Por que non contesta Deus tódalas oracións?
O noso Pai celestial, Xehová Deus, está desexando escoitar as nosas oracións sinceras. Pero non contesta todas elas. Por que non? Que deberiamos ter en conta cando oramos? Vexamos algúns consellos da Biblia.
“Cando ores, non repitas as mesmas cousas unha e outra vez” (Mateo 6:7).
Xehová non quere que repitamos oracións que aprendemos de memoria nin que as leamos dun libro. Máis ben, quere que lle falemos dende o corazón. Pensa no frustrado que te sentirías se tiveses un amigo que che repetise as mesmas palabras un día tras outro. Os bos amigos falan abertamente e son sinceros. Por iso, cando oramos usando as nosas propias palabras, demostrámoslle a Deus que o vemos como un amigo.
“E, se pedides, non recibides, porque pedides só co devezo de satisfacérde-las vosas cobizas” (Santiago 4:3).
É comprensible que Deus non responda as nosas oracións se lle pedimos cousas que sabemos que el non quere que teñamos ou que fagamos. Por exemplo, se alguén que practica xogos de azar lle ora para que lle dea boa sorte, responderá Xehová esa oración? Sería ilóxico pensar que o vai facer cando nos dixo claramente que non quere que sexamos avariciosos nin que creamos en cousas que non son reais, como a boa sorte (Isaías 65:11, nota; Lucas 12:15). Para que Deus responda as nosas oracións temos que estar seguros de que o que lle pedimos está de acordo co que el nos ensina na Biblia.
“Quen retira o oído para non oí-la lei, mesmo a súa pregaria é de aborrecer” (Proverbios 28:9).
En tempos bíblicos, Deus non respondía as oracións dos que non obedecían as súas xustas leis, e el non cambiou (Isaías 1:15, 16; Malaquías 3:6). Se queremos que responda as nosas oracións, temos que facer todo o posible por vivir segundo as súas normas. Pero, e se no pasado fixemos algo que está mal? Significa iso que Xehová nunca nos escoitará? Pois claro que non! Se demostramos que nos arrepentimos e facemos todo o posible por agradarlle, Xehová perdoaranos con cariño (Feitos 3:19).