Nú Eé Láá Naa Tṍó E Bà Tú Pọ́lọ́ Bá Sẹ̀ẹ̀mài

1-2. Gbò nen ólò labví láb naa vàẹ tṍó e bà tú pọ́lọ́ bá sẹ̀ẹ̀mà va ẹ́, vaá éé ní eé ló bel boo mm̀ nakà togó belí é?

È DI mm̀ bàlà boo e pọ́lọ́ bèèla tọla kẽ. Gbò nen ólò tú pọ́lọ́ bá sẹ̀ẹ̀mà gbò e bà aa dõona ketõ̀ò, gbò e bà dú tãa, nè gbò e bà íe mèà ea dú kele ló baala. Gbò nen ólò mòn nàgé tã̀àgã̀ boo béè pọ́lọ́ nú ea nááá kĩée e bà dì, nè boo béè kọ gbò e bà gé bẹl ólò di boo béè ge ié gã́bug kpègè vaá labví pọ́lọ́ láb. Pọ́lọ́ nú ea silà aa mm̀ gbò lábví ólò naa kọ é mòn tã̀àgã̀.

² Náa ólò bọọí ló gè mòn gã́bug gbò e bà gé nveè súng tṍó e bà tú pọ́lọ́ bá sẹ̀ẹ̀mà va. À ólò leemái gè di kĩée eé íe kpènà, nè kĩée e gbò nen é tú lé bá sẹ̀ẹ̀mài. Sìgà gbò ólò gbĩ́ gè nvèè kùbmà ló tã̀àgã̀ ea di bàlà booí. Bà ólò zọ̀ dõona gbò bé uú boo kpóó ea gé bẹl, àbèè ge tẹlẹ̀ kpá nè nen ea tõo vá ló belí kọ àé láá lọ̀l gbò tã̀àgã̀ e bà gé kpeesĩ́ ló. Sõò Kpá Káí kọ́ọ̀ beele e gé nyoone nvéè Kráìst é elá bànà tṍó e Boǹ Méné Bàrì é dú gé lọ̀l pọ́lọ́ bèèla ea di kátogóí, boo béè kọ née ‘dṹùnà nakà bàlà booí. (Jṍòn 17:16) Náa kal ló béè vó, nyíéi ólò palàge bììlà tṍó e monì gbò e bà tú pọ́lọ́ bá sẹ̀ẹ̀mà dõona gbò. Èé láá bĩiná kọọ̀: ‘Éé ní ea dú bíi kọ ḿ naa tṍó e bà tú pọ́lọ́ bá sẹ̀ẹ̀mà dõona gbò e? É kọ à íe nú em é láá naa kátogóí ge lọ̀l pọ́lọ́ bèèla?’ Kọbé è láá aalá gbò bíbví, naanii èé ló bel boo bé e pọ́lọ́ bèèla ólò tọá ló Jìhóvà nè Jíízọ̀s naa.

JÌHÓVÀ NÈ JÍÍZỌ̀S Ọ́BVÍ PỌ́LỌ́ BÈÈLA

3. Éé ní ea náa vaá nyíéi ólò bììlà tṍó e bà tú pọ́lọ́ bá sẹ̀ẹ̀mài, àbèè tṍó e bà tú pọ́lọ́ bá sẹ̀ẹ̀mà dõona gbò e? (Àìzáíà 5:7)

³ Kpá Káí kọ́ nú ea náa vaá nyíéi ólò bììlà tṍó e bà tú pọ́lọ́ bá sẹ̀ẹ̀mài, nè tṍó e bà tú pọ́lọ́ bá sẹ̀ẹ̀mà dõona gbò. Kpá Káí kọ́ọ̀ Jìhóvà beè dèmii mm̀ a bèla, vaá à ólò “vùlè lé lab dògò nè lé bèèla.” (Ps. 33:5; Jén. 1:26) Jìhóvà náa ólò tú pọ́lọ́ bá sẹ̀ẹ̀mà gbò nen, vaá à ólò bẽemáe tṍó e nen tú pọ́lọ́ bá sẹ̀ẹ̀mà dõona gbò! (Dìt. 32:​3, 4; Máí. 6:8; Zèk. 7:9) Dì belí nu dòòmà bá, mm̀ deè neǹ kọ́ọ̀ bùlà Bàrì Àìzáíàa, Jìhóvà beè dã́ “kpã́ tó” e pá Ízrẹẹ̀l géè tò boo béè kọ pá ba gbò géè tú pọ́lọ́ bá sẹ̀ẹ̀mà va. (Bugi Àìzáíà 5:7.) Jìhóvà beè nè kpọ̀té gbò e bà lọlíe togó kèbá, vaá tú pọ́lọ́ bá sẹ̀ẹ̀mà dõona gbò.​—Àìz. 5:​5, 13.

4. Éé ní e nòòtẽ́ ea di mm̀ kpá Máàk 3:1-6 zógè ea kil ló bé e pọ́lọ́ bèèla ólò tọá ló Jíízọ̀s naa ẽ́? (Ẹ̀b nàgé fòtó.)

⁴ Jíízọ̀s ọ́ví nágé pọ́lọ́ bèèla, vaá vùlè lé bèèla belí Jìhóvà. Tṍó e Jíízọ̀s beè di boo kunukẽ̀íá, à íe tṍó ea beè mòn ene kà gbálà e báẹ beè ọọ táẹ́ ló. Jíízọ̀s beè bó gbálàa boo béè kọ a beè dúe ńsàn nyíe. Sõò tṍó e gbò tùle bõ̀ònaló fã̀ mon kọ Jíízọ̀s bó gbálàa deè bõ̀séi, nyíé va beè bììlà. Ba beè bùlà nú ea kil ló gè sẹlẹ log deè bõ̀séi, èlmà ge bùlà nú ea kil ló gbálà ea géè mòn tã̀àgã̀a. Láb e gbò tùle bõ̀ònaló fã̀a beè labví beè tọá ló Jíízọ̀s naa vàẹ? Nyíè Jíízọ̀s beè palàge “bììlà boo béè kọọ̀ nyíè gbòa beè àgà belí dem.”​—Máàk 3:​1-6.

5. Éé ní ea náa vaá náa bọ́ló kọ é ká súng gbẹá gbàà tṍó e bà tú pọ́lọ́ bá sẹ̀ẹ̀mài ẽ́?

⁵ Nyíè Jìhóvà nè Jíízọ̀s ólò palàge bììlà tṍó e gbò nen tú pọ́lọ́ bá sẹ̀ẹ̀mà dõona gbò. Vóà naa, náa dú pọ́lọ́ be nyíè beele biilà nàgé tṍó e gbò nen tú pọ́lọ́ bá sẹ̀ẹ̀mà dõona gbò. (Ẹ́fẹ. 4:26 nè study note ea kọ́ọ̀ “Be wrathful” ea di mm̀ New World Translation) Sõò à bọ́ló kọ é lẹ̀ẹ̀là bel ló bé e bãà súng naa, vaá kẽ̀èa boo kọọ̀ kọ̀láá bé e nyíéi biilà naa, née é láá lọ̀l pọ́lọ́ bèèla. Kàsĩ́ be è ká súng gbẹá gbàà mm̀ gã́bug tṍó, àé láá naa kọ kpá lói á zọ̀. (Ps. 37:​1, 8; Jém̀z 1:20) Vóà naa, éé ní eé láá naa tṍó e bà tú pọ́lọ́ bá sẹ̀ẹ̀mài ẽ́? Èé láá nó nu lọl ló nu dòòmà bá Jíízọ̀s.

NÚ E JÍÍZỌ̀S BEÈ NAA TṌÓ E BÀ TÚ PỌ́LỌ́ BÁ SẸ̀Ẹ̀MÀE

6. Mósĩ́ deè ní e bà géè tú pọ́lọ́ bá sẹ̀ẹ̀mà gbò nen tṍó e Jíízọ̀s beè di boo kunukẽ̀í ẽ́? (Ẹ̀b nàgé fòtó.)

⁶ Ba beè tú pọ́lọ́ bá sẹ̀ẹ̀mà Jíízọ̀s tṍó ea beè di boo kunukẽ̀í. A beè mòn nàgé kọ gbò tùle bõ̀ònaló fã̀ e ba beè di tṍóá géè tú nyèè tò tẹlẹ boo gbò nen. (Máát. 23:​2-4) A beè nyimá kọ kpóó bẹlbẹ̀l pá Róm̀ géè tú pọ́lọ́ bá sẹ̀ẹ̀mà gbò e bà géè bẹl boo, vó beè naa kọ pá Júù á gbĩ́ gè aa kẽè bẹlbẹ̀l pá Róm̀. Sìgà pá Júù beè gbaaá ló vaá bé uú boo bẹlbẹ̀l pá Róm̀. Sõò Jíízọ̀s náa beè nvèè sãa kúm gbò e bà géè bé uú boo bẹlbẹ̀l pá Róm̀. Tṍó ea nyímá kọọ̀ sìgà gbò géè noo gè tuèe naamá méné, a beè gẹẹlẹ ló àà vá zẹ̀ẹ̀.​—Jṍòn 6:15.

7-8. Éé ní ea náa vaá Jíízọ̀s náa beè gbĩ́ gè nvèè kùbmà ló pọ́lọ́ bèèla tṍó ea beè di boo kunukẽ̀í ẽ́? (Jṍòn 18:36)

⁷ Tṍó e Jíízọ̀s beè di boo kunukẽ̀í, náa beè di boo béè ge nvèè bá nè gbò e bà géè mòn tã̀àgã̀ vaá gbaaá ló bìlà bẹlbẹ̀l. Ló éé? Boo béè kọ a beè nyimá kọ náa lelà kọ gbò nen á bẹ̀l ba bá. (Ps. 146:3; Jèr. 10:23) A beè nyimá nágé kọọ̀ nen náa é láá lọ̀l nú ea náa kọ gbò nen á mòn tã̀àgã̀. Sétàn ea dú neǹ fẹ̀ nèn, ea ólò naa kọ gbò nen á tú pọ́lọ́ bá sẹ̀ẹ̀mà dõona gbò ní ea gé bẹl bàlà booí é. (Jṍòn 8:44; Ẹ́fẹ. 2:2) Vaá boo béè kọ née gbõòmà, bã̀àna gbò e bà íe lé bùlà náa ólò láá tú lé bá sẹ̀ẹ̀mà gbò nen dénè tṍó.​—Ẹ̀klì. 7:20.

⁸ Jíízọ̀s beè nyimá kọọ̀, áá Boǹ Méné Bàrì ní ea é láá lọ̀l tã̀àgã̀ e gbò nen gé mon ẽ́. Vó ní ea beè naa kọ á tú a tṍó nè kói ‘vèèmà lé kpẹ̀a ea kil ló Boǹ Méné Bàrì e.’ (Lúùk 8:1) A beè naa kọọ̀ “gbò e tákói tá vá ló vaá òò va à ká kpáá nyòòmà ge naa nú ea lelà” á agala boo kọ kùbmà é bã́ ló pọ́lọ́ bèèla nè dénè pọ́lọ́ nú ea gé náááí. (Máát. 5:6; Lúùk 18:​7, 8) Sõò tọ́ọ̀ kà bẹlbẹ̀l gbò nen náa é láá nvèè kùbmà ló pọ́lọ́ bèèla, áá Boǹ Méné Bàrì ní ea é láá naa vó é. Vaá Boǹ Méné Bàrìí náa “aa bàlà booí.”​—Bugi Jṍòn 18:36.

NÓ JÍÍZỌ̀S TṌÓ E BÀ TÚ PỌ́LỌ́ BÁ SẸ̀Ẹ̀MÀ NI

9. Éé ní ea náa kọ ó agala boo kọọ̀ áá Boǹ Méné Bàrì ní ea é láá lọ̀l pọ́lọ́ bèèla ẹ́?

⁹ Pọ́lọ́ bèèla kpáá palàge tọla kẽ deè nieí èlmà tṍó e Jíízọ̀s beè di boo kunukẽ̀íá. Sétàn nè gbò ea gé lẹẹlà bel ló ní e bà náa kọ pọ́lọ́ bèèla á kpáá palàge tọla kẽ ‘mm̀ gbò dee e tṍó é gé tàí’ é. (2 Tím. 3:​1-5, 13; Kùùà 12:12) Èé nó Jíízọ̀s vaá agala boo kọ áá Boǹ Méné Bàrì ní ea é láá lọ̀l pọ́lọ́ bèèla ẹ́. Boo béè kọ è palàge nvèè sãa kúm Boǹ Méné Bàrì, née ólò gbaaá ló bìlà bẹlbẹ̀l àbèè ge dẹlẹ nyíé boo kọ bẹlbẹ̀l gbò nen é láá nvèè kùbmà ló pọ́lọ́ bèèla. Bugi togó boo nu dòòmà bá ene kà vígà pábia e a bée kọlà Stacy.a Besĩ́ Stacy à kalá bã mm̀ kà-kàí, a beè olòó gbaaá ló gbò e bà gbĩ́ gè nvèè kùbmà ló pọ́lọ́ bèèla. Sõò a beè ié bàà-bàà bùlà be nú ea géè naa lelà. À kọ́ọ̀: “Tṍó em géè zọ̀ gbò nen bé boo gè nvèè kùbmà ló pọ́lọ́ bèèlaá, m beè olòó bugi togó beè nú em géè naaá é láá lọ̀l pọ́lọ́ bèèla. Sõò kátogóí, m̀ agàlà boo kọ Boǹ Méné Bàrì em gé nveè sãa kúmí é lọl kọ̀láá kà tã̀àgã̀. M nyímá kọ Jìhóvà é lọl kọ̀láá kà tã̀àgã̀ nè pọ́lọ́ bèèla, ea dú nú e nda ním é láá naa.”​—Ps. 72:​1, 4.

10. Mósĩ́ deè ní e gè gbaaá ló gbò e bà gbĩ́ gè lọ̀l pọ́lọ́ bèèla, bé uú boo dùùlà bá deè tṍ e Jíízọ̀s beè nèi ea di mm̀ kpá Máátìù 5:​43-48 é? (Ẹ̀b nàgé fòtó.)

¹⁰ Gã́bug nen deè nieí ólò di boo béè ge lọ̀l pọ́lọ́ bèèla vaá gbaaá ló gbò e bà gé bé uú boo kpóó ea gé bẹl. Sõò bà ólò sọ̀tọ́ deè kọ súng ea dì vá gbàà á naa kọ bàá lọ̀l togó kèbá kpóó ea gé bẹl, vaá nvèè kom ló dõona gbò. Níí dú kele ló nú e Jíízọ̀s beè kọ é naa. (Ẹ́fẹ. 4:31) Ene kà vígà págbálà e a bée kọlà Jeffrey kọ́ọ̀: “M̀ nyímà kọ gbò e bà ólò di boo béè ge lọ̀l pọ́lọ́ bèèla vaá bé uú boo kpóó ea gé bẹl ólò láá vàlẹ̀bá bã̀ súng, kyọ̀sĩ́ nu, zìb nu, vaá nvèè kom ló dõona gbò.” Sõò Jíízọ̀s beè noomài kọ é vùlè bã̀àna gbò e bà tú pọ́lọ́ bá sẹ̀ẹ̀mài. (Bugi Máátìù 5:​43-48.) Dénè bẹ̀ì e gé nyoone nvéè Kráìst é piigà bé e bẹẹ kpóó sim tùlà naa gè nó Jíízọ̀s.

11. Éé ní ea náa vaá àé láá tàvàlàí ló gè nó Jíízọ̀s e?

¹¹ Náa kal ló béè kọ è nyímà kọ Boǹ Méné Bàrì é lọl pọ́lọ́ bèèla dọ̀ọ̀mà dè-dè, àé láá tàvàlàí ló gè nó Jíízọ̀s tṍó e bà tú pọ́lọ́ bá sẹ̀ẹ̀mài. Bugi togó boo nú ea beè naaá ló Janiya e ba beè tú pọ́lọ́ bá sẹ̀ẹ̀màe. À kọ́ọ̀: “Nú e gbò nen beè naá m beè palàge kyém, naa ní ea beè palàge tànim gè kpẽ́ pọ́lọ́ e bà sím ã́. Vó beè naa kọ ḿ gbaaá ló gbò e bà ólò bé gbò e bà tú pọ́lọ́ bá sẹ̀ẹ̀mà va. A beè tõo ḿ ló belí kọọ̀ ge naa vó lelà.” Tṍó e tṍó téní, Janiya beè mòn kọọ̀ à dú bíi kọ á nyaaná bá ló bé ea bugi togó naa. À kọ́ọ̀: “M beè mòn kọọ̀ tãa vó em dẹlẹ̀ nyíé boo Jìhóvà, m beè dẹlẹ nyíé boo nú e gbò nen kọ́. Vó beè naa kọ ḿ beeláfùl ge aa gbàà gbò e bà ólò bé gbò e bà tú pọ́lọ́ bá sẹ̀ẹ̀mà vaá.” Náa kal ló béè kọ nyíéi é láá bììlà tṍó e bà tú pọ́lọ́ bá sẹ̀ẹ̀mài, àbèè tṍó e monì gbò e bà tú pọ́lọ́ bá sẹ̀ẹ̀mà dõona gbò, à bọ́ló kọ é ọẹ̀ dẽe vaá lẹ̀ẹ̀là bel ló bẹẹ súng. Èé tõó kele aa ló bìlà bẹlbẹ̀l nakà bàlà booí.​—Jṍòn 15:19.

12. Éé ní ea náa vaá à dú bíi kọ é tú ọ̀ẹ̀ dẽe sààmà nú eé bugi, ẹ̀b, vaá pãane tṍ ló é?

¹² Éé ní ea é láá nvèè bá nèi kọ é lẹ̀ẹ̀là bel ló bẹẹ súng tṍó e bà tú pọ́lọ́ bá sẹ̀ẹ̀mài ẽ́. Sìgà gbò a mon kọọ̀ ge tú ọ̀ẹ̀ dẽe sààmà nú e bà bugi, ẹ̀b, vaá pãane tṍ ló a palàge nvèè bá nè va. Nú e sìgà gbò ólò tẹlẹ boo íntanèt ólò dú nú ea é náa kọ nyíè gbò nen á biila ló kpóó ea gé bẹl. Gã́bug tṍó, gbò e bà gé ne kpẹ̀a boo rédiò àbèè boo TV ólò ló gbò bel e náa dú kà-kà. Kọbèè à gá náa vaá gbò pọ́lọ́ kpẹ̀a e dã́à à dú kà-kà, ge olòó pãane tṍ ló gbò kpẹ̀aá náa é náa kọ é láá nvèè kùbmà ló gbò pọ́lọ́ nú ea gé nááá. Kàsĩ́ be è kilsĩ́ gè olòó tú gã́bug tṍó pã̀àmà tṍ ló gbò kpẹ̀aá, àé láá naa kọ é ié tã̀àgã̀ bùlà. (Pró. 24:10) Ní ea dú pọ́lọ́ lọ̀l vaá à lee dú kọọ̀, àé láá naa kọ é gá tú gè naa bùlà Bàrì naamá túá kà nú mm̀ bẹẹ dùm, vaá àé láá táí nyíe kọ áá Boǹ Méné Bàrì ní ea é nveè kùbmà ló kọ̀láá kà pọ́lọ́ nú ea gé nááá ẽ́.

13. Mósĩ́ deè ní e gè olòó nó Kpá Káí é nveè bá nèi kọ é nyimá ló nu gè naa tṍó e bà tú pọ́lọ́ bá sẹ̀ẹ̀mài ẽ́?

¹³ Ge olòó bugi Kpá Káí buù dee vaá bugi togó boo gbò nú e bugì é nveè bá nèi kọ é nyimá ló nu gè naa tṍó e bà tú pọ́lọ́ bá sẹ̀ẹ̀mài, àbèè tṍó e bà tú pọ́lọ́ bá sẹ̀ẹ̀mà dõona gbò. Nyíè ene kà vígà pábia e a bée kọlà Alia beè palàge bììlà tṍó ea mon kọ bà tú pọ́lọ́ bá sẹ̀ẹ̀mà sìgà gbò e bà di ba bon. Ge mòn kọ bà náa ne kpọ̀té gbò e bà géè labví pọ́lọ́ lábvá beè palàge biilée nyíe. À kọ́ọ̀: “M beè bĩiná nà bá kọọ̀, ‘É kọ m̀ agàlà gé boo kọ Jìhóvà é nveè kùbmà ló gbò tã̀àgã̀í?’ Tṍóá ní em beè bugi nú ea di mm̀ kpá Jóòb 34:​22-29 é. Gbò dọ̀ Kpá Káíá beè nvèè bá nèm kọ ḿ agala boo kọọ̀ tọ́ọ̀ nu náa gṹá ló Jìhóvà. Áá Jìhóvà ní ea é láá beelá bel ló gbò nen boo bá ea bọ́ló é, vaá áá ẹlẹ ní ea é láá lọ̀l dénè tã̀àgã̀ e gé kpeesĩ́ ló é.” Boo tṍó e gé élá kọ Boǹ Méné Bàrì á domà lé bèèla, éé ní eé láá naa kátogóí é?

ÉÉ NÍ EÉ LÁÁ NAA KÁTOGÓÍ TṌÓ E BÀ TÚ PỌ́LỌ́ BÁ SẸ̀Ẹ̀MÀI Ẽ́

14. Éé ní eé láá naa kátogóí tṍó e bà tú pọ́lọ́ bá sẹ̀ẹ̀mài ẽ́? (Kọ́lọsì 3:​10, 11)

¹⁴ Née é láá lẹ̀ẹ̀là bel ló bé e gbò nen é lábví láb naa kìlmàí ló, sõò èé láá lẹ̀ẹ̀là bel ló nú e beele é náa. Dì belí bé e ni nó naa, èé láá nó Jíízọ̀s tení dú ló gè vùlè gbò nen. Íb vulèá é náa kọ é tú lé bá sẹ̀ẹ̀mà dõona gbò, bã̀àna gbò e bà tú pọ́lọ́ bá sẹ̀ẹ̀mài. (Máát. 7:12; Róm̀ 12:17) Nyíè Jìhóvà ólò palàge ẹẹ tṍó e túù lé bá sẹ̀ẹ̀mà dénè nen.​—Bugi Kọ́lọsì 3:​10, 11.

15. Mósĩ́ deè ní e gè noomà Kpá Káí gbò nen é láá nvèè bá nè va ẹ́?

¹⁵ Enè sĩ́deè eé láá nvèèmà bá nè gbò nen dú gè noomà va kà-kà bel ea kil ló Jìhóvà. Éé ní ea náa vaá è kọ́ vó é? Níí dú boo béè kọọ̀ “nyìmànù Jìhóvà” é láá nyaaná nen ea ólò palàge bã̀ súng vaá dú gboo-gboo ló, naamá nen ea é vulè dõona gbò, vaá vùlè fẹ́ẹ́-fẹẹ̀ ló. (Àìz. 11:​6, 7, 9) Besĩ́ ene kà gbálà e a bée kọlà Jemal à kalá dààmà togó gè nó Kpá Káí, a beè gbaaá ló gbò e bà ólò bé uú boo kpóó ea gé bẹl ba dó, boo béè kọ a beè tõo ẽ́ ló belí kọ gbò e bà gé bẹl géè tú pọ́lọ́ bá sẹ̀ẹ̀mà gbò nen. À kọ́ọ̀: “Nóo é láá tú bá kpóó siimá nen kọ á nyaaá. Bà náa beè tú bá kpóó siimám kọ ḿ nyaaá, sõò kà-kà bel em beè nó lọl mm̀ Kpá Káí beè naa kọ ḿ nyaaá.” Nú e Jemal nó lọl mm̀ Kpá Káí beè naa kọ á gá bé ná bé. Vóà naa, ge noomà Kpá Káí gbò nen é láá nvèè bá nè va kọ bàá kùb ge naa nú ea é nveè kom ló dõona gbò.

16. Éé ní ea náa vaá à tàn ni gè kọ́ nú ea kil ló Boǹ Méné Bàrì nè gbò nen ẽ́?

¹⁶ Dì belí bé e Jíízọ̀s beè naaá, èé dí kpènà ló gè kọ́ nè gbò nen kọọ̀ áá Boǹ Méné Bàrì ní ea é láá nvèè kùbmà ló dénè tã̀àgã̀ ea di bàlà booí é. Ge naa vó é nveè nyíé gbàà gbò e bà gé tú pọ́lọ́ bá sẹ̀ẹ̀mà va. (Jèr. 29:11) Stacy e beè ló bel kilma lóá kọ́ọ̀: “Ge nó gbò kà-kà bel ea di mm̀ Kpá Káí a nveè bá nèm kọ ḿ láá ĩ̀ìmà tṍó e bà tú pọ́lọ́ bá sẹ̀ẹ̀màm. Jìhóvà ólò tú Kpá Káí nvèèmài nyíé gbàà.” À dú bíi kọ é di kpènà ló gè tú gbò nú ea di mm̀ Kpá Káí nvèèmà nyíé gbàà gbò e bà tú pọ́lọ́ bá sẹ̀ẹ̀mà va. Be ò palàge dã́ ból ló nú e Kpá Káí kọ́ kilma ló mòn tã̀àgã̀, òé palàge agala boo tṍó eo gé kọ́ nú ea kil ló nè dõona gbò. Òé gbóó láá palàge kọ́ nú ea náa vaá Jìhóvà à sọ̀tọ́ deè kọ mòn tã̀àgã̀ á dì, nè bé ea é nveè kùbmà ló naa nè gbò eo gbáì diaí tọọ̀ kpá, àbèè gbò eo ólò gbai siai tóm.b

17. Mósĩ́ deè ní e Jìhóvà ni nveè bá nèi kọ é láá ĩ̀ìmà pọ́lọ́ bèèla ea di kátogóí é?

¹⁷ Boo béè kọ ‘Pọ́lọ́ Nyómá ní ea gé bẹl bàlà booí é,’ è nyímà kọ gbò nen é kilsĩ́ gè tú pọ́lọ́ bá sẹ̀ẹ̀mài. Sõò è nyímà nàgé kọ è íè ból dẽesĩ́ boo béè kọ pọ́ì ńkem̀ tṍó àla, Jìhóvà é ‘kyọsĩ́ Pọ́lọ́ Nyómá.’ (Jṍòn 12:31) Tení dú ló Kpá Káí, Jìhóvà a kọ́ nú ea náa vaá pọ́lọ́ bèèla à dì, nè bé e nyíée ólò bììlà naa tṍó e bà tú pọ́lọ́ bá sẹ̀ẹ̀mài. (Ps. 34:​17-19) Tení dú ló Jíízọ̀s, Jìhóvà a nóòmài nú eé láá naa tṍó e bà tú pọ́lọ́ bá sẹ̀ẹ̀mài kátogóí, nè bé e a Boǹ Méné é lọl pọ́lọ́ bèèla naa. (2 Pít. 3:13) Naanii èé kilsĩ́ gè tú bẹ̀à sã́ bùlà vèèmà lé kpẹ̀a ea kil ló Boǹ Méné Bàrì, vaá ẹ̀bmà dẽè tṍó e “lé bèèla nè lé lab dògò” é ḿḿ-má zivekà bàlà booí​—Àìz. 9:7.