Cambiouse ou manipulouse a Biblia?

Non. Ó comparar manuscritos antigos comprobouse que a Biblia é basicamente a mesma, malia que durante miles de anos se foi copiando en materiais perecedoiros a partir doutras copias.

Significa isto que nunca se cometeron erros nas copias?

Atopáronse milleiros de manuscritos antigos da Biblia. Algúns deles conteñen certas diferenzas, o que quere dicir que se cometeron erros ó copialos. As máis delas son pequenas e non cambian o significado do texto. Inda así tamén se atoparon algunhas diferenzas importantes. Semella que se fixeron adrede hai moito tempo para cambiar a mensaxe orixinal da Biblia. Imos ver dous exemplos:

1. En 1 Xoán 5:7, algunhas traducións antigas din: “No ceo: o Pai, a Palabra e mailo Espírito Santo; e estes tres son un”. Con todo, hai manuscritos fiables que confirman que estas palabras non estaban no texto orixinal senón que se engadiron despois.a Por iso as traducións actuais mais fiables omitíronas.

2. O nome propio de Deus aparece milleiros de veces nos manuscritos antigos da Biblia. Pero moitas traducións substituírono por títulos coma “Señor” ou “Deus”.

Por que podemos estar seguros de que non se van atopar moitos máis erros?

Lévanse descubertos tantos manuscritos que é máis fácil ca nunca atopar erros.b Ó comparalos, que demostran sobre a exactitude da Biblia?

• O académico William Henry Green dixo sobre as Escrituras Hebreas, tamén chamadas Antigo Testamento: “Podemos dicir con seguridade que ningunha outra obra antiga se transmitiu con tanta exactitude”.

• O académico Frederick Bruce escribiu sobre as Escrituras Gregas Cristiás ou Novo Testamento: “As probas que temos sobre a exactitude do Novo Testamento son moito máis grandes cás dos autores clásicos, e mais ninguén se atreve a cuestionar a autenticidade das obras destes autores”.

• Sir Frederic Kenyon, unha importante autoridade en manuscritos bíblicos, dixo que unha persoa “pode coller a Biblia completa na súa man e dicir sen medo a equivocarse que ten a verdadeira Palabra de Deus, que se transmitiu sen erros importantes de xeración en xeración a través dos séculos”.

Que outras razóns temos para confiar en que a Biblia se transmitiu de xeito exacto?

• Tanto os copistas xudeus coma os cristiáns conservaron relatos que falaban dos graves erros que cometeu o pobo de Deus (Números 20:12; 2 Samuel 11:2-4; Gálatas 2:11-14).c Tamén conservaron relatos que condenaban a desobediencia dos xudeus e que deixaban constancias das doutrinas inventadas polos homes (Oseas 4:2; Malaquías 2:8, 9; Mateo 23:8, 9; 1 Xoán 5:21). Os copistas demostraron que eran de fiar e que tiñan en alta estima a sagrada Palabra de Deus ó copiar con exactitude estes relatos.

• É lóxico pensar que se Deus inspirou a Biblia tamén se asegurou de conservar a súa mensaxe, non si? (Isaías 40:8; 1 Pedro 1:24, 25).d Despois de todo, non a fixo só para que fose útil no pasado senón tamén para nós na actualidade (1 Corintios 10:11). “Ora, todo canto antigamente se escribiu, escribiuse para a nosa instrucción: para que entre a nosa paciencia e o consolo que dan as Escrituras, manteñámo-la esperanza” (Romanos 15:4).

• Xesús e os seus seguidores citaron de copias das Escrituras Hebreas e en ningún momento dubidaron de que esas copias fosen exactas (Lucas 4:16-21; Feitos 17:1-3).