Tera ae E Tabe ni Karaoia Ngkai te Atua?

“Iehova, Ko aera ngkai Ko tei i kiraroa? Ko aera ngkai Ko karabako ni boong aika e kai te nano iai?”a​—TAIAN ARERU 10:1, BG.

TI KAKOAUAA bwa ti a maeka ngkai i nanoni “bongin te rawawata,” ngkana ti a tarai nako naba atun nuutibeeba. Ao ngkana e riki te kabuanibwai ni mwengara n aron ae ti rotakibuaka ni mwakuri ni kakeru, te kabuanibwai ae kakaiaki, ke maten ae tangiraki iroura, tao ti bae n titiraki ni kangai, E nora aei te Atua? E tabeakinira? Bon iai ngaia?

Ma ko a tia n iangoia ae a kona n aanaki baika ti kantaningai mairoun te Atua i aoni katautau aika kairua? Ibukini kaikonakana: Iangoia bwa e un te ataei ae uarereke ngke e a nako tamana ni mwakuri. E nanokawaki te ataei aei bwa e kan nora tamana ao e kariariaa okina. E namakinna naba bwa e a kitanaki ao e a okioki n titiraki ni kabongnga ni kangai: “E nga Bwabwa?”

Ti kona ni waekoa n nora kairuan ana iango te ataei aei. Ni koauana, e mwakuri tamana n te tai aei ibukini baika kainnanoaki irouia ana utu ni kabane. E kona ni kairua naba ara iango ngkana ti takaruaea ae, “E a nga ngkai te Atua”?

N te katoto, tao tabeman a tangiria bwa e na riki te Atua bwa te tia motiki taekaia taani bure, ae tabena te kawaekoa ni katuuaaeia ibukin te bure ae a karaoia. Tabeman riki a iangoa te Atua bwa Santa Claus ae e anganga batia, e karekea nakoam, buum, ke te kaniwanga n te tiiketi ni katekeraoi.

E katautauaki n iango akana uoua akanne bwa ngkana e aki waekoa ni kaetitaeka n ae riai te Atua ke ngkana e aki anganira te bae ti bubutii, e bon aki ngkanne mutiakin rawawatara ao e aki naba atai baika ti kainnanoi. Tiaki ngaia anne te koaua! Ni koauana, e tabe ngkai ni katauraoi bwaai ibukia utu nako Iehova ae te Atua, ma e aki angania n aron ae a tangiria aomata aika bati.

Ma tera ngkanne ae e tabe ni karaoia te Atua? Ni kaekaan anne, ti riai n uringa moani karikaia aomata ngke e kakaiaki uruakin ana iraorao te botannaomata ma te Atua, ma tiaki n te aro ae riaon ae kona ni manga kaetaki.

Kangaanga Aika Riki Imwin te Bure

Iangoa te auti ae e a tia n uruaki i nanon ririki aika bati. E bwangabwanga taubukina, a bwaka mataroana, ao e uruaki oon tinanikuna. E taraaraoi ngkoa te auti aei ma e a aki ngkai. N iangoani korakoran uruakin te auti aei, ai bon tiaki te mwakuri ae uarereke kaboouana, ao e na aki kona ni karaoaki n te tai ae waekoa.

Iangoa ngkai te kangaanga nakon te botannaomata are e riki tao 6,000 te ririki n nako, ngke e a karinaki i nanoia Atam ao Ewa te nano ni karitei nakon te Atua iroun te taamnei ae aki noraki ae Tatan. Imwain rikin anne, a kororaoi marurungia te moan taanga aei ao a karekea te kantaninga ae te maiu n aki toki ma kanoaia nakon taai ake imwaia. (Karikani Bwaai 1:28) Ma ngke a a bure Atam ao Ewa, titeboo ma a a urui n oin nanoia utu nako ake a tuai n riki.

Tai iangoia bwa a na uarereke mwini kangaanga ake a riki imwin te karitei anne. E kaotaki n te Baibara bwa “aron rokon te bure irouia kaain te aonnaba mairoun te mwaane ae tii temanna [ae Atam] ao rokon te mate n te bure.” (I-Rom 5:12) Irarikin reken te mate, e a tia te bure n urua ara iraorao ma ara tia Karikiriki ao n rotakibuaka iai marurungin rabwatara, ara iango, ao ara namakin. Ibukin anne, ai titeboo arora ma te auti are uruaki. E kauarerekea taekan arora ni kangai te aomata ae raoiroi ae Iobi n taekina te aomata bwa “ti tabe bong ana bong, ao e on n te rawawata.”​—Iobi 14:1, BG.

Ma e kaaki taekan te botannaomata te Atua imwini bureia Atam ao Ewa? E bon aki! Ni koauana, e mwamwakuri Tamara are i karawa man te tai anne ni karokoa ngkai ibukia botannaomata. Ibukini kaotiotan ara kakaitau n te bwai ae e karaoia ibukira, ti na iangoi mwaneka aika tenua aika riai ibukini kaboouan te auti ao irekerekeni baikai ni kabane ma are e a tia ni karaoia te Atua ibukini kaokan aron te botannaomata.

1 E riai teuare uruaki ana auti n tuoa moa ao imwina e a iangoia bwa e na kabooua ke e na kamaenakoa.

E kaota ana kantaninga Iehova ae te Atua ibukini kaokan aron te botannaomata bon imwin naba te karitei are i Eten. E taku nakon te taamnei are e boutokaa te karitei: “N na kaki te kakaiwi i marenam ma te aine aei, ao i marenan am kariki ma ana kariki: e na kaikoaka atum, ao ane ko na kaikoaka bukini waena ngkoe.”​—Karikani Bwaai 3:15, BG.

N ana taeka Iehova akanne, e berita iai bwa e na kamauna te tia kauekea te karitei i Eten. (I-Rom 16:20; Te Kaotioti 12:9) Irarikina, e a kaman taekinna Iehova bwa e na kamaiuaki te botannaomata man te bureb rinanon te “kariki” are e na roko. (1 Ioane 3:8) N te aro aei, e a kaotiota iai ana berita Iehova ibukin te bwai ae e na karaoia are e na kabooui ana karikibwai ao e na aki kamaunai. Ma e kainnanoaki te tai ae maan ni kaokan aron te botannaomata.

2 E korea taamnein te auti ae bwarabwara raoi iai baika a na manga kaboouaki te tia koro taamnei.

E angania I-Iteraera tuua Iehova ae te Atua ao ni bairea aroni katean te tembora are a na taromauria iai. E taekinaki ae kangai n te Baibara: “Boni bannani baika nangi roko baikanne.” (I-Korote 2:17) A tei baikai ibukini baika kakawaki riki kaanga ai aron taamnein te auti ae tuai kateaki.

N te katoto, a kareani maan I-Iteraera ibukini kabwaraan aia bure. (Nakoaia Ibonga 17:11) Boni bannan te angakarea ae kakawaki riki te mwakuri anne are e na anga te aba n tienture ake imwina riki, ae te karea ae na katauraoa te kakamaiu ni koauac ibukin te botannaomata. Taamnein te umwanrianna ae tabu ao te tembora are a tataromauri iai I-Iteraera boni bannani baike e na karaoi ngkoa te Mesia are e kakantaningaaki, ni matena bwa te karea ni karokoa waerakena nako karawa.​—Nora te taibora n iteraniba 7.

3 E rineaki te tia kateitei are e na toua mwin taamnein te auti ao ni kabooua.

Bon Iesu te Mesia are beritanaki ae e na tou mwini bannani baike a a tia ni kateaki n aia angakarea I-Iteraera ao e na anga maiuna ibukini kamaiuan te botannaomata. E bon taekinaki Iesu iroun Ioane te tia Bwabetito bwa “ana Tiibutetei te Atua, ae kamaunai aia bure kaain te aonnaba.” (Ioane 1:29) E kukurei Iesu ni butimwaea te mwioko anne. E taku: “I ruo mai karawa tiaki ibukini karaoan nanou, ma ibukini karaoan nanon teuare kanakomaiai.”​—Ioane 6:38.

E aki kantaningaaki Iesu iroun te Atua bwa e na tii “anga maiuna bwa te kaboomwi ibukia aomata aika bati,” ma e na karaoa naba te berita ma taan rimwina ibukin te Tautaeka n Uea. (Mataio 20:28; Ruka 22:29, 30) E na kabongana ana Tautaeka n Uea te Atua ni kakororaoa iai ana kantaninga ibukin te botannaomata. E aranaki te rongorongo ibukin Ana Tautaeka n Uea te Atua bwa te “rongorongo ae raoiroi,” ibukina bwa e kamatataaki iai ae e a tia ni katea te tautaeka i karawa te Atua, are e na taua taekan te aonnaba!​—Mataio 24:14; Taniera 2:44.d

E Waakinako Kaokan Aron te Botannaomata

Imwaini waeraken Iesu nako karawa ao e tua nakoia taan rimwina ni kangai: “Reireinia aomata mai buakoia botannaomata nako bwa a na riki bwa taan rimwiu ao bwabetitoiia n aran te Tama, ao te Nati, ao te taamnei ae raoiroi . . . Ao noria! N na memena iroumi ni boongi ni kabane ni karokoa tain tokin te waaki ae ngkai i aon te aba.”​—Mataio 28:19, 20.

Mangaia are tiaki nanona bwa e toki kamaiuan te botannaomata ngke e mate Iesu. E na boni waakinako ni karokoa “tokin te waaki ae ngkai i aon te aba” ae te tai are e a moanna iai n tautaeka i aon te aba Ana Tautaeka n Uea te Atua. Boni ngkai te tai anne. Ti ataa aei ibukina bwa e a kakoroaki ngkai bukine te kanikina are e a kaman taekinna Iesu ibukin “tokin te waaki ae ngkai i aon te aba.”​—Mataio 24:3-​14; Ruka 21:7-​11; 2 Timoteo 3:1-5.

Ni boong aikai, a ongeaba Ana Tia Kakoaua n aaba aika 236 n ana kaetieti Iesu ibukin tataekinan euangkerion Ana Tautaeka n Uea te Atua. Ni koauana, e katauraoaki te maekatin ae ko warekia aei bwa buokam n reiakina ae bati riki ibukin te Tautaeka n Uea anne ao baika e na kakororaoi. N iteraniba 2 n Te Taua-n-Tantani ni kabane, ko na nora iai ae kangai: “Te maekatin aei . . . e kabebetei nanoia aomata ni kabane n te rongorongo ae raoiroi ae e na waekoa n roko Ana Tautaeka n Uea te Atua, ae te tautaeka ni koaua i karawa, ni kamaunaia aomata aika buakaka, ao imwina e na bita te aonnaba aei nakon te bwaretaiti. E karikirakea onimakinan Iesu Kristo are e a tia ni mate bwa ti aonga ni kona ni karekea te maiu are aki toki ao e a tautaeka ngkai bwa te Uea n Ana Tautaeka n Uea te Atua.”

E koaua bwa tao ko teimatoa n ongongo ngkai taekani mwakuri n iowawa ke kabuanibwai aika karina, ke tao ko kaaitarai kangaanga. Ma ngkana ko reirei n te Baibara, ane ko na kakoauaa raoi bwa e bon aki kitania aomata te Atua. Ngaia are “e bon aki raroa mairoura n tatabemanira nako.” (Mwakuri 17:27) Ao e na boni koro bukin ana berita ibukini kaokan te bwai are a kabuaa ara moani karo.​—Itaia 55:11.

[Kabwarabwara ae nano]

[Taibora/​Taamnei n iteraniba 7]

(Ibukini bitakin taeka, nori booki)

‘Katotongan te Tabo ni Koaua’—Te Bwai ae Tei Ibukina te Umwanrianna ae Tabu

TE BAONIKAREA

Kukurein te Atua ni butimwaea ana karea ni kaboomwi Iesu.​—I-EBERA 13:10-12.

TE IBONGA AE RIETATA

Iesu.​—I-EBERA 9:11.

1 N te Bong ni Kabwarabure, e angakarea iai te ibonga ae rietata ibukin aia bure aomata.​—NAKOAIA IBONGA 16:15, 29-31.

1 N Nitian 14, 33 C.E., e anga maiuna Iesu ibukira.​—I-EBERA 10:5-10; 1 IOANE 2:1, 2.

TE RUU AE TABU

Aron Iesu ni kabiraki n te taamnei.​—MATAIO 3:16, 17; I-ROM 8:14-17; I-EBERA 5:4-6.

TE KEETEN

Bon irikon ao raraan Iesu, ae te bwai n tutuki are e kaokoroa te maiu i aon te aba ma are i karawa.​—1 I-KORINTO 15:44, 50; I-EBERA 6:19, 20; 10:19, 20.

2 E nako te ibonga ae rietata nako akun te keeten are e kaokoroa te Ruu ae Tabu ma te Ruu ae Moan te Tabu.

2 Imwini kautan Iesu, ao e ‘nako akun te keeten’ ae nanonaki iai rierakena nako karawa “bwa e na kaoti i matan te Atua ibukira.”​—I-EBERA 9:24-​28.

TE RUU AE MOAN TE TABU

Karawa.​—I-EBERA 9:24.

3 Ngke e a rin te ibonga ae rietata i nanon te ruu ae Moan te Tabu, e katimtimwa teutana raraan te karea i matan te ati ni berita.​—NAKOAIA IBONGA 16:12-14.

3 Ngke e kaota manenan raraana are e kawawaeaki Iesu, e a katauraoa iai te kabwarabure ni koaua ibukira.​—I-EBERA 9:12, 24; 1 BETERO 3:21, 22.