Quen é o culpable do noso sufrimento?

Se Deus non é o culpable do sufrimento, como se explica que no mundo haxa tanta fame, pobreza, guerras, enfermidades e desastres naturais? A Palabra de Deus, a Biblia, menciona tres razóns principais polas que a humanidade sofre:

1. O egoísmo, a cobiza e o odio. “Un home domina sobre outro para mal” (Eclesiastés 8:9). Moitas veces a xente sofre por culpa do egoísmo e a crueldade doutros humanos imperfectos.

2. Un mal momento e o suceso imprevisto. A miúdo as persoas sofren porque “lles chega algún mal momento e algún suceso imprevisto” (Eclesiastés 9:11, TNM). É dicir, sofren por estar no momento e no lugar equivocados, porque ocorren accidentes ou porque a xente é imprudente e comete erros.

3. O malvado gobernante do mundo. A Biblia deixa claro cal é a principal causa do sufrimento. Di: “O mundo enteiro está baixo o control do Maligno” (1 Xoán 5:19). O “Maligno” é Satanás o Demo, unha criatura espiritual moi poderosa. Ó principio era un anxo fiel a Deus, pero “apartouse da verdade” (Xoán 8:44). Outros anxos uníronse a el e rebeláronse contra Deus para satisfacer os seus desexos egoístas. Desta maneira convertéronse en demos (Xénese 6:1-5). Desde que se rebelaron, Satanás e os seus demos inflúen dunha maneira moi poderosa e cruel nos asuntos deste mundo. E isto nótase máis na actualidade. Agora o Demo, cheo de furia, “está enganando a toda a terra”. Por iso a Biblia di : “Ai da terra”! (Apocalipse 12:9, 12) De feito, Satanás é un tirano cruel que desfruta vendo sufrir as persoas. É el, e non Deus, o culpable do sufrimento.

PENSA NISTO: Só alguén malvado e sen corazón faría sufrir a xente inocente. Pero a Biblia di que “Deus é amor” (1 Xoán 4:8). Tamén mostra que é un Deus amoroso ó dicir: “Lonxe de Deus o ser culpable, lonxe do Omnipotente o obrar inxusto” (Xob 34:10).

Aínda así, poida que te preguntes canto tempo vai permitir o Deus Todopoderoso que Satanás siga co seu goberno cruel. Como vimos, Deus odia a maldade e dóelle moito vernos sufrir. De feito, a Biblia anímanos a contarlle tódalas nosas inquietudes porque se preocupa por nós (1 Pedro 5:7). No seguinte artigo veremos que Deus nos quere moito e que ten o poder para acabar con todo o sufrimento e a inxustiza.a