Pode unha persoa decidir deixar de ser testemuña de Xehová?

Si. Calquera testemuña de Xehová pode deixar de ser membro da nosa confesión relixiosa de dúas maneiras:

• Mediante unha solicitude formal. Unha persoa pode informar, oralmente ou por escrito, de que non desexa seguir sendo testemuña de Xehová.

• Mediante as súas accións. Unha persoa podería facer algo que demostre que non quere seguir sendo testemuña de Xehová (1 Pedro 5:9). Por exemplo, podería converterse a outra relixión e manifestar a súa intención de formar parte dela (1 Xoán 2:19).

Se unha persoa deixa de predicar ou de ir ás reunións, deixa de ser testemuña de Xehová?

Non. Non é o mesmo renunciar a ser testemuña de Xehová, por petición ou acción, que debilitarse na fe. Ás veces, unha persoa deixa temporalmente as súas prácticas relixiosas, pero non ten por que significar que perdese a fe; pode deberse, por exemplo, a que estea pasando por un período de desánimo. Así que non lle damos as costas. Máis ben buscamos a forma de apoiala e animala (1 Tesalonicenses 5:14; Xudas 22). Se a persoa desexa axuda, os responsables da congregación, ou anciáns, serán os primeiros en ofrecerlla (Gálatas 6:1; 1 Pedro 5:1-3).

Así a todo, os anciáns non poden obrigar a ninguén a seguir sendo testemuña de Xehová. Cadaquén escolle a súa relixión (Xosué 24:15). Nós cremos que adorar a Deus debe ser decisión persoal e voluntaria (Isaías 6:8; Mateo 22:37).