Gbò Bíb E Gbò E Bà Bugi Bĩ́íná
Nen ea beè emí nú ea di mm̀ kpá Próvẹẹ̀b 30:18, 19 beè emí kọọ̀ ‘bé e págbálà nè nvín ãa bia ólò naaá nu naa palàge bọọḿ ló.’ Éé ní e tã́á bel ea di mm̀ dọ̀ Kpá Káíá tõó dọ̀ ẹ?
Nú e gã́belá tõó dọ̀ ólò bọọ ló gã́bug nen, bã̀àna gbò e bà palàge nyimá gã́bug nú ea di mm̀ Kpá Káí. Bà émí dọ̀ Kpá Káíá mm̀ New World Translation naaí: “À íe taa kà nú ea palàge bọọḿ ló, vaá à íe ténì kà nú e ním láà dã́ ból ló: Bé e gò ólò pẹẹ gbẹá sĩ́dee naa, bé e naanà ólò kyãa boo dem naa, bé e mìàlo ólò teelá gbẹá sĩ́ pène naa, nè bé e págbálà nè nvín ãa bia ólò naaá nu naa.”—Pró. 30:18, 19.
Tṍó ea kil nvéeá, e beè olòó dã́ ból ló kọọ̀ tã́á bel ea kọ́ọ̀ “bé e págbálà nè nvín ãa bia ólò naaá nu naa” gé lóá bel nyòòmà nú ea dú pọ́lọ́. Ló éé? Dõona kà gbò gã́bel ea di mm̀ dọ̀ Kpá Káíá kólí béè gbò pọ́lọ́ nu e bà náa ólò kọọ̀, “a lée.” (Pró. 30:15, 16) Vaá a 20 gã́bel ló bel kilma ló “pábiaà kyãa ól” e a ólò kọ náa síè tọ́ọ̀ kà pọ́lọ́. Vóà naa, e beè ẹ̀b kọọ̀ dì belí bé e gò ólò pẹẹ gbẹá sĩ́dee naa, bé e naanà ólò kyãa boo dem naa, nè bé e mìàlo ólò teelá gbẹá sĩ́ pène naa, vaá bà náa ólò sọ̀bá tọ́ọ̀ kà nú ea zógè kọ ba beè téní gbò kĩá gbẹẹ́ kẽ naaá, níà bé e págbálà é láá naa nu vaá tọ́ọ̀ nen náa é nyímá nú ea beè naa naa ẽ́. Boo béè vó, e beè tuumá kọọ̀ tã́á bel ea kọ́ọ̀ “bé e págbálà nè pábia ólò naaá nu naa” gé lóá bel nyòòmà nú ea dú pọ́lọ́—naamá bé e págbálà ólò láá kẹlẹ pábia kọ á zọẹ̀ẹ ié gbaa ló mà kẽ naa.
Sõò, à íe gã́bug nú ea náa vaá à bọ́ló kọ é zìgà kọọ̀ gã́belí gé lóá bel nyòòmà nú ea dú lé. Níí dú boo béè kọọ̀ nen ea beè emí dọ̀ Kpá Káíá géè kolí béè gbò nú ea palàge bọọẹ́ ló.
Kà lèlà moǹ bel Híbrù e ba beè emí mm̀ Kpá Káí e bà tab dọ̀ Kpá Káíá lọl ló géè loá bel nyòòmà nú ea dú lé. Kpá ea kọlà Theological Lexicon of the Old Testament kọ́ọ̀, moǹ bel Híbrù e bà tab naamá “palàge bọọḿ ló” ea di mm̀ kpá Próvẹẹ̀b 30:18 “tẹ́lẹ bàlà kẽ nú ea nááá . . . ea palàge dú dũ̀ùnè e nen náa láà dã́ ból ló.”
Ene kà nen e a bée kọlà Crawford H. Toy, ea ólò noomà nú pọ̀b tọọ̀ kpá ea kọlà Harvard University ea di United State kọ́ nágé kọọ̀ dọ̀ Kpá Káíá gé ló bel nyòòmà lé nu. À kọ́ọ̀: “Nen ea géè emí dọ̀ Kpá Káíá beè baatẽ́ bé e gbò nú ea géè kolí béeá dú dũ̀ùnè naa.”
Vóà naa, à dú nú e nyìmànù di m gè zìgà kọọ̀ nú ea di mm̀ kpá Próvẹẹ̀b 30:18, 19, gé baatẽ́ nú ea palàge dú dũ̀ùnè e née é láá dã́ ból ló. Bé e gò ólò pẹẹ naa, bé e naanà e náa íe kpóó tọ ólò kyãa boo dem naa, bé e mìàlo ea nyee ólò teelá gbẹá sĩ́ pène naa, nè bé e nvín ãa gbálà nè nvín ãa bia ólò vùlè ene vaá ié ẹ́ẹ́-ẹẹ̀ nyíe naa palàge bọọí ló belí bé ea beè bọọ́ ló nen ea beè emí dọ̀ Kpá Káíá naa.