ATUN TE MAEKATIN | E KAMAIUIRA IESU—MAN TERA?
Bukina Ngkai Ti Kainnanoa Kamaiuara
“E bungiaki ni kananoanga te aomata, e kimototo maiuna, ao iriana te rawawata. Ai aron te ue ae e raure ao e rai, e mauna nako n ai aron te nu.”—Iobi 14:1, 2, BK.
A iaiangoia aomata man taai ake rimoa, aroni kakukurein reken te maiu ae akea tokina are akea iai te kara ao te aoraki. Ma e kananokawaki bwa te bwai ae riki ngkai, ti boni mamate. A teimatoa ni koaua ni karokoa boong aikai ana taeka Iobi ake mai eta ake e taekin, tenua tabun tenga te ririki n nako.
E korakora ao n taabangaki tangiran te maiu ae akea tokina. Ti tuangaki n te Baibara bwa e a tia te Atua ni karina i nanora tangiran ao karekean te maiu ae akea tokina. (Te Minita 3:11) Ngkana ngaia anne, e riai iroun te Atua ae tatangira ni karina iroura tangiran te bwai ae kangaanga kakororaoana? Ngkana ko kaeka n tiaki ao e eti anne. E taekinaki te mate n Ana Taeka te Atua bwa te tia kairiribai ao e beritanaki iai bwa “e na boni kamaunaaki.”—1 I-Korinto 15:26.
Akea te nanououa bwa bon te tia kairiribai te mate. Akea temanna ae raoiroi ae tangiria. Ti waekoa ni kamanoira ke ni birinako ngkana e riki te kangaanga. Ti aki toki n ukeri aanga ake ti na marurung iai ngkana ti aoraki. Ti kabanea korakorara n totokoi baika a kona ni karekea te mate nakoira.
Iai bukina ae ti riai ni kakoauaa bwa e na boni kamaunaaki te tia kairiribai are te mate? Eng, bon iai. E bon aki karikiia aomata te tia Karikiriki ae Iehova ae te Atua bwa a na maiu tii i nanon tabeua te ririki ao ni manga mate. Bon tiaki kanoan ana moani kantaninga mateia aomata. E iangoia bwa a na maiu n aki toki aomata n te aonnaba ao e na boni kakoroa bukin anne.—Itaia 55:11.
E na kangaa ngkanne ni kamaunaaki te mate? A a tia ni kabanei korakoraia aomata mangkekei ni karokoa ngkai, ibukini katokan te kangaanga ae te mate ma a aki kona. E waakinako i aon anne te kakaae ni karokoa boong aikai. A a tia taan rabakau ni bwain te aonnaba ni karaoi bwainnaoraki ibukin totokoan ao katokan aoraki ike a a tia ni katoki tabeua mai iai. A a tia n neneri raoi aroni moan rikin taian gene ibukini baika maiu. N taabo aika a bati ao e katautauaki bwa a abwabwaki riki maiuia aomata ni boong aikai nakon te tienture ae nako. Ma e ngae n anne, e tuai kona ni katokaki te mate bwa e taekinaki ae kangai n te Baibara: “A bane ni manga okira te tano.”—Te Minita 3:20, BG.
Te rongorongo ae kakukurei bwa ti aki riai n onimakini rabakauia aomata ibukini katokan te kangaanga ae bongata aei. E a tia Iehova ni karaoa ana babaire ibukira bwa ti aonga ni kamaiuaki ke ni kamanoaki man te mate ao e mwiokoaki iai Iesu Kristo.