Bon Iesu te Atua ae Moan te Mwaaka?

Kaeka aika taabangaki:

▪ “Eng, Iesu bon te Atua ae Moan te Mwaaka.”

▪ “E kaotiotaki te Atua ngke e rabwatanna bwa Iesu.” Tera ae e taekinna iai Iesu?

▪ “Ngke kam tangirai, ao kam kakatonga, ngkai I nako n te Tama: ba E kakanato riki te Tama nako Iu.” (Ioane 14:28)

E taekinna Iesu bwa e aki boraoi ma tamana.

▪ “I rierake nakon Tamau, ao Tamami, ao Atuau, ao Atuami.” (Ioane 20:17) E aki taetae Iesu i bon ibukina bwa te Atua ngaia ma e taekinna bwa te Atua bon te Aomata temanna.

▪ “Ba I aki taetae mai Rou; ma E tuangai te Tama are kanakomaiai ae N na taekinna, ao ae N na atongnga.” (Ioane 12:49) A aki roko mairoun Iesu ana reirei ma a roko mairoun te Tama.

E TAEKINNA Iesu bwa boni ngaia Natin te Atua ao tiaki te Atua ae Moan te Mwaaka. Ngkana te koaua bwa Iesu bon te Atua, ao ai antai ngkanne are e tataro nakoina ni menana i aon te aonnaba? (Mataio 14:23; 26:26-29) Ni koauana, e bon aki bakaaea te taetae nakon te aomata temanna Iesu!

Ngke a butiia Iesu taan rimwina aika uoman bwa a na anganaki mwiokoaia aika okoro n ana Tautaeka n Uea ao e kaekaia ni kangai: “Tiaki au bwai te anga te tekateka i angaataiu, ao i angamaingu; ma bon aia bwai te tekateka iai ake a motikaki bukiia iroun Tamau.” (Mataio 20:23) E koaua bwa e kekeweiia Iesu ngke e taekinna are akea mwaakana n angania te bwai are a butiia? E bon aki! Ma e taekinna ma te nanorinano Iesu bwa bon tii te Atua ae iai mwaakana ni karaoi babaire. E kabwarabwaraa naba Iesu bwa iai bwaai tabeua aika a aki ataaki irouna ke irouia anera ma a tii ataaki iroun Tamana.​—Mareko 13:32.

E mangori riki Iesu nakon te Atua tii ngke e riki bwa te aomata ae maeka i aon te aonnaba? E aki. Bwa imwini maten ao utin Iesu ao e a kabwarabwaraaki n te Baibara bwa e aantaeka nakon te Atua. E kauringira te abotoro Bauro bwa “te Atua bon te kabanea n rietata i aoni Kristo.” (1 I-Korinto 11:3, Today’s English Version) E taekinaki n te Baibara bwa n te tai ae na roko ‘ngkana a kabaneaki bwaai ni kaakiaki i aan ana tautaeka Kristo, ao e na kaakiaki naba iai te Nati i aan te Atua ae kabane bwaai ni kaaki i aana, bwa e aonga n tautaeka te Atua i aoia aomata ni kabane.’​—1 I-Korinto 15:28.

E mataata bwa Iesu tiaki te Atua ae Moan te Mwaaka. Ngaia anne bukina ngkai e taekinna Iesu bwa Tamana bon ‘Atuana.’​—Te Kaotioti 3:2, 12; 2 I-Korinto 1:3, 4.a

[Footnotes]

[Caption on page 7]

E taku Iesu bwa iai bwaai tabeua aika a aki ataaki irouna ke irouia anera ma a tii ataaki iroun Tamana