Brais Seara/Moment via Getty Images
ESTADE SEMPRE VIXIANTES!
Secas extremas. O que di a Biblia
“A China padece a peor onda de calor e o terceiro verán máis seco dende que hai rexistro” (The Guardian, 7 de setembro de 2022).
“Espérase que a seca no Gran Corno de África continúe por quinto ano consecutivo” (UN News, 26 de agosto de 2022).
“Dous terzos de Europa están baixo algún tipo de alerta por seca, no que probablemente sexa o peor dato en 500 anos” (BBC News, 23 de agosto de 2022).
Moitos expertos predín que este tipo de secas continuarán e mesmo empeorarán. Hai algunha esperanza para o futuro? Que di a Biblia ó respecto?
As secas e as profecías da Biblia
Isto é o que predixo a Biblia para os nosos días:
“Haberá [...] fames en diversos lugares” (Lucas 21:11).
Moitas veces as secas provocan fame. O sufrimento e a morte que causa a fame tamén cumpre coas profecías da Biblia (Apocalipse 6:6, 8).
Por que están indo a peor as secas?
A Biblia dános unha das razóns principais:
“Ó home que está andando nin sequera lle corresponde dirixir os seus pasos” (Xeremías 10:23, TNM).
Isto significa que os humanos non son capaces de “dirixir os seus pasos”, é dicir, non son quen de gobernarse a si mesmos. As súas malas decisións a miúdo causan escasezas de auga e secas.
A maioría dos científicos están de acordo en que as accións do home foron a causa do quentamento global. Como resultado, aumentaron as secas por todo o mundo.
A cobiza e as políticas que só buscan beneficios a curto prazo provocaron deforestación, contaminación e o mal uso dos recursos naturais. Isto puxo en risco as valiosas reservas de auga do noso planeta.
Con todo, a Biblia dános esperanza.
Hai algunha esperanza para o futuro?
A Biblia promete que Deus vai acabar coa escaseza da auga. Como o fará?
1. Deus vai “esnaquiza-los que destrúen o mundo” (Apocalipse 11:18). El acabará cunha das causas da escaseza de auga: a xente mala e cobizosa que estraga o medio ambiente (2 Timoteo 3:1, 2).
2. “A terra reseca convértese nunha lagoa” (Isaías 35:1, 6, 7). Deus reparará o dano que causan as secas e converterá o noso planeta nun paraíso onde non falte a auga.
3. “Ti coidas e réga-la terra, arriquécela de mil maneiras” (Salmo 65:10 [65:9, TNM]). Coa bendición de Deus, a Terra estará chea de bo alimento e auga limpa para todos.