E moan riki mai ia te oto karaki aei?

E taekinaki n te New Encyclopædia Britannica (1988), Volume 11, iteraniba 25, bwa a kakairi Kristian rimoa ake taani korei karaki ni kewe n aia koaua kaaini Kuriiti, ae iai iteran te rabwata ae aki mamate ao e karinaki n te rabwata ni moani karikana.

Tera ana reirei te Baibara?

“E okira tanona; A mauna nanona n te bongi naba arei.”​—Taian Areru 146:4.

Iai te ‘taamnei’ ae maiu nako naba imwini maten te aomata? E reiakinaki n te Baibara ae te Atua e karina te korakora ae te maiu ke te taamnei ae kateimatoaaki n te ikeike i nanon rabwataia aomata ao maan. E kamaiua te rabwata te korakora ae te maiu aei. Mangaia are, a na boni mate rabwataia aomata ma maan ngkana a toki ikeikeia, bwa ngkanne a aikoa kona ni kateimatoa te korakora ae te maiu are a moan anganaki iroun te Atua. A aikoa kona ni manga namakinaaba.​—Karikani Bwaai 3:19, Te Minita 3:19-21; 9:5.

Ni moan rikin te koaua ae iai te bwai teuana ae aki mamate n te rabwata, ao e maiu nako naba imwini maten te rabwata, a a mwemwe iai titiraki aikai: E nakea iteran te aomata anne imwini matena? Tera ae riki nakon te aomata ae buakaka ngkana e mate? Ngkana a kakairi aomata ake a taku bwa ngaiia Kristian n te oto karaki ae iai te bwai teuana n rabwatara ae maiu nako naba imwini matera, a na manga kairaki ngkanne bwa a na butimwaea te oto karaki teuana ae te reirei ibukin te ai ni moone.

Kabotaui kibun te Baibara aikai: Te Minita 3:19; Mataio 10:28; Mwakuri 3:23