Iniciativas sostibles que benefician os nosos irmáns e o planeta

As testemuñas de Xehová sabemos que pronto Deus intervirá para salvar a Terra do dano que os humanos lle causaron (Apocalipse 11:18). Con todo, tamén facemos o que podemos para coidar o planeta. Por exemplo, implementamos moitas iniciativas sostibles nas nosas instalacións.

As iniciativas sostibles, ou solucións ecolóxicas, son proxectos que teñen como obxectivo reducir o impacto negativo no medio ambiente. Que proxectos deste tipo fixemos? E como usamos as doazóns dos nosos irmáns da mellor maneira?

Unha solución para manter fresco un Salón de Congresos

O Salón de Congresos de Matola, en Mozambique, foi construído inicialmente sen paredes e cun tellado de chapa metálica. Este tellado acumulaba moita calor, facendo que o auditorio estivese moi quente. Un irmán di: “A calor facíanos suar! Cando remataba o programa, os irmáns saían correndo para fóra buscando aire fresco”. Como poderiamos conseguir un ambiente máis cómodo para que os nosos irmáns se puidesen concentrar?

Decidimos optar por unha solución ecolóxica: instalar ventiladores impulsados polo vento e tamén colocar illamento no tellado. O illamento reduce a cantidade de calor do sol que se transfire ó edificio, e os ventiladores proporcionan un fluxo constante de aire fresco. Os ventiladores non requiren enerxía, senón que usan o vento e a convección natural para extraer o aire quente que se acumula no auditorio. Estes ventiladores custan uns 50 dólaresa cada un.

Esta solución mellorou moito a calidade do aire no Salón de Congresos. Como non hai aire estancado, acumúlase menos humidade e menos mofo no edificio. Tamén hai menos acumulación de dióxido de carbono e un maior fluxo de osíxeno. Como resultado, os asistentes poden concentrarse mellor e están máis cómodos. O irmán do que falamos antes di: “Agora, non saímos correndo fóra en canto remata o programa. En vez diso, quedamos no auditorio durante a pausa para o xantar, charlando cos amigos. Sentarse baixo o novo tellado é como sentarse baixo unha árbore grande e agradable!”.

Usamos fontes de enerxía renovables

En moitos dos nosos edificios ó redor do mundo instalamos sistemas fotovoltaicos. Estes sistemas usan paneis solares para converter a luz do sol, unha fonte de enerxía renovable, en electricidade. Como resultado, somos menos dependentes da electricidade xerada a partir de combustibles fósiles. Os sistemas fotovoltaicos producen menos contaminación e axúdannos a aforrar os fondos doados.

En 2023, instalouse un sistema fotovoltaico na sucursal de Eslovenia, que proporciona o 30 % das necesidades enerxéticas do edificio. Ademais, se nun momento dado o sistema xera máis electricidade da que se necesita, a enerxía sobrante pode enviarse á rede eléctrica da cidade. Este sistema custou 360.000 dólares. Non obstante, como agora as facturas da luz da sucursal son máis baixas, o sistema amortizarase en catro anos.

En 2024, instalamos paneis fotovoltaicos e unha gran batería na sucursal de Sri Lanka. Este proxecto custou uns 3 millóns de dólares, e o sistema asume o 70 % das necesidades enerxéticas da sucursal. Os aforros cubrirán a inversión dos paneis en tan só tres anos. Ese mesmo ano, tamén instalamos un sistema fotovoltaico na sucursal dos Países Baixos. Este sistema custou 1,1 millóns de dólares e proporciona o 35 % da electricidade para a sucursal. Este sistema amortizarase en nove anos.

Tamén instalamos sistemas fotovoltaicos en varias oficinas remotas de tradución (OTR) en México. Vexamos un exemplo: a OTR ó tarahumara (Central) situada en Chihuahua. No inverno, as temperaturas poden baixar de 0 graos Celsius e no verán, alcanzan máis de 40 graos! Con todo, debido ó alto custo da electricidade, os irmáns evitaban usar sistemas de calefacción e refrixeración. Jonathan, un irmán que traballa na OTR, di: “Usabamos mantas e roupa de abrigo no inverno e, no verán, abriamos as ventás”.

En 2024, instalouse un sistema fotovoltaico na OTR. Este sistema custou 21.480 dólares, pero os aforros cubrirán a inversión en cinco anos. Agora, os nosos irmáns poden usar os sistemas de calefacción e refrixeración con máis frecuencia. Jonathan di: “Desfrutamos máis da nosa asignación e somos máis produtivos. Ó mesmo tempo, sentímonos ben sabendo que os recursos da nosa organización están sendo usados de maneira eficiente e respectuosa co medio ambiente”.

Recollemos a auga da choiva

En África, algúns Salóns do Reino non teñen acceso a unha fonte de auga segura. Como resultado, ás veces os irmáns teñen que percorrer varios quilómetros para levar auga ata o seu Salón do Reino. Noutros Salóns, os irmáns compran auga que logo se entrega en camións, pero isto é caro e non é respectuoso co medio ambiente.

Para que os nosos irmáns teñan auga, instalamos canlóns nos tellados e grandes tanques de auga en moitos Salóns do Reino en toda África. Antes de instalar os equipos, os irmáns estudan o microclima local para deseñar o sistema máis efectivo para cada Salón. Equipar un Salón do Reino custa entre 600 e 3000 dólares. Aínda así, este equipo adoita reducir os gastos operativos dos Salóns do Reino, xa que os irmáns non necesitan pagar pola auga.

Estes sistemas que recollen a auga da choiva beneficiaron os nosos irmáns. Noemia, unha irmá de Mozambique, di: “Antes, viaxabamos longas distancias para obter auga. Chegabamos ó Salón moi cansos. E como había pouca auga, era difícil manter unha boa hixiene. En cambio, agora todos podemos lavar as mans e ir ó Salón do Reino sen estar demasiado cansos para desfrutar da reunión. Moitas grazas!”.

De onde veñen os cartos para pagar estas iniciativas ecolóxicas? Mediante doazóns para a obra mundial, moitas das cales se fan a través dos diferentes métodos que se atopan en donate.jw.org. Moitas grazas polas túas xenerosas doazóns!