Te Bwabetito​—Te Tia ae Kakawaki!

E angareirei Iesu bwa a riai ni bwabetitoaki Kristian. (Wareka Mataio 28:​19, 20.) Ma tera te bwabetito? Ao tera ae e na karaoia te aomata bwa e aonga n roko n te tia anne?

1. Tera te bwabetito?

Te taeka ae “bwabetito” e nako man te taetae ni Kuriiti ae nanona “tebonako” i aan te ran. Ngke e bwabetitoaki Iesu, e kateboaki n te Karaanga are te Ioretan, ao imwina e “otirake . . . man te ran.” (Mareko 1:​9, 10) N aron naba anne, a bwabetitoaki Kristian ni koaua n aroia n tebonako i aan te ran.

2. Tera ae oti ni bwabetitoam?

Ni bwabetitoan temanna, e a kaotia iai bwa e a katabua maiuna nakon Iehova ae te Atua. E na kangaa te aomata ni katabua maiuna? Imwain te bwabetito, e tataro moa n tii ngaia, n tuanga Iehova ae e kani beku Irouna n aki toki. E berita bwa e na taromauria Iehova n tii ngaia ao n iangoa karaoan nanon te Atua bwa te bwai ae moan te kakawaki ni maiuna. E rineia bwa e na “kakeaa boni ngaia . . . ao ke e teimatoa n [ira]” ana reirei Iesu ma ana katoto. (Mataio 16:24) E kairia ana katabu ao ana bwabetito bwa e na karekea ana iraorao ae kaan ma Iehova ao raona n te onimaki.

3. E na kangaa n rikirake te aomata ao n tau nakon te bwabetito?

Imwain ae ko tau nakon te bwabetito, e kakawaki bwa ko na reiakina taekan Iehova ao ni karikirakea onimakinana iroum. (Wareka Ebera 11:6.) Ngkana e a rikirake am atatai ao am onimaki, e na rikirake naba tangiran Iehova iroum. Ko na boni kan tataekina taekana ao ni maiuakin naba ana kaetieti. (2 Timoteo 4:2; 1 Ioane 5:3) Ngkana e kaboraoa maiuna te aomata ma “ae tau i matan Iehova ni karekea iai kakukureiana ni bwaai ni kabane,” e a kona n iangoia bwa e na katabua maiuna nakon te Atua ao ni bwabetitoaki.​—I-Korote 1:​9, 10.a

REIAKINA AE BATI RIKI

4. Reireiara mani bwabetitoan Iesu

Wareka Mataio 3:​13-17 n nori riki iai rongorongoni bwabetitoan Iesu. Ao maroroakin titiraki aikai:

• Te merimeri Iesu ngke e bwabetitoaki?

• E kangaa aroni bwabetitoana? E katimtimwaki te ran i aona?

E moana ana mwakuri ae okoro Iesu are e anganaki iroun te Atua ni menana n te aonnaba, imwini bwabetitoana. Wareka Ruka 3:​21-23 ao Ioane 6:​38, ao maroroakina te titiraki aei:

• Tera te mwakuri are e moanibwaia Iesu imwini bwabetitoana?

5. Ko kona n roko n te tia ae te bwabetito

E kona n taraa ni kangaanga iangoan te katabu ao te bwabetito n te moantai. Ma ko kona ni karikirakea iangoan ae ko boni kona ni karaoa te aeka ni motinnano ae kakawaki aei. Ibukin noraia aomata tabeman ake a karaoa aei, kaota te TAAMNEI.

TAAMNEI: Karikirakea Am Iraorao ma Iehova (1:11)

Wareka Ioane 17:3 ao Iakobo 1:​5, ao maroroakina te titiraki aei:

• Tera ae kona ni buoka te aomata bwa e na tauraoi nakon te bwabetito?

1. Ti katabua maiura n arora n tuanga Iehova ae ti kani beku irouna n aki toki

2. N ara bwabetito, ti kaotia iai nakoia taani mataku bwa ti a tia ni katabua maiura nakon te Atua

6. Ni bwabetitoakira, ti a kaaina iai ana utu Iehova

Ngkana ti bwabetitoaki, ti a kaaina iai te utu ae katiteuanaaki, ae katobibia te aonnaba. E ngae ngke a kakaokoro nako ara tabo ma aroarora, ma titeboo ara koaua, ao titeboo naba te kaetieti ibukin te aroaro ni maiu ae ti maiuakinna. Wareka Taian Areru 25:14 ao 1 Betero 2:​17, ao maroroakina te titiraki aei:

• E na kangaa te bwabetito n rota am iraorao ma Iehova ao am iraorao ma naake a taromauria naba?

KAKIMOTOTOANA

E angareirei Iesu bwa a riai ni bwabetitoaki Kristian. Ngkana e na roko n te tia anne temanna, e riai ni kakorakoraa onimakinan Iehova irouna, ni maiuakin Ana kaetieti, ao ni katabua maiuna Nakoina.

Kauring

• Tera te bwabetito, ao e aera ngkai e kakawaki?

• Tera irekereken te katabu ao te bwabetito?

• Baikara mwaneka aika kairiri nakon te katabu ao te bwabetito?

NORI NABA AIKAI

Reiakinna bwa tera te bwabetito ao tera ae e aki nanonaki iai.

“Tera te Bwabetito?” (Te kaongora n jw.org)

Kauring aanga ake e kona n ririkirake iai te aomata nakon te bwabetito.

“Tangiran Iehova ao te Kakaitau Nakoina E Kairiri Nakon te Bwabetito” (Te Taua-n-Tantani, Maati 2020)

Wareka aron ana motinnano te mwaane temanna ibukin te bwabetito, ae boto i aon tiaki tii ana namakin.

“A bon Tangirai Bwa N na Ukeri Baika a Taekinaki Raoi n te Baibara” (Te Taua-n-Tantani, Beberuare 1, 2013)