Titiraki Mairouia Taani Wareware
N te aro raa are e “uotakinako [te abotoro Bauro] nakon te katenua ni karawa” ao ni “mena n te bwaretaiti”?—2Kor. 12:2-4.
N 2 I-Korinto 12:2, 3, e taekina iai Bauro te mwaane temanna are e “uotakinako nakon te katenua ni karawa.” Antai teuanne? Ngke e kororeta Bauro nakon te ekaretia i Korinto, e kamataataa bwa e kabonganaaki iroun te Atua ibukina bwa te abotoro ngaia. (2Kor. 11:5, 23) E a manga taekin “taiani miitara ma kaotioti mairoun te Uea.” N te kibu aei, e aki mwaneweiia taari riki tabeman Bauro. Ngaia are e boni kainetia nakoina bwa boni ngaia are e anganaki taiani miitara ao kaotioti.—2Kor. 12:1, 5.
Ngaia are boni Bauro are e “uotakinako nakon te katenua ni karawa” ao “e a mena n te bwaretaiti.” (2Kor. 12:2-4) E kabongana te taeka ae “kaotioti,” ae oti iai bwa e tuangaki taekan te bwai ae e na riki n taai aika a na roko.
Tera “te katenua ni karawa” are e noria Bauro?
N te Baibara, te taeka ae “karawa” e kona n nanonaki iai annang. (KBwaai 11:4; 27:28; Mat. 6:26) Ma e kona naba ni kabonganaaki te taeka ae “karawa” n aanga riki tabeua. N tabetai e nanonaki iai aia tautaeka aomata. (Tan. 4:20-22) Ke e kona naba n nanonaki iai ana tautaeka te Atua ae Ana Tautaeka n Uea.—TeKao. 21:1.
E nora “te katenua ni karawa” Bauro. Tera ae e nanonna iai? N tabetai e okioki n taekinaki te bwai teuana n te Baibara tenua te tai ibukini katuruturuana, kamatataana, ke kamatoaana. (Ita. 6:3; Etek. 21:27; TeKao. 4:8) E taraa n ae ngke e taekina “te katenua ni karawa” Bauro, e kamataataa iai te kairiri ae te kabanea ni kakannato ae taekan te Tautaeka n Uea iroun te Mesia ae e uea iai Iesu Kristo ao raona n tautaeka aika 144,000. (Nora Te Taua-n-Tantani, Nobembwa 1, 2004 i. 29, bar. 5) N aron are e koreia te abotoro Betero, ti kariariaa “karawa ae boou” ni kaineti ma ana berita te Atua.—2Bet. 3:13.
Ma tera ae e nanonna Bauro ngke e taekina te “bwaretaiti”?
Te taeka ae “bwaretaiti” e kona n nanonaki iai baika kakaokoro: (1) Ni kaineti ma mwengaia Atam ma Ewa, te taeka ae “bwaretaiti” e kona n nanonaki iai te aonnaba ae te Bwaretaiti i aon te aba n te tai ae imwaira. (2) E kona naba n nanonaki iai te tabo ae kakukurei ma n rau are e na angania ana aomata Iehova n te aonnaba ae boou. (3) E kona naba n nanonaki iai taiani kakabwaia i karawa n “ana bwaretaiti te Atua” ae taekinaki n Te Kaotioti 2:7.—Nora Te Taua-n-Tantani, ae bwain Turai 15, 2015, i. 8. bar. 8.
E kona n ae Bauro e nanoni itera ake tenua akanne n 2 I-Korinto 12:4 ngke e kabwarabwaraa te baere e noria.
Kabwarabwaraana n te aro ae kimototo:
“Te katenua ni karawa” n 2 I-Korinto 12:2 bon te Tautaeka n Uea iroun te Mesia ae e uea iai Iesu Kristo ma naake 144,000, ae “karawa ae boou.”—2Bet. 3:13.
Bon “te katenua ni karawa” ibukina bwa te Tautaeka n Uea ae te kabanea n raoiroi te kairiri iai.
Te “bwaretaiti” are e “mena” iai Bauro” n te miitara e bae n nanonaki iai (1) te Bwaretaiti ni koaua i aon te aba ae i aoni kawaina n roko, (2) te bwaretaiti n taamnei ae e na roko, ae raababanako riki nakon te bwaretaiti n taamnei ae ngkai, ao (3) “ana bwaretaiti te Atua” i karawa ao n te aonnaba ae boou.
Ngaia are te bwaretaiti bon taekani karawa ae boou ao te aonnaba ae boou. Bon te babaire ae boou, ae irekereke naba iai te Tautaeka n Uea i karawa ao te botannaomata aika toro iroun Iehova i aon te aonnaba ae te bwaretaiti.