Te Kauoua N Oto Karaki: A Kammarakaki Aika Buakaka I Moone

E moan riki mai ia te oto karaki aei?

“Temanna mai buakoia taan rabakau rimoa ae e rangi ni mwaatai n anai nanoia aomata nakoni koaua ake rimoa ibukini Moone boni Plato.”​—Histoire des enfers (The History of Hell), aei te boki ae koreaki iroun Georges Minois, iteraniba 50.

“I nukan te kauoua n tienture AD ae imwini bungiakin Iesu i aon te aba, a a moanna n namakinna Kristian tabeman ake a a tia n reireiaki taiani karioiango n te rabakau ni Kuriiti, bwa a riai ni kaotiotii aia onimaki n te aro are e a kaotiotaki iai aia iango taan rabakau akekei . . . Ao te karioiango ae te kabanea n nakoraoi riki irouia bon te Platonism [ae ana reirei Plato].”​—The New Encyclopædia Britannica (1988), Volume 25, iteraniba 890.

“E kamatoaaki n reirein te Aro anne bwa bon iai moone n aki totoki. A kanakoaki iteran rabwataia aika aki mamate aomata aika buakaka nako moone n te tai ae waekoa imwini mateia, ike a nang karawawataaki iai i moone n ‘te ai ae aki mamate.’ Te tuuaa ae te kabanea ni korakora i moone, e nanonaki iai te raurenako ma te Atua n aki toki.”​—Catechism of the Catholic Church, 1994 edition, iteraniba 270.

Tera ana reirei te Baibara?

“Akana maiu a bon ataiia ba a na mate: ma a bon aki ata te bwai teuana akana mate, . . . ba bon akea te makuri, ma te aro ni kukune, ma te ataibwai, ma te rabakau, i nanon Tiore, ike ko na nako iai.”​—Te Minita 9:5, 10.

Te taeka n Ebera ae Tiore, ae nanona “nneia maate,” e rairaki ni Baibara tabeua bwa “moone.” Tera ae katereaki n te kibu aei ni kaineti ma aroia maate? E koaua bwa a kammarakaki i Tiore bwa a aonga ni kabwakaa boon aia bure? A bon aki kioina ngkai a “aki ata te bwai teuana.” Ao anne bukina are e bubutiia iai te Atua te baatua are Iobi ni kangai ngke e a karawawataaki n te aro ae kakaiaki: “Kawakinai i moone [Tiore n te taetae n Ebera].” (Iobi 14:13; Douay-Rheims Version) Tera nanoni ngkanne ana bubutii ngkana ngaia bwa Tiore bon te tabo ni kammarakaki n aki toki? E kakabonganaaki moone n te Baibara tii ibukin ruanimateia aomata nako ike a a toki iai karaoani mwakuri nako.

E aki ngkanne mataata kabwarabwaraani moone aei ao ni boraoi riki ma ae n te Baibara? Tera te mwakuri ae rangi ni bure ae kona ni kairaki iai te Atua n tatangira bwa e na kammaraka te aomata n aki totoki? (1 Ioane 4:8) Ma ngkana ngaia bwa te ai ni moone bon te oto karaki, nanona ngkanne bon tii te oto karaki naba te maiu i karawa?

Kabotaui kibun te Baibara aikai: Taian Areru 146:3, 4; Mwakuri 2:25-27; I-Rom 6:7, 23