MWAKORO 7
A Kawara Iesu Taani Kaiwan Itoi
A RIRIMWIN TE “ITOI” TAANI KAIWAN ITOI NAKO IERUTAREM AO IMWINA NAKON IESU
A roko tabeman mwaane mai Mainiku. Bon taani kaiwan itoi aika a kamatebwaia taian itoi, are a taekinna bwa a kona n ataa iai nanoni baika riki ni maiuia aomata. (Itaia 47:13) Ngke a mena ni mwengaia i Mainiku, a a nora te “itoi” ao a ririmwina n te raroa ae bubua ma bubua te maire, tiaki nako Betereem ma nako Ierutarem.
Ngke a roko ikekei ao a titiraki ni kangai: “E nga teuare bungiaki ae aia uea I-Iutaia? Bwa ti nora itoina ngke ti mena i Mainiku, ao ti a roko bwa ti na bobaraaki ni karinea.”—Mataio 2:1, 2.
E rangi n un Erote are Uean Ierutarem ngke e ongo aei. Ngaia are e weteiia mataniwi n ibonga ao mataniwin te Aro n Iutaia ake tabemwaang ao n titirakinia bwa e na bungiaki ia te Kristo. A kabotoa aia kaeka man te Baibara ni kangai: “I Betereem.” (Mataio 2:5; Mika 5:2) Ibukin anne ao a kairaki taani kaiwan itoi nakon Erote n akea ataakina irouia aomata ao e taku nakoia: “Naako ao ukoukora raoi te teei, ao ngkana kam kunea ao kam na oki n tuangai bwa N na nako naba ni bobaraaki ni karinea.” (Mataio 2:8) Ma e boni kani kakaaea te teei bwa e na tiringnga!
Imwin nakoia taani kaiwan itoi ao e a riki te bae kamimi. A a manga nora te “itoi” n ririmoaia are a noria ngke a mena i Mainiku. E teretere iai bwa bon te itoi ae okoro aei bwa e katauraoaki ibukini kairani kawaia. A ririmwina ni karokoa teina i etan te auti are a maeka iai Ioteba ao Maria ma natiia te mwaane ae uarereke.
A nora Maria ma natina ae uarereke are Iesu ngke a rin n te auti ao a bobaraaki nakoina. A anganna taiani bwaintangira ae te koora, te ribano, ao te mura. Imwina ngke a nang okira Erote, a anganaki te kauring iroun te Atua n te mii bwa a na aki okiria. Ngaia are a oki rikaaki nako abaia n te kawai ae kaokoro.
N am iango antai ae katauraoa te “itoi” are kairiia taani kaiwan itoi? Uringnga are e aki kairiia raoi te itoi nakon Iesu i Betereem. Ma e kairiia nako Ierutarem ike a a kaitiboo iai ma te Uea ae Erote are kan tiringa Iesu. E na boni karaoa anne ngke arona bwa e aki anga te kauring te Atua nakoia taani kaiwan itoi, bwa a na aki tuanga Erote te tabo are mena iai Iesu. E mataata bwa e kan tiringa Iesu Tatan are te tia kairiribai nakon te Atua, ao e kamanena te anga aei ni kakororaoa iai ana kantaninga.