Titiraki Mairouia Taani Wareware

E tuangia Tarukaio Iesu bwa “a bon aki mare te koraki” ake a na kautaki.” (Ruka 20:34-36) E koaua bwa e taekina te mangauti i aon te aba?

E kakawaki te titiraki aei, ai moarara riki ibukia te koraki ake a a tia ni mate buuia aika tangiraki. E bae ni korakora tangirani manga katiteuanaakia n tekateka n taanga ma buuia ake a na kautaki te koraki akanne n te waaki ae boou i aon te aba. E kangai te mwaane temanna are e a tia ni mate buuna: “I aki iangoia ma kaainnabau bwa ai bon aei tokin tekatekara n taanga. Bon nanora ni koaua bwa ti na teimatoa ni katiteuanaaki n taromauri n aki toki. A bon tuai mani bitaki au namakin akanne.” Iai bukina ae riai ae a na kantaningaaki iai te koraki ake a na kautaki bwa a na kona ni mare? Ni kauarerekeana, ti bon aki ataa kaekaana.

Inanon ririki aika bati, a a tia n taekinaki n ara boki ana taeka Iesu ibukin te mangauti ao te mare are e bae n nanonaki iai te kautiuti i aon te aba. A na bon aki iein naake a kautaki bwa a na maiu n te waaki ae boou i aon te aba.a (Mataio 22:29, 30; Mareko 12:24, 25; Ruka 20:34-36) Kioina ngkai ti aki kona ni kamatoaa ara taeka i aon aei, e koaua bwa a kaineti ana taeka Iesu akanne nakon te mangauti nako karawa? Ti na nenera raoi ana taeka Iesu.

Iangoi baika riki n te tai anne. (Wareka Ruka 20:27-33.) A kataia ni kamwanea Iesu Tarukaio ake a aki kakoauaa te mangauti ma aia titiraki ibukin te mangauti ao te mare ma teuare te eiriki.b E kaekaia Iesu ni kangai: “A mamare natin te waaki ae ngkai, ma a bon aki mare te koraki ake a katauaki bwa a na mangauti mai buakoia maate ma ni karekea te maiu n te waaki ae na roko. Ni koauana, a na aki kona ni manga mate, bwa kaanga ai aroia anera, ao ibukina bwa a na kautaki, a nang riki bwa natin te Atua.”—Ruka 20:34-36.

E aera ngke e taekinaki n ara boki bwa ti boni bae n taekina te mangauti i aon te aba Iesu? E boto kakawakini kakoauaan anne i aon iango aika uoua. Te moan, e kabwarabwaraaki bwa a bae ni kaatuua n aia iango n te mangauti i aon te aba Tarukaio, ao e riai Iesu ni kaekaia n aron are a kantaningaia. Te kauoua, e motika ana kaeka Iesu ngke e taekina Aberaam, Itaaka ao Iakoba ake baatua aika kakaonimaki bwa a kantaningaa naba te mangauti i aon te aba.—Ruka 20:37, 38.

E ngae n anne, e taraa n ae e bon iangoa te mangauti nako karawa Iesu. Tao e boto i aon tera kakoauaan anne iroura? Ti na iangoi kibuntaeka aika kakawaki aika uoua.

“A bon aki mare te koraki ake a katauaki bwa a na mangauti mai buakoia maate.” A “tau ibukin ana tautaeka n uea te Atua” te koraki aika kakaonimaki ma ni kabiraki. (2 I-Tetaronike 1:5, 11) A a tia n atongaki bwa a raoiroi ni maiuia ae boto i aon te karea ni kaboomwi ao ibukin anne, a aki mate bwa kaanga taani bure aika kabuakakaaki. (I-Rom 5:1,18; 8:1) A taekinaki te koraki akanne bwa a “kukurei ma n itiaki” ao a iangoaki bwa a tau ibukin te mangauti nako karawa. (Te Kaotioti 20:5, 6) Ni kaitaraan anne, a na kautaki te koraki ake a na maiu i aon te aba n ikotaki naba ma “akana aki raoiroi.” (Mwakuri 24:15) A kona n taekinaki nakanne bwa “a katauaki” nakon te mangauti?

“A na aki kona ni manga mate.” E aki taekina aei Iesu: “A na bon aki manga mate.” Ma e taku: “A na aki kona ni manga mate.” E rairaki te kibuntaeka anne n rairai tabeua bwa “a bon aki tau ni manga mate” ao “akea mwaakan te mate i aoia.” A kautaki nako karawa taani kabiraki aika kakaonimaki ngkana e a toki maiuia i aon te aba ao n anganaki te aki mamate ae te maiu ae akea tokina ae e aki kona naba ni mka. (1 I-Korinto 15:53, 54) Bon akea mwaakan te mate i aoia te koraki ake a karekea te mangauti nako karawa.c

N iangoan te bwai are e taekinaki mai mwaina, tao tera ae ti kakoauaa n anne? E kona n ae e kaineti te iein ao te mangauti n ana taeka Iesu ibukin te mangauti nako karawa. Ngkana ngaia anne, ti a tuangaki n ana taeka ngkanne bwaai riki tabeua ibukia te koraki ake a kautaki nako karawa bwa, a aki iein, a aki kona ni mate ao a a riki n aanga tabeua n ai aroia anera aika maeka i karawa. Ma ibukin te iango anne, a a tabekaki titiraki tabeua.

Te moan, bukin tera ngke e taekina te mangauti nako karawa Iesu ngke e kaekaia Tarukaio ake a boni bae n iangoa te mangauti i aon te aba? E aki kaekaa aia titiraki n taai nako Iesu naake a kaitaraa ni kaineti ma te baere a iaiangoia. N te katoto, e taku nakoia I-Iutaia ake a tangira te kanikina mairouna: “Urua te tembora aei ni kabwakaa, ao N na manga kateia i nanon tenibong.” E bae n ataiia Iesu bwa a iangoa katean te tembora, “ma e bon taekina te tembora ae nanona rabwatana.” (Ioane 2:18-21) Tao e iangoia Iesu bwa akea riaina ni kaekaia Tarukaio ake a mwamwanaa te aba, ake a aki kakoauaa te mangauti ke karikaia anera. (Taeka N Rabakau 23:9; Mataio 7:6; Mwakuri 23:8) N oneani mwin anne, e bae n tangiria ni kaotii koaua ni kaineti ma te mangauti nako karawa ibukini kakabwaiaaia taan rimwina aika kakaonimaki ni koaua, ake a na karekea naba te aeka ni mangauti anne n te tai teuana.

Te kauoua, bukin tera bwa e motika ana maroro Iesu n taekina Aberaam, Itaaka ao Iakoba ake a na manga kautaki ao ni maiu i aon te aba? (Wareka Mataio 22:31, 32.) Noria bwa e korei ana taeka Iesu ibukia baatua akanne ma taeka aikai, “ni kaineti ma mangautiia maate.” E kona bibitakin te kibuntaeka anne ni manga bita te baere kaatuuaki iangoana. Ngaia are n iangoani booki ake e korei Mote ake aongkoa a kakoauai Tarukaio, e kabonganai Iesu ana taeka Iehova nakoni Mote ni menana i buakon te aroka ae urarake ni kaota iai koauan te mangauti i aon te aba bwa bon ana kantaninga te Atua.—Te Otinako 3:1-6.

Te katenua, ngkana ngaia bwa e kaineti ana taeka Iesu ibukin te mangauti ao te mare nakon te mangauti i karawa, e nanonaki n anne bwa a kona n iein te koraki ake a na karekea te mangauti i aon te aba? E aki kaekaaki raoi te titiraki ae okoro anne n Ana Taeka te Atua. Ni koauana ngkana arona bwa e taekina te mangauti nako karawa Iesu, ngkanne e aki ota te aba n ana taeka ibukia naake a kautaki nako aon te aba bwa a kona n iein n te waaki ae boou ke a aki.

N te tai moa aei, ti ataia ae e bon taekinaki n Ana Taeka te Atua bwa te mate e katoka te katiteuanaaki n te mare. Mangaia are e aki riai n iangoia te mwaane ke te aine are e a tia ni mate buuna bwa e bure ngkana e iangoa te manga iein. E a bon nakon aia motinnano aomata nako ao a aki riai ni kamaamaeaki koraki akanne ibukini kakaaean raoia ni mare ae a tangiria.—I-Rom 7:2, 3; 1 I-Korinto 7:39.

Ti a ota raoi bwa e na bae n rawata ara titiraki ibukin te maiu n te waaki ae boou i aon te aba. N oneani mwin are ti na iango n nanououa n te aro ae aki riai ibukini kaekaan titiraki akanne, ti riai n tii tataninga ao n noria. Ma ti kona ni koaua raoi n aei: A na kukurei aomata aika ongeaba ibukina bwa e na kanuaiia Iehova ni bwaai nako ake a kainnanoi ao n tangiri n te aro ae moan te raoiroi.—Taian Areru 145:16.