Como che pode axudar a oración?

Cando Pamela enfermou gravemente, buscou axuda médica profesional. Pero tamén lle orou a Deus pedíndolle forzas para aguantar a súa difícil situación. Foille de axuda orar?

Ela explica: “Cando me estaban dando tratamento contra o cáncer, moitas veces sentín pánico. [...] Pero ó orarlle a Xehová Deus, invadíame unha sensación de calma e podía pensar con claridade. Sigo tendo unha dor crónica, pero as oracións axúdanme a seguir sendo positiva. Cando as persoas me preguntan como estou, dígolles: ‘Non me sinto moi ben, pero estou de bo humor’”.

Por suposto, non temos que esperar a que nos pase algo moi grave para orar. Todos nos enfrontamos a problemas, grandes ou pequenos, e a miúdo sentimos que necesitamos axuda para facerlles fronte. Pode axudarnos a oración?

A Biblia di: “Bota a túa carga sobre Xehová, e el vaite soster. Xamais permitirá que caia o xusto” (Salmo 55:22, TNM). Canto nos anima saber isto! Entón, como pode axudarche a oración? Se lle oras a Deus da maneira que el quere, el darache o que necesitas para enfrontarte ós teus problemas (mira o recadro “Os beneficios de orar”).

Os beneficios de orar

Paz mental

“Presentádelle a Deus as vosas peticións [...]. E a paz de Deus, que supera toda intelixencia, custodiará os vosos corazóns e os vosos pensamentos en Cristo Xesús” (Filipenses 4:6, 7). Se lle contas a Xehová todo o que che preocupa, el axudarache a manter a calma e a tomar boas decisións cando esteas estresado.

Sabedoría

“Se algún de vós está necesitado de sabedoría, que lla pida a Deus, que llela dá a todos abondosamente e sen roñar” (Santiago 1:5). Cando estamos baixo presión non sempre tomamos as mellores decisións. Se lle pides a Deus sabedoría, el pode facer que recordes moitos principios útiles da súa Palabra, a Biblia.

Forzas e consolo

“Teño forzas para todo gracias a quen me fai forte” (Filipenses 4:13). Como Xehová é o Deus Todopoderoso, pode darche as forzas que necesitas para facerlles fronte ós problemas ou sosterte durante as túas probas (Isaías 40:29). A Biblia tamén di que Xehová é o “Deus de toda consolación”. El pode consolarnos “en tódalas nosas mágoas” (2 Corintios 1:3, 4).

PODE AXUDARCHE A TI TAMÉN?

Por suposto, Xehová non nos obriga a orarlle, máis ben invítanos a facelo (Xeremías 29:11, 12). E que hai se no pasado sentiches que as túas oracións non foron respondidas? Non te poñas triste nin te deas por vencido. Pensa no seguinte exemplo. Quizais uns pais cariñosos non lles axuden ós seus fillos da maneira ou no momento que os rapaces esperaban. É posible que teñan unha solución mellor. Pero o que está claro é que os pais cariñosos sempre lles axudan ós seus fillos.

Xehová Deus, o mellor Pai de todos, tamén quere axudarche a ti. Se analizas con coidado as ideas bíblicas que vimos e fas todo o que poidas por poñelas en práctica, Deus responderá as túas oracións da mellor maneira posible (Salmo 34:16 [34:15, TNM]; Mateo 7:7-11).