4 Te Kabwarabure

AE NANONAKI IAI

E nanonaki n te kabwarabure bwa ko na mwaninga taekan te kairua ao unim iai. E aki kainnanoaki n te kabwarabure bwa ko na kauarerekea kakaiakin te kairua ke n taraia bwa aongkoa e bon aki riki.

TE BOTO N REIREI MAN TE BAIBARA: “Teimatoa n taotaon nanomi i marenami ao tauraoi n ikabwarabure ngkana iai bukini ngurenguremi i marenami.”—I-Korote 3:13.

“Ngkana ko tangira temanna, ko na aki kaatuui aki kororaoina, ma ko taraia ni kaineti ma baike e kekeiaki ni karaoi.”—Aaron.

BUKINA NGKAI E KAKAWAKI TE KABWARABURE

E kaaoraki kaikoan te un ao e karawawata ao e kona naba n urua am mare.

“N te taina ao e a kabwaraa ana bure buu nakoiu n te bae I rangi ni maraki iai. E kangaanga irou bwa N na kabwaraa. Imwina riki ao I a kabwaraa, ma I uringaaba bwa e aera ngke I aki kamani kabwaraa. E a rotaki iai ara mare.”—Julia.

TE BWAI AE KO KONA NI KARAOIA

TUOKO I BON IROUM

Ngkana ko a manga maraki naba n te bae e taekinna buum ke e karaoia, titirakiniko ni kangai:

• ‘I kakai maneang?’

• ‘E rangi ni kakaiaki te bure aei n te aro are e a bon riai ni kabwaraaki te bure nakoiu, ke I kona ni mwaninga taekana?’

MAROROAKINI BAIKAI MA BUUM

• Mamaanra ao ti a tibwa butimwaea te kabwarabure i marenara?

• Tera ae ti kona ni karaoia bwa ti aonga ni moantaai riki n ikabwarabure?

TAIAN IBUOBUOKI

• Ngkana ko un, tai iangoia bwa e buakaka buum.

• Kataia n aki kauna nanom n anuani buum ao uringnga are “ti bane n titibanako n taai aika bati.”—Iakobo 3:2.

“E bebete te ikabwarabure ngkana ti uaia ni kairua, ma e kangaanga riki ngkana tii temanna ae kairua. E kainnanoaki te nanorinano ni koaua ngkana ko na butimwaea ana kabwarabure temanna ao ni kabwaraa ana bure.”—Kimberly.

TE BOTO N REIREI MAN TE BAIBARA: “Bareiko ni kaetii bwaai.”—Mataio 5:25.