ARONI KATOKANI BUTANAKON TE RIRIBAI

3 | Kanakoa te Riribai Man Am Iango

Ana Reirei te Baibara:

“Kam na onikaki n aromi ni kabooui ami iango, bwa kam aonga ni kakoauaa raoi bwa tera nanon te Atua ae raoiroi ma n riai ao ni kororaoi.”—I-ROM 12:2.

Ae Nanonaki n te Kibu Anne:

A kakawaki iroun te Atua ara iango. (Ieremia 17:10) Ti riai ni karaoa ae bati riki nakon ae ti na tii rarawa nakon taeka ke mwakuri aika kaotiota te riribai. E moanaki butanakon te riribai man te iango ao te nano. Ngaia are ti riai ni katoka iaiangoani baike a na karika te riribai. Ni karaoan anne, ti “na onikaki” iai ao ni katoka naba butanakon te riribai.

Te Bwai ae Ko Kona ni Karaoia:

Nenera raoi am iango ao am namakin ibukia tabemwaang, moarara riki naake e kaokoro am reeti ke abam ma ngaiia. Titirakiniko ni kangai: ‘Tera au iango ibukia? E boto iangoakia irou i aon te bwai ae I ataia ibukia? Ke e boto i aon te inanonano?’ Rarawa ni mataku ke ni wareki rongorongo n te intanete aika kona ni karika te riribai ao te iowawa.

Ti kona n tokanikai i aon te riribai n ara iango ao i nanora man Ana Taeka te Atua

E bon aki bebete n taai nako neneran raoi ara iango ma ara namakin n te aro ae riai. Ma e kona ni buokira Ana Taeka te Atua bwa ti na “atai baike e iangoi te nano ma baike e kantaningai.” (Ebera 4:12) Ngaia are teimatoa n nenera te Baibara ao kabotaui ana reirei ma am iango ao karaoa am kabanea ni konaa ni kaboraoa am iango ma ana reirei te Baibara. Ti kona n buokaki n Ana Taeka te Atua bwa ti na tokanikai i aon te riribai ae ‘nene wakaana’ n ara iango ao i nanora.—2 I-Korinto 10:4, 5.

Te Rongorongo ae Koaua—STEPHEN

E Bita Arona n Iaiango

A riribaaki Stephen ma ana utu irouia Imatang. Ngaia are e a korakora rotakina n te botaki man te tautaeka are e ataaki bwa e buaka ibukin inaomataia aomata. Imwin tabeua te tai ao e a raonia aomata aika kakaraoi mwakuri n riribai. E taku Stephen: “I matakuakini birim ma raoraou n te tai teuana ae kaotaki iai aroni karawawataaia ngkoa kaain Aberika ngke a tautoronaki n te United States. Ti rangi n un n te mwakuri n ribuaka anne, ngaia are ti a tiriboia naba rooro n rikirake aika Imatang n te tabo n taamnei n te tai anne. Imwina ti a manga kakaaeia riki Imatang n te tabo anne bwa ti na tiriboia.”

Ngke e moana ana reirei n te Baibara Stephen ma Ana Tia Kakoaua Iehova, a a boni bitaki naba ana iango ni kabane. E ururing rikaaki ao e taku: “E korakora te riribai i marenaia reeti, ma I rangi ni mimi irouia taani Kakoaua. N te katoto, ngke e nangi nako te tia Kakoaua ae te Imatang ao e katikuia natina bwa a na tararuaaki irouia kaain te utu ae a bwatabwata. Ao e butimwaeaki naba te roro n rikirake ae bwatabwata irouia kaain te utu teuana aika Imatang ao a kamaekaa i rarikia.” E kakoauaa Stephen bwa Ana Tia Kakoaua Iehova bon te botaki n itaritari ae tatangira, are e a kaman taekinna Iesu bwa a na mena i buakoia Kristian ni koaua.—Ioane 13:35.

Tera are e buoka Stephen ni katoka ana iowawa ao ana riribai? E reke buokana n I-Rom 12:2. E taku: “I a ataia ae man reiakinan te Baibara I a riai ni bita maiuu. I riai naba ni kabooua au iango n te aro are N na aki tii katoka arou ae te iowawa, ma N na noria naba bwa bon anne te kabanea n tamaroa ni maiuu.” E a tia Stephen ni maiuakina ngkai te maiu ae ai akea iai te riribai i nanon 40 tabun te ririki.