Que preparación reciben as testemuñas de Xehová para predicar?
As testemuñas de Xehová recibimos formación continua en tódolos aspectos da nosa vida como cristiáns, o que inclúe a predicación. Esta foi a obra que Xesús mandou facer ós seus discípulos: predicar e ensinar as boas noticias do Reino de Deus (Mateo 24:14; 28:19, 20). Recibimos esa formación nas nosas reunións semanais e nos congresos que temos cada ano. Ademais as testemuñas de Xehová que teñen outras responsabilidades dentro da congregación ou na organización, reciben formación bíblica específica.
Neste artigo imos ver:
Que preparación reciben as testemuñas de Xehová?
Reunións de congregación. Cada semana asistimos a dúas reunións nos Salóns do Reino, os lugares onde adoramos a Deus. Unha reunión facémola normalmente entre semana e a outra a fin de semana. Todo o mundo pode asistir e non se fan colectas.
Reunión de entre semana. Aprendemos a mellorar a nosa lectura, a saber conversar, a falar en público e tamén a predicar e ensinar. A preparación inclúe discursos, intervencións con preguntas e respostas, escenificacións e vídeos. Esta formación axúdanos a ser máis eficaces ó compartir con outros a mensaxe da Palabra de Deus e dar cursos da Biblia cos que estean interesados en coñecela. Tódolos que asistan a esta reunión beneficiaranse dela e, sobre todo, farán máis forte a súa fe e amor por Deus e polos seus compañeiros de crenzas.
Reunión da fin de semana. Esta reunión comeza cunha conferencia bíblica pensada, en especial, para persoas que non son testemuñas de Xehová. A segunda parte da reunión é unha intervención con preguntas e respostas baseada nun artigo da edición de estudo da revista A Atalaia.a Estes artigos analizan temas e principios bíblicos que nos axudan tanto na predicación coma na nosa vida persoal.
Congresos de circuíto e rexionais. Cada ano xuntámonos en tres grandes reunións onde asisten moitas congregacións. Trátase de ocasións alegres nas que hai conferencias, escenificacións, entrevistas e vídeos que se centran nun tema bíblico. Igual que ocorre coas reunións, os congresos tamén nos axudan a coñecer mellor a Biblia e a ser máis eficaces na predicación das boas noticias. Nestas ocasións tamén pode asistir todo o mundo e non se fan colectas.
Cursos para testemuñas de Xehová baseados na Biblia
Para unha formación máis avanzada, invítase a algunhas testemuñas de Xehová a asistir a outros cursos baseados na Biblia. Que son estes cursos? Para que serven, canto duran e quen pode ir?
Curso para pioneiros
Obxectivo: Formar servos a tempo completo, chamados pioneiros,b para predicar e ensinar mellor. O curso inclúe a análise de distintos temas coa clase, escenificacións, discursos e talleres.
Duración: Seis días.
Quen pode asistir?: Invítase a asistir ás testemuñas de Xehová que completen o seu primeiro ano como pioneiros. Ademais, tamén se invita a aqueles pioneiros con máis experiencia que non asistisen nos últimos cinco anos a este curso.
Curso para Evanxelizadores do Reino
Obxectivo: Dar formación especializada a servos de tempo completo con experiencia. Os estudantes melloran as súas aptitudes para predicar e ensinar. Tamén estudan temas bíblicos en profundidade. Moitos graduados son invitados a zonas onde se necesita máis axuda para predicar.
Duración: Dous meses.
Quen pode asistir?: Os pioneiros poden solicitar asistir a este curso se cumpren certos requisitos e as súas circunstancias lles permiten servir en calquera lugar que haxa necesidade.
Curso para Anciáns de Congregación
Obxectivo: Axudar ós anciánsc a cumprir coas súas responsabilidades na congregación, como ensinar, pastorear e aumentar o seu amor por Deus e polos seus irmáns na fe (1 Pedro 5:2, 3).
Duración: Cinco días.
Quen pode asistir?: Invítase a asistir ós anciáns nomeados recentemente, así como ós que teñen máis experiencia que non asistisen a este curso nos últimos cinco anos.
Curso para Superintendentes de Circuíto e as súas Mulleres
Obxectivo: Capacitar os superintendentes de circuítod para que poidan atender máis eficazmente as súas responsabilidades (1 Timoteo 5:17). O curso tamén axuda a estes anciáns cristiáns e ás súas mulleres a comprender mellor a Biblia.
Duración: Un mes.
Quen pode asistir?: Están invitados os novos superintendentes de circuíto e as súas mulleres que leven un ano na súa asignación. Despois, son invitados cada cinco anos.
Curso do Ministerio do Reino
Obxectivo: Axudar ós anciáns e servos ministeriaise a atender as súas responsabilidades na congregación tendo en conta as circunstancias, tendencias e necesidades do momento (2 Timoteo 3:1). Este curso organízase cada poucos anos.
Duración: Polo xeral, un día, pero pode variar.
Quen pode asistir?: Superintendentes de circuíto, anciáns e servos ministeriais.
Curso do Servizo de Betel
Obxectivo: Axudar ós membros de Betelf a realizar o seu traballo eficazmente e a incrementar o seu amor por Deus e polos seus compañeiros.
Duración: Cinco días e medio.
Quen pode asistir?: Tódolos novos membros de Betel teñen que asistir. Tamén se pode invitar a membros que leven máis tempo e que non asistisen nos últimos cinco anos.
Curso Bíblico de Galaad da Watchtower
Obxectivo: Fomentar nos estudantes un amor máis profundo pola Palabra de Deus e axudarlles a aplicar o que aprenden (1 Tesalonicenses 2:13). Os homes e mulleres espiritualmente maduros que asisten a Galaad chegan a ser máis útiles para a organización de Xehová e para o labor mundial de educación bíblica. Os graduados poden ser asignados a axudar nunha congregación ou a unha sucursal, tanto no seu país de orixe coma noutro país.
Duración: Cinco meses.
Quen pode asistir?: As sucursais invitan a algúns servos de tempo completo a encher a solicitude. O curso ten lugar nos Estados Unidos, no Centro Educativo Watchtower en Patterson (Nova York).
Curso para Membros de Comité de Sucursal e as súas Mulleres
Obxectivo: Capacitar a membros de Comité de Sucursalg para supervisar o traballo e tamén as actividades espirituais das testemuñas de Xehová do país ou países que atende esa sucursal.
Duración: Dous meses.
Quen pode asistir?: A sede central das Testemuñas de Xehová invita a algúns membros de Comité de Sucursal e as súas mulleres. O curso ten lugar no Centro Educativo Watchtower en Patterson (Nova York).
En que se basea a formación que reciben as testemuñas?
Na Biblia, que sempre é o libro de texto principal para a formación das testemuñas de Xehová. Cremos que a Biblia está inspirada por Deus e que contén as mellores ensinanzas para tódolos aspectos da vida dun cristián (2 Timoteo 3:16, 17).
Teñen que pagar por esa formación as testemuñas de Xehová?
Non. A formación é gratuíta. As actividades das testemuñas de Xehová realízanse grazas ás doazóns voluntarias (2 Corintios 9:7).
a A Biblia e as nosas axudas para estudala, incluíndo os vídeos, están dispoñibles na nosa páxina web, jw.org.
b Un pioneiro é unha testemuña de Xehová, tanto home como muller, que está bautizada, é exemplar e ten o obxectivo de dedicar certo número de horas a compartir a mensaxe da Biblia cos demais.
c Os anciáns son homes cristiáns maduros que ensinan coa Biblia e pastorean o pobo de Xehová dándolles axuda e ánimo. Non se lles paga por facer este labor.
d Un superintendente de circuíto é un servo a tempo completo que visita un grupo de diferentes congregacións, chamado circuíto. Cada semana visita unha congregación e anima os seus irmáns e irmás espirituais con discursos baseados na Biblia e acompañándoos na predicación.
e Os servos ministeriais fan moitas tarefas para os seus irmáns e irmás. Isto permite que os anciáns teñan máis tempo para ensinar e pastorear.
f Betel é o nome que teñen as sucursais das testemuñas de Xehová. Os servos a tempo completo que serven alí dedícanse a apoiar as actividades das testemuñas de Xehová no territorio que atende a sucursal.
g Un Comité de Sucursal está composto por tres ou máis homes espiritualmente maduros.