutia ae A Book for All People, ao anganna te boroutia anne.] A bati aika a aki kakoauaa te Baibara ibukina bwa a a tia Aaro ni kabuakakai ana reirei te Baibara. N rokou are imwina, ao I kani maroroakina ma ngkoe te katoto n iteraniba 4 ao 5.”
• “A bati aomata aika titeboo am iango ma ngaiia. I kona ni kaota nakoim te bae e anaaki iai nanou n te Baibara? [Wareka Iobi 26:7 ke Itaia 40:24 ae kaotaki iai bwa a irekereke ma te rabakau n aonnaba rongorongo aika n te Baibara.] Iai naba n te Baibara taeka aika kaotiota te wanawana ibukini buokaia utu nako. N rokou are imwina, ao I kani kaota nakoim te katoto iai.”
• “Ko rabwa ngkai ko kaongoai anne. Ngkana ngaia bwa te Atua e korea te boki ibukia botannaomata, n am iango tera kanoana?” Imwina kaota nakoina te rongorongo teuana man te Baibara ae boraoi ma ana kaeka.