Ti Kainnanoa Kabebetean Nanora

Ko uringa bwakam ngkoa ngke ko uarereke? Tao e mwakoro baim ke e nanangaua bubuaniwaem. Ko kona n uringa aron tinam ni kabebetea nanom? Tao e kaitiaka ikoakim ao imwina e bautia. Ko tang ma e waekoa n rau nanom n ana taeka n akoi ao ngke e rabwatiko. Ngke ko uarereke ao e bon rangi ni kai reke kabebetean nanom.

Ma e a rikirake ni kangaanga riki aron te maiu ngkana ti a tabe n ikawai. A a bubura riki kangaanga, ao e a kangaanga riki rekeni kabebetean nanora. E kananokawaki bwa aia kangaanga ikawai, e a kona ni kangaanga katokana ni bautakina ke n ana irabwati te tina. Iangoi katoto tabeua.

• Ko a tia ni kaaitara ma te rawawata ni buan am mwakuri? E taku Julian bwa ngke e kabaneaki man ana mwakuri, ao e a rotakibuaka n te tabeaianga. E iango ni kangai: ‘N nang kangaa n tabeakinia au utu? I a tia ni mwakuri korakora i nanon ririki aika bati, ma e aera ngkai e iangoai au kambwana bwa akea uaau?’

• Tao ko a tia n rotakibuaka n uruakin am mare. E kabwarabwaraa ni kangai Raquel: “Ngke e rina ni kitanai buu 18 te namwakaina n nako, ao I a taonaki n te nanokawaki. Kaanga ai aron ae e a mwakoroua buroou mai nukana. E maraki rabwatau ao e kakaii nanou. I rangi ni maaku iai.”

• Tao iai aorakim ae kakaiaki ae e taraa n aki kona n reke katokana. Tao iai taai ake titeboo iai am namakin ma te baatua are Iobi are bwaebwaeti ni kangai: “I ribaa maiuu, I aki kan teimatoa ni maiu.” (Iobi 7:16) E bae n titeboo am namakin ma Luis, ae te mwaane ae ai 80 tabun ana ririki are e kangai: “N tabetai ao I a namakina ae I a bon tii tataningaa mateu.”

• Ke tao maten temanna ae tangiraki iroum ae ko a rangi ni kani kabebeteaki iai. E kabwarabwaraa ni kangai Robert: “Ngke e mate natiu n te kabuanibwai n te wanikiba, ao I bon aki moa kakoauaa. Imwina ao I a rotaki n te maraki are e kabotaua te Baibara ma te maraki ae reke ngkana ko ewaraki n te kabaang ae abwabwaki.”​—Ruka 2:35.

E bon reke kabebetean nanoia Robert, Luis, Raquel, ao Julian, e ngae naba ngke a rinanoni kangaanga aika karawawata aikai. E reke irouia Teuare bon tii ngaia ae kona ni kabebeteia, ae te Atua ae Moan te Mwaaka. E kangaa ni kabebetea te nano? E na kona naba ni kabebetea nanom?