E Bwabetitoaki Iesu

Onoua tabun te namwakaina imwini moanakin ana uarongorongo Ioane te tia Bwabetito, ao e a kawaraki n te Karaanga ae Ioretan iroun Iesu are tao ai 30 ana ririki ngkai. Bwa tera bukina? E aki kawaria tii ibukini kani kaitiboona ma ngaia ke n nora aron rikiraken ana mwakuri. Ma e roko n tuangnga bwa e na bwabetitoia.

E totokoia Ioane ni kangai: “Boni ngai ae I riai ni bwabetitoaki iroum, ao ko nakoiu?” (Mataio 3:14) E ataia Ioane ae Iesu bon Natin te Atua ae okoro. Uringnga are e kimwareirei Ioane i nanoni biroton tinana are Eritabeta ni kawarana irouni Maria ngke e bikoukoua Iesu. Akea te nanououa bwa e tuangaki Ioane taekan aei imwina riki iroun tinana. Ao e ataa naba taekan te baere e taekinna te anera ibukini bungiakin Iesu, ao taekaia anera ake a kaoti nakoia taani kawakintiibu n te tairiki are e bungiaki iai Iesu.

E ota Ioane bwa te bwabetito are e karaoia, bon ibukia te koraki aika rairi nanoia man aia bure ao tiaki ibukin Iesu are akea ana bure. Ma e taku Iesu n aki ongea ana totoko Ioane: “Kariaia ngkai, bwa n te aro aei ti na kakororaoa iai ae raoiroi.”​—Mataio 3:15.

Bukin tera bwa e riai bwabetitoan Iesu? E aki bwabetitoaki ibukini kanikinaean te rairannano ibukini buure. Ma e kaotaki ni bwabetitoana bwa e a anga ngaia ibukini karaoan nanon Tamana. (Ebera 10:5-7) E a tia n riki Iesu bwa te kabentaa, ma e a roko ngkai ana tai ni moana karaoan te mwakuri ni minita are e kanakoaki iai iroun Tamana nakon te aonnaba. N am iango, e kantaningaa rikin te bwai ae kamimi Ioane ngke e bwabetitoa Iesu?

E taekina ae kangai Ioane imwina riki: “E taku nakoiu Teuare kanakomaiai bwa N na bwabetito n te ran: ‘Ane ko noria bwa e ruonna te taamnei ma n tiku i aona, ao boni ngaia are e bwabwabetito n te taamnei ae raoiroi.’” (Ioane 1:33) Ngaia are e kantaningaa taamnein te Atua Ioane bwa e na ruona teuare e bwabetitoia. Ibukin anne, e bae n aki mimi Ioane n noran “taamnein te Atua ae ruona Iesu n ai aron te taobe” n te tai are e otirake iai man te ran.​—Mataio 3:16.

Ma iai riki bwaai aika riki ni bwabetitoan Iesu. “E a kaukaki karawa” nakoina. Tera ae nanonaki n aei? E bae n nanonaki bwa n te tai are e bwabetitoaki iai, ao e a oki ana ururing ni kaineti ma maiuna ngkoa i karawa. Ngaia are e a uringa ngkai aroni maiuna ngke te taamnei ngaia ae natin Iehova, n ikotaki ma koaua ake e reireinna te Atua i karawa imwain rokona i aon te aba.

Irarikin anne, e roko naba te bwanaa mai karawa ni bwabetitoan Iesu ae kangai: “Bon Natiu ae I tangiria teuaei, ae I kakatonga irouna.” (Mataio 3:17) Antai bwanaana anne? Bon tiaki bwanaan Iesu bwa e mena i rarikin Ioane n te tai anne ma boni bwanaan te Atua. E mataata iai bwa Iesu bon natin te Atua ao bon tiaki ngaia te Atua.

E kakawaki ataakin ae Iesu bon natin te Atua ae te aomata ae ai aron te moan aomata are Atam. E korea ae kangai te tia rimwin Iesu ae Ruka imwini kabwarabwaraani bwabetitoan Iesu: “Ana ririki Iesu ngke e moana ana mwakuri tao 30, ao e iangoaki bwa natin Ioteba, ae natin Eri, . . . ae natin Tawita, . . . ae natin Aberaam, . . . ae natin Noa, . . . ae natin Atam, ae natin te Atua.”​—Ruka 3:23-38.

N aron Atam ae te aomata ae “natin te Atua,” ao ai tii te arona naba ma Iesu. Ngke e bwabetitoaki Iesu ao e a ataia iai bwa boni ngaia Natin te Atua are e na riki bwa te taamnei i karawa. Mangaia are e a kona Iesu n reiakinia aomata te koaua ibukin te Atua ao ni kaota te kawai nakon te maiu. E a moana ngkai te mwakuri are e na kairaki iai imwina riki bwa e na anga maiuna bwa te karea ni kaboomwi ibukia aomata aika taani bure.